بيىل ىندەت سالدارىنان وتاندىق عىلىم مەن ءبىلىم سالاسى سىندارلى كەزەڭدى باستان كەشىرۋدە. تۇڭعىش رەت ءبىلىم جۇيەسىندە جاپپاي قاشىقتان وقىتۋ فورماتى ەنگىزىلدى, پەداگوگتارمەن قاتار وقۋشىلارعا ۇلكەن جاۋاپكەرشىلىك جۇكتەلدى. راس, پرەزيدەنت اتاپ وتكەندەي, قاشىقتان وقىتۋ ءىسىن ۇيىمداستىرۋدا قاتەلىكتەر كەتتى. سوعان قاراماستان ۇستازداردىڭ جاڭالىقتى جاتسىنباي قابىلداۋىنىڭ ارقاسىندا وتكەن وقۋ جىلى ءساتتى اياقتالدى.
وتكەن جىلدان باستاپ پرەزيدەنت تاپسىرماسىمەن ەلىمىزدە ءبىلىم بەرۋدىڭ ورنىنا ديپلوم ساتۋمەن اينالىسىپ وتىرعان ۋنيۆەرسيتەتتەرمەن كۇرەس جۇرگىزىلۋدە. وتاندىق ءبىلىم-عىلىم سالاسىنىڭ دامۋى ءۇشىن بۇل قادام كەرەك, ءارى ماڭىزدى. ويتكەنى ءبىلىمسىز بەرىلگەن جالعان قۇجات كىم-كىمدى دە جارعا جىعادى. ءبىرىنشى كەزەكتە سولارعا تىيىم سالۋ ارقىلى وقۋ ورىندارىنداعى ءبىلىم بەرۋ ساپاسىن ارتتىرۋعا كۇش سالىناتىنى اقيقات.
بىلتىرعى جىل ءبىلىم سالاسى قىزمەتكەرلەرى ءۇشىن ناتيجەلى جىل بولدى. تاۋەلسىزدىك تاريحىندا تۇڭعىش رەت «پەداگوگ مارتەبەسى تۋرالى» زاڭى قابىلداندى. قولدانىلا باستاعانىنا از ۋاقىت بولسا دا پەداگوگتار زاڭنىڭ يگىلىگىن كورىپ وتىر. ءبىلىم سالاسىنداعى باستى ماسەلەنىڭ ءبىرى – ۇستازدار جالاقىسىنىڭ ازدىعى. بىلتىر پرەزيدەنت الداعى ءتورت جىل ىشىندە مۇعالىمدەردىڭ ەڭبەكاقىسىن ەكى ەسە ارتتىرۋدى تاپسىرعان بولاتىن. وسىعان سايكەس, كەلەسى جىلدان باستاپ ۇستازداردىڭ جالاقىسى 25 پايىزعا وسەدى. بۇعان قوسا 1 قىركۇيەكتەن باستاپ تالىمگەرلەرگە 1 بلج كولەمىندە قوسىمشا اقى تولەنەدى. ۇستازدارعا داپتەر تەكسەرگەنى ءۇشىن جانە سىنىپ جەتەكشىلىگى ءۇشىن تولەنەتىن قوسىمشا تولەماقىلارى دا 2 ەسەگە ءوستى. ۇكىمەتتىڭ ۇستازدار جالاقىسىن وسىلايشا ارتتىرىپ, قولداۋ كورسەتىپ وتىرعانى قۋانتارلىق.
مەملەكەت باسشىسىنىڭ «پەداگوگتاردىڭ جاعدايى جاقسارتىلماسا, سالادا وڭ وزگەرىستەر بولا قويمايدى» دەگەن پىكىرىنە تولىق قوسىلامىن. زامان قارىشتاپ دامىپ, وزىق تەحنولوگيالار قولدانىسقا ەنگىزىلە باستاسا دا وقۋشىنىڭ ساپالى ءبىلىم الۋى ءۇشىن مۇعالىمدەردىڭ ماڭىزى ەرەكشە. «مەكتەپتىڭ جانى – مۇعالىم» دەپ تەگىن ايتىلماسا كەرەك. بۇل تۇرعىدا, وقۋشىلارىمىزدىڭ وزات بولۋىنا, جاھاندانۋ زامانىنا ساي ۇرپاق تاربيەلەۋگە جاۋاپتى ءبىلىم سالاسى قىزمەتكەرلەرىن قولداۋعا قاتىستى شارالاردىڭ ۇزدىكسىز جۇرگىزىلە بەرۋىن قۇپتايمىن.
ايگۇل مۇقاشەۆا,
«قازاقستاندىق سالالىق ءبىلىم
جانە عىلىم قىزمەتكەرلەرى
كاسىپتىك وداعى» قب ءتورايىمى
