ايداربەك قوجانازاروۆ,
«استانا» الەۋمەتتىك-كاسىپكەرلىك كورپوراتسياسى» اق پرەزيدەنتى: «ءبىر تەرەزە» قاعيداسى بيۋروكراتيانى بولدىرمايدى
تاياۋدا بيزنەس-
قاۋىمداستىقپەن وتكەن كەزدەسۋ بارىسىندا قالا اكىمى اسەت يسەكەشەۆ استانا قالاسىنىڭ تۇراقتى ەكونوميكالىق دامۋ جوسپارىنا ساي كەلەتىن ون باسىم سەكتوردى اتاعان بولاتىن. نەگىزگى بەسەۋى – تۋريزم, دەۆەلوپمەنت, زاماناۋي ءوندىرىس, قارجى ورتالىعى جانە مەملەكەتتىك ورگاندار مەن حالىقارالىق كومپانيالارعا قىزمەت كورسەتۋ سالاسى. سونىمەن قاتار, ءبىلىم بەرۋ, دەنساۋلىق ساقتاۋ سالاسى, ساۋدا جانە لوگيستيكا, مادەنيەت جانە سپورت, كرەاتيۆتى سەكتور سەكىلدى بەس قوسالقى باعىتتا بيزنەستىڭ بەلسەندىلىگىن ارتتىرۋعا ايرىقشا كۇش سالىنباق.
اتالمىش كونتسەپتسيانىڭ ىسكە اسۋىنا مەملەكەت پەن جەكەنىڭ ارىپتەستىگىنە دانەكەر بولۋدى كوزدەيتىن «استانا» الەۋمەتتىك كاسىپكەرلىك كورپوراتسياسى قالاي ۇلەس قوسىپ جاتىر؟ كومپانيانىڭ «جاڭا مەنەدجمەنتى» – اكتسيونەرلىك قوعامنىڭ پرەزيدەنتى ايداربەك قوجانازاروۆپەن اڭگىمە وسى باعىتتا ءوربىدى.
– «استانا» الەۋمەتتىك-
كاسىپكەرلىك كورپوراتسياسىنىڭ نەگىزگى ماقساتى – جەرگىلىكتى جانە شەتەلدىك ينۆەستورلارمەن بىرلەسىپ, ەلوردادا كوممەرتسيالىق جانە الەۋمەتتىك جوبالاردى جۇزەگە اسىرۋ ەكەنى ءمالىم, – دەپ باستادى اڭگىمەسىن ايداربەك اسانۇلى, – وسىعان وراي, كورپوراتسيانىڭ بيزنەس-باستامالاردى قولداۋ مەحانيزمدەرىن قايتا قاراستىرىپ, ينۆەستورلارعا «ءبىر تەرەزە» پرينتسيپىمەن قىزمەت كورسەتۋدى كۇشەيتىپ وتىرمىز. ياعني, ينۆەستور بۇرىنعىداي جەر تەلىمىنە, قۇرىلىسقا رۇقسات الۋ ءۇشىن باسقارمالاردىڭ ەسىگىن توزدىرمايدى. ءتىپتى «بيزنەستىڭ جول كارتاسى-2020» باعدارلاماسىنا قوسۋدى دا ءوز جاۋاپكەرشىلىگىمىزگە الامىز. ويتكەنى قاعازباستىلىققا كەتكەن ەسىل ۋاقىت پەن قولدان جاسالاتىن توسقاۋىلدار كەسىرىنەن كوپتەگەن بيزنەس باستالماي جاتىپ توقتايدى. ال «استانا» اكك ءوز قۇزىرەتى شەڭبەرىندە ونداي ماسەلەلەردى وڭتايلى شەشە الادى. ايتالىق, ەگەر بۇرىن كاسىپكەر جەر تەلىمىن الۋعا كەمىندە ءبىر-ەكى اي جۇمساسا, ءبىز ونى باس-اياعى ەكى اپتادا شەشىپ بەرە الامىز.
قالاعا قانداي
جوبالار قاجەت؟
الەمەتتىك ماڭىزى بار, كوممەرتسيالىق جوبالاردىڭ بارلىعىن قاراستىرۋعا دايىنبىز. ايتالىق, سول جاعالاۋدا جابىق بازار جوق. اۋقاتتىلار بولماسا, ءبىر جالاقىعا قاراپ وتىرعان كىرىسى ورتاشا وتباسىلاردىڭ «Gallmart, «رامستوردا» ساۋدا جاساۋدى قالتاسى كوتەرە بەرمەيدى. سوندىقتان قالانىڭ كىرەبەرىس جولىندا ەكى جەر تەلىمىن سايلاپ وتىرمىز: بىرەۋى – قورعالجىن تاس جولىنىڭ بويىندا, قازاق مەملەكەتتىك زاڭ ۋنيۆەرسيتەتىنىڭ ار جاعىندا, ەكىنشىسى – قوسشىنىڭ جولىندا, اۋەجايعا اپاراتىن جولايرىقتان ارمەن ورنالاسادى. سونىمەن قاتار, قالانىڭ ىسكەرلىك ورتالىقتارىنا كوپ قاباتتى پاركينگتەر اۋاداي قاجەت. ازىرگە ينۆەستورلار ءۇش جەردە: ينۆەستيتسيا جانە دامۋ مينيسترلىگى عيماراتى سىرتىنداعى الاڭقاي, «ماڭگىلىك ەل» جانە «ريتتس كارلتون» ماڭايىندا كوپ قاباتتى اۆتوتۇراق سالۋعا قىزىعۋشىلىق تانىتىپ جاتىر.
تۇرعىن ءۇي ماسەلەسىن شەشۋگە دە ءوز ۇلەسىمىزدى قوسقىمىز كەلەدى. ەگەر ينۆەستورلار قىزىعۋشىلىق تانىتسا, مەديتسينا جانە ءبىلىم سالاسى قىزمەتكەرلەرىنە, جاس وتباسىلارعا ارناپ قولجەتىمدى باعاعا جاتاقحانا سالۋ جوسپارىمىزدا بار. جالپى العاندا, قازىرگى تاڭدا «استانا» اكك 19 جوبانى جۇزەگە اسىرۋدى كوزدەپ وتىر. ونىڭ بەسەۋىنە جەر تەلىمى ءبولىندى, ونشاقتىسىنا ازىرلىك جۇمىسى ءجۇرىپ جاتىر.
جەر تەلىمى ءتيىمدى
شارتپەن بولىنەدى
– ايتا كەتەرلىگى, «استانا» اكك جوعارىداعى جوبالاردى كاسىپكەرلەرمەن بىرلەسكەن قىزمەت تۋرالى كەلىسىمشارت جاساسۋ نەمەسە بىرلەسكەن كاسىپورىن قۇرۋ ارقىلى جۇزەگە اسىرادى, – دەپ ءتۇسىندىردى ءمان-جايدى ايداربەك اسانۇلى. – بۇل جەردە كورپوراتسيانىڭ كەز كەلگەن بيزنەستەگى باستاپقى ۇلەسى – جەر تەلىمىنىڭ نارىقتىق باعاسىنا پارا-پار. ايتالىق, جەردىڭ نارىقتىق قۇنى شارتتى تۇردە 200 مىڭ دوللار دەلىك. ەگەر كاسىپكەر بازار قۇرىلىسىنا
2 ملن دوللار سالسا, كاسىپورىنداعى ءبىزدىڭ ۇلەس 10 پايىزى عانا بولادى. بىراق ءبىز بيزنەستى باسقارۋعا ارالاسپايمىز.
سىرىن بىلمەيتىن كاسىپتەن سىرت اينالعانىمىز دۇرىس. ەسەسىنە, «استانا» اكك جەر تەلىمىنە ينۆەستور تاڭداعان كەزدە, بيزنەستىڭ الەۋمەتتىك جاۋاپكەرشىلىگىنە ساي بولۋىن دا تالاپ ەتەدى. مىسالى, ەگەر بازار سالسا, ونىڭ قاسىندا بالالار وينايتىن الاڭ مىندەتتى تۇردە بولۋى كەرەك دەگەندەي. ەكىنشىدەن, ءبىز كەز كەلگەن بيزنەستەگى ۇلەسىمىزدى ءۇش جىلدان كەيىن ساتامىز. قۇر جەردەن گورى بيزنەستەگى «ەنشى» الدەقايدا قىمباتىراق بولادى. بۇل كەلىسىم بيزنەسكە دە ءتيىمدى. كاسىپكەر ۇلەسىن بيزنەسى اياققا تۇرعاننان كەيىن ساتىپ الۋعا مۇمكىندىك الادى. ەگەر ول كاسىپتى باستاماي جاتىپ جەرگە ءبىر, ونىڭ قۇرىلىسىنا ەكى شىعىندانسا, اينالىمعا اقشاسى قالماس ەدى. ءسويتىپ, بانكتەن قوسىمشا زاەم الۋعا ءماجبۇر بولار ەدى.
كوشە ساۋداسىنا –
كورنەكى دۇڭگىرشەكتەر
جەر تەلىمى, سونداي-اق, استانادا 2016 جىلى باستالعان «1000 ساۋدا ورنى» باعدارلاماسى اياسىندا جالعا بەرىلەدى. وسى ۋاقىتقا دەيىن 465 ۋچاسكە بويىنشا كەلىسىمشارت جاسالىپ, 600 ملن تەڭگەدەي ينۆەستيتسيا تارتىلدى جانە 843 جۇمىس ورنى پايدا بولدى. بىراق بيىل بىلتىرعىعا قاراعاندا جەر ۋچاسكەسىن ءبولۋ راسىمىنە ءبىراز وڭ وزگەرىستەر ەنگىزدىك. بىرىنشىدەن, بۇرىن كىمگە جالعا بەرۋ كەرەك, كىمگە بەرمەۋ كەرەك ەكەنىن كونكۋرستىق كوميسسيا شەشەتىن. قازىر ۋچاسكەنىڭ يەسى اۋكتسيون ارقىلى انىقتالادى. ياعني دۇڭگىرشەك اشىپ, كوشە ساۋداسىمەن اينالىسقىسى كەلەتىن جەكە كاسىپكەرلەر ءبىر بولمەگە جينالادى دا, ارقايسىسى ءوزى لايىق دەپ تاپقان باعاعا داۋىس بەرەدى. «نەگە اناۋ الىپ كەتتى, نەگە مەن الماي قالدىم؟» دەگەن الاۋىزدىقتىڭ الدىن الۋ ءۇشىن وسىلاي ءىستەدىك. ءبىرىنشى اۋكتسيون قىركۇيەك ايىندا ءوتتى. ەلۋ شاقتى ورىندى جالعا بەردىك.
ەكىنشىدەن, بۇرىن ساۋدا ورنىن ساۋلەت جانە قالا قۇرىلىسى باسقارماسى انىقتايتىن. ولار وعان ارحيتەكتۋرالىق انسامبل تۇرعىسىنان قاراۋى مۇمكىن, بىراق قاي جەر ءوتىمدى ەكەنىن قايدان بىلەدى؟ بىلتىرعى جەر ءبولىنىسى بويىنشا كاسىپكەرلەر تاراپىنان وسىعان قاتىستى كوپ سىن ايتىلدى. سوندىقتان ساۋدا ورىندارىن انىقتاعاندا, كاسىپكەرلەردىڭ دە پىكىرىنە قۇلاق اسامىز. ءدال وسىنداي جولمەن, 90 ميلليون تەڭگەدەي ينۆەستيتسيا تارتىپ, ەلۋ ءمودۋلدى ساۋدا پاۆيلوندارىن اشۋدى جوسپارلاپ وتىرمىز. وندا نەگىزىنەن كۇندەلىكتى قاجەت ازىق-تۇلىك, جەمىس-جيدەك پەن كوكونىس ساتىلادى. ايتا كەتەرلىك جايت, جەر ۋچاسكە-
ءسىنىڭ جالدىق اقىسى نارىق-
تىق باعادان الدەقايدا ارزان. مىسالى, ءبىر شارشى مەترىنە جىلىنا ەڭ كوپ دەگەندە 25 مىڭ تەڭگە تولەيسىز. مەنىڭشە, بۇل قىمبات ەمەس. ال ساۋدا ورىندارىن بىرىڭعاي ديزاين-ۇلگىمەن جاساۋ تالاپ ەتىلەدى. وعان شامامەن 1 ملن 1,5 ملن تەڭگە كەتەدى. كىمگە تاپسىرىس بەرىپ جاساتامىن دەسەڭىز دە ءوز ەركىڭىز. تەك نورماسىن ساقتاساڭىز بولعانى. ال ەگەر ءسىز بىرىڭعاي برەندتى دامىتقىڭىز كەلسە, وندا ساۋلەت جانە قالا قۇرىلىسى باسقارماسىنان رۇقساتنامانى ءوزىڭىز رەتتەۋگە تۋرا كەلەدى.
سپورت جانە
مادەنيەت نىساندارى مەنەدجمەنتى
«استانا» الەۋمەتتىك-كاسىپكەرلىك كورپوراتسياسىنا تاياۋدان بەرى سپورت جانە مادەنيەت نىساندارى سەنىمدى باسقارۋعا بەرىلە باستادى. «بارىس-ارەنا» جانە «قازاقستان» سپورت كەشەنى بىزگە قارادى. ەندىگى كەزەكتە «استانا-
ارەنا», «الاۋ» مۇز ايدىنى, بەيبىتشىلىك جانە كەلىسىم سارايى, «جاستار» سارايى جانە «كونگرەسس-حولدى» قاراماعىمىزعا الۋ جونىندە كەلىسسوزدەر جۇرگىزىلىپ جاتىر. ءبىزدىڭ باستى مىندەتىمىز – اتالمىش نىساندارعا كەتەتىن بيۋدجەت شىعىنىن ازايتىپ, كوممەرتسيالاندىرۋ جولدارىن قاراستىرۋ. ونى قالاي جۇزەگە اسىرماقپىز؟ بىزدىڭشە, پايدانىڭ كوزى – يۆەنت-بيزنەستە. ايتالىق, بەيونسە سياقتى ايگىلى انشىلەر تۋرنە جاساعاندا, ماسكەۋ مەن كيەۆكە كەلەدى دە, بىزگە سوقپاستان كىلت بۇرىلىپ, تىكە دۋبايعا تارتادى. ال مەملەكەت ميلليون قارجى جۇمساپ سالعان سپورتتىق ءھام مادەني نىساندار كوبىنەسە قاڭىراپ بوس تۇرادى. سول سەبەپتى, ەنشىلەس باسقارۋشى كومپانيا قۇرىپ, جەتەكشىلىگىنە يۆەنت-مەنەدجمەنت پەن سپورتتىق, مادەني نىساندار مەنەدجمەنتىنە ابدەن ماشىقتانعان شەتەلدىك ماماندى شاقىرماق ويىمىز بار.
P.S: جوعارىدا ايتىلعاندار – «استانا» اكك اتقاراتىن شارۋالاردىڭ ءبىر پاراسى. ايداربەك قوجانازاروۆتىڭ ايتۋىنشا, قۇرىلعانىنا بيىل 19 قازاندا جەتى جىل تولعان كورپوراتسيا بۇعان دەيىن ازىق-تۇلىك باعاسىن تۇراقتاندىرۋ, وتاندىق ءوندىرىستى قولداۋ باعىتىندا بىرنەشە جوبالاردى جولعا قويدى. قازىر كومپانيانىڭ قۇزىرەتى ءبىرشاما كەڭەيدى. «استانا يننوۆەيشن», «استانا ينۆەست», «كونۆەنشن بيۋرو» سەكىلدى مەكەمەلەرىمەن بىرلەسىپ, اۋقىمدى ينۆەستيتسيالىق جوبالارعا ارىپتەستىك تانىتۋعا قاشان دا ءازىر.
جازىپ العان ادىلبەك جاپاق
