جۋىردا استانا قالاسىنىڭ اكىمى جەڭىس قاسىمبەك پەن استانا ءماسليحاتىنىڭ توراعاسى ەرلان كاناليموۆ ەلوردا ارداگەرلەر كەڭەسىنىڭ پلەنۋمىنا قاتىستى. بۇل تۋرالى ەرلان كاناليموۆ ءوزىنىڭ الەۋمەتتىك جەلىدەگى پاراقشاسىندا جازدى.
«بۇگىنگى تاڭدا استانادا 100 مىڭنان استام زەينەتكەر, سونىڭ ىشىندە 10 ۇوس ارداگەرى, 1544 تىل ەڭبەككەرى تۇرادى. ەلوردامىزدىڭ قارت تۇرعىندارى ءۇشىن قازىرگى تاڭدا ءومىر ءسۇرۋ ساپاسىن ارتتىرۋ باعىتىندا كەشەندى ءىس-شارالار جۇزەگە اسىرىلۋدا. بەلسەندى ۇزاق ءومىر ءسۇرۋ, سونداي-اق الەۋمەتتىك قىزمەت كورسەتۋ ورتالىقتارى اشىلۋدا. استانا قالاسىنىڭ اكىمىمەن بىرگە قالالىق ارداگەرلەر كەڭەسى پلەنۋمىنىڭ جۇمىسىنا قاتىستىق. كەزدەسۋدە ارداگەرلەر ۇيىمىنىڭ استانا قالاسىنىڭ ماسليحاتىمەن جانە اكىمدىگىمەن سانيتارلىق-كۋرورتتىق ەمدەۋ, ءتىس پروتەزدەۋ قىزمەتىن كورسەتۋ, تۇرعىن ۇيلەردى گازداندىرۋ, وتىن ساتىپ الۋ كەزىندە الەۋمەتتىك كومەك تاعايىنداۋ, جەڭىس كۇنى مەن قارتتار كۇنىنە بىرجولعى تولەمدەر ماسەلەلەرىنە قاتىستى جەمىستى ىنتىماقتاستىعىمىز اتاپ ءوتىلدى. دەپۋتاتتاردىڭ ارداگەرلەر كەڭەسىمەن بىرلەسكەن جۇمىسى ودان ءارى جەمىستى جالعاساتىنىن اتاپ وتكىم كەلەدى» دەدى قالالىق ءماسليحات توراعاسى.
