تورتكۇل دۇنيەنى تورىنە شىعارعان استانامىزعا اعىلعان حالىقتىڭ قاراسى قالىڭ. وسىدان ون ءۇش كۇن بۇرىن ەكسپو-عا كەلگەن ميلليونىنشى كەلۋشىنى جارىسا جازىپ ەدىك. اراعا از ۋاقىت سالىپ, وعان 500 مىڭ ادام قوسىلدى. كۇنى كەشە حالىقارالىق كورمەگە ءبىر جارىم ميلليونىنشى كەلۋشى تىركەلدى.
كورمە قالاشىعىنا قاشان بارساڭىز دا, بيلەت كاسسالارىنداعى ۇزىن-سونار كەزەكتىڭ كۋاسى بولاسىز. اسىرەسە, سوڭعى بەس كۇندە كەلۋشىلەردىڭ سانى كۇرت وسكەن. 17-23 شىلدە ارالىعىندا كورمەگە 285 300 ادام كەلىپتى. بۇل دەگەنىڭىز ورتا ەسەپپەن العاندا كورمەگە كۇنىنە 40 757 ادام كەلدى دەگەن ءسوز. كورمەنىڭ العاشقى كۇندەرىندە ورتا ەسەپپەن 23 مىڭ ادام كەلگەن بولسا, 10 ماۋسىم مەن 23 شىلدە ارالىعىنداعى كەلۋشىلەردىڭ سانى 1 484 300-گە جەتكەن.
ال كەلۋشىلەر ەڭ كوپ باراتىن پاۆيلونداردىڭ قاتارىندا «نۇر الەم» كوش باستاپ تۇر. سونداي-اق افريكا, مىسىر جانە ينديا, رەسەي, تۇركيا, جاپونيا, ساۋد ارابياسى, وزبەكستان, تايلاند جانە تۇرىكمەنستان ەلدەرى دە قىزىقتى پاۆيلونداردىڭ قاتارىنا جاتادى.
ەستەرىڭىزگە سالا كەتەيىك, كورمەنىڭ تىركەۋ قۇجاتتاماسىندا ەكسپو-2017-گە 2 ميلليون ادام كەلەدى جانە كورمە نىساندارىندا جالپى سانى 5 ميلليونعا جۋىق كەلۋشى تىركەلەدى دەپ جوسپارلانعان ەدى.
گۇلجان راحمان
