ءبىلىم نەگىزى – باستاۋىشتا
ۇرپاق بولاشاعىن ويلايتىن ءاربىر مۇعالىم ءوز شاكىرتىنىڭ ءبىلىمدى, ساۋاتتى بولىپ ءوسۋىن قالايدى. ال بىلىمگە, ونەرگە, عىلىمعا اپارار جول باستاۋىش سىنىپتان باستالادى. سوندىقتان جاڭا وقۋ جىلى قارساڭىندا العاش رەت مەكتەپ تابالدىرىعىن اتتاعالى وتىرعان بۇلدىرشىندەردىڭ زامان تالابىنا ساي ءبىلىم الىپ, اقپاراتتىق تەحنولوگيانى ەركىن مەڭگەرۋىنە جاعداي جاساۋ ءبىزدىڭ باستى ماقساتىمىز بولماق, دەيدى باستاۋىش سىنىپ مۇعالىمى سالتانات امانوۆا.
ەلباسى نۇرسۇلتان نازارباەۆ ورايى كەلسە جاستاردى بىلىمگە شاقىرۋدان جالىقپايدى.
«بەتالىسى كۇندە وزگەرگەن الماعايىپ دۇنيەدە ادامزات ءۇشىن ەشقاشان وزگەرمەگەن, وزگەرمەيتىن تەمىرقازىقتار بار. ول – ءبىلىم! ول – ەڭبەك! ەل بولاشاعىنىڭ باياندى بولماعى باستا بۇلىقسىعان ءبىلىم مەن قولدا ويناعان ەڭبەككە بايلانىستى» دەپ ايتقانى دا – سونىڭ دالەلى.
وسىناۋ ساليقالى ءسوزدى بارلىق قازاقستاندىقتار, اسىرەسە, كەيىنگى تولقىن مىقتاپ ساناسىندا ساقتاۋى قاجەت. ولاردا ءبىلىم الۋعا, جاڭا نارسەنى ۇيرەنۋگە, عىلىمدى تانۋعا دەگەن ىقىلاس باردا ءبىز, ياعني ۇستازدار قاۋىمى ايانىپ قالمايمىز. ۇل-قىزدارىمنىڭ بويىنان مۇنداي قاسيەتتەردى بايقاعان سايىن ساباقتى مەيلىنشە قىزىقتى ءارى ەرەكشە ۇيىمداستىرۋعا قۇلشىنىسىم ارتا تۇسەدى. باستاۋىش سىنىپتىڭ وقۋشىلارى ءۇشىن بۇگىندە نەبىر ايرىقشا مەتوديكالار وقۋ باعدارلاماسىنا ەنگىزىلگەن. ماسەلەن, ساياحات ساباق, اۋكتسيون ساباق, پانورامالىق ساباق تۇرىندە وتكىزىلەتىن جاڭا تاقىرىپ بالانىڭ وي-ءورىسىن دامىتىپ, كوكجيەگىن كەڭەيتەدى.
ءارى ونىڭ ەستە جاقسى ساقتالۋىنا, قورىتىلۋىنا كومەكتەسەدى.مۇنىمەن قوسا, ساباق بارىسىندا بالدىرعانداردىڭ ءوز ويىن اۋىزشا ەركىن جەتكىزۋىنە جاردەمدەسەتىن ويىنداردى دا ءجيى قولدانامىز. تاجىريبە كورسەتكەندەي, مۇنداي ءادىس-ءتاسىل ءتىلدىڭ انىقتىعىنا, شۇرايلىلىعىنا, كوركەمدىگىنە ۇلكەن ۇلەس قوسادى.