استانادا قازاقستان-قىتاي اگرارلىق-ينۆەستيتسيالىق فورۋمى ءوتتى. اتالعان باسقوسۋعا ەكى جاقتىڭ بيزنەس, ءبىلىم بەرۋ جانە عىلىم سالاسىنىڭ 100-دەن استام وكىلدەرى قاتىستى.
سونداي-اق, س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە قازاقستان-قىتاي بيولوگيالىق قاۋىپسىزدىك زەرتحاناسىنىڭ ىرگەتاسى قالاندى. ءىس-شاراعا قر اۋىل شارۋاشىلىعى ءمينيسترىنىڭ ورىنباسارى گ.يساەۆا, قحر اۋىل شارۋاشىلىعى مينيسترلىگىنىڭ دەپارتامەنت ديرەكتورى ما يۋ تساي, حاربين ۆەتەرينارلىق زەرتتەۋ ينستيتۋتىنىڭ پروفەسسورى جيگاو بۋ, «س.سەيفۋللين اتىنداعى قازاق اگروتەحنيكالىق ۋنيۆەرسيتەتى» اق باسقارما توراعاسىنىڭ مىندەتىن اتقارۋشى ا.ءابدىروۆ قاتىستى.
اتالعان جوعارى وقۋ ورنى سولتۇستىك-باتىس اۋىل جانە ورمان شارۋاشىلىق ۋنيۆەرسيتەتىمەن بىرلەسكەن اگروتەحنيكالىق پارك اشۋعا جانە قىتايلىق كارتوپ ءوسىرۋشى XISEN كومپانياسىمەن كارتوپ وسىرۋگە ارنالعان تاجىريبەلىك شارۋاشىلىق قۇرۋعا كەلىسىم-شارت جاسادى. زەرتحانادا س.سەيفۋللين اتىنداعى قازاق اگروتەحنيكالىق ۋنيۆەرسيتەتى حاربين ۆەتەريناريالىق زەرتتەۋ ينستيتۋتى مەن شىنجاڭ اگرارلىق ۋنيۆەرسيتەتىندەگى ارىپتەستەرىمەن بىرگە جانۋارلار اۋرۋى بويىنشا زەرتتەۋ جۇمىستارىن جۇرگىزەدى. ايتجان ءابدىروۆتىڭ ايتۋىنشا, مۇنداي زەرتتەۋلەر ءتورت تۇلىك مالدى جاپپاي قىرىلۋدان ساقتايدى.
– زەرتحانا ماماندارى جانۋارلار مەن قۇستار اۋرۋىنىڭ الدىن الىپ, ازىق-تۇلىك پەن مال ونىمدەرىنىڭ زەرتحانالىق زەرتتەۋىن جۇرگىزەدى. ول قازاقستانداعى مال اۋرۋلارىن دياگنوستيكالاۋ مەن الدىن الۋ جانە ازىق-تۇلىك ونىمدەرىن سىناۋ سالاسىنداعى جەتەكشى مەكەمەلەردىڭ ءبىرى بولۋعا ءتيىستى. سوندا ءبىز قىتاي ەلىمەن شەكارالاس ايماقتاردىڭ بيولوگيالىق قاۋىپسىزدىگىن قامتاماسىز ەتىپ, قىتايعا شىعارىلاتىن ەت ەكسپورتىن رەتكە كەلتىرەمىز, – دەدى ول.
ال ما يۋ تساي عىلىم مەن مامان دايىنداۋ سالاسىنداعى تىعىز ىنتىماقتاستىق ءۇشىن س.سەيفۋللين اتىنداعى قازاق اگروتەحنيكالىق ۋنيۆەرسيتەتىنە العىس ءبىلدىردى.
زەرتحانا قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىندا بەكىتىلگەن كەلىسىمدى جانە قىتاي اۋىل شارۋاشىلىق عىلىمدار اكادەمياسى, شىنجاڭ اگرارلىق ۋنيۆەرسيتەتى, حاربين ۆەتەريناريالىق زەرتتەۋ ينستيتۋتى مەن س.سەيفۋللين اتىنداعى قازاق اگروتەحنيكالىق ۋنيۆەرسيتەتى اراسىنداعى ءوزارا ءتۇسىنىستىك تۋرالى مەموراندۋمدى ىسكە اسىرۋ ماقساتىندا قۇرىلىپ وتىر.
سەرىك جولداسباي
