دوستىق ۇيىندە «حالىقتىڭ ءال-اۋقاتىنىڭ ارتۋى – بىرلىك پەن تۇراقتىلىق كەپىلى» دەگەن تاقىرىپتا نۇر-سۇلتان قالالىق قازاقستان حالقى اسسامبلەياسىنىڭ XVIII قۇرىلتايى ءوتتى. ءىس-شاراعا قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ, مەملەكەتتىك ورگاندار, ەتنومادەني بىرلەستىك وكىلدەرى, نۇر-سۇلتان قالاسى قازاقستان حالقى اسسامبلەياسى عىلىمي-ساراپشىلىق توبىنىڭ, قوعامدىق كەلىسىم كەڭەسىنىڭ, انالار كەڭەسىنىڭ مۇشەلەرى قاتىستى.
سەسسيا بارىسىندا اسسامبلەيا قىزمەتى ءبىرىنشى جارتىجىلدىعىنىڭ قورىتىندى ناتيجەلەرى جاريالاندى. پرەزيدەنتتىڭ «ساباقتاستىق. ادىلدىك. ورلەۋ» اتتى سايلاۋالدى باعدارلاماسىنا ارنالعان جوسپاردى ىسكە اسىرۋ ماسەلەسى, سونداي-اق تۇركىستان وبلىسىنىڭ ارىس قالاسىنا كومەك كورسەتۋ ماسەلەلەرى تالقىلاندى. باسقوسۋدا نۇر-سۇلتان قالاسىنىڭ اكىمى, ەلوردالىق قازاقستان حالقى اسسامبلەياسىنىڭ توراعاسى التاي كولگىنوۆ بايانداما جاسادى. ءبىرىنشى جارتىجىلدىقتىڭ قورىتىندىلارىنا توقتالعان قالا باسشىسى قايىرىمدىلىق, مەدياتسيا, جاستار ساياساتى جانە ت.ب. باعىتتاردا تابىستى جۇمىس اتقارعان ەلوردالىق قحا-نىڭ جاعىمدى ديناميكاسىن اتاپ ءوتتى. «ەلباسى باستاعان ىستەردى جالعاستىرىپ, پرەزيدەنتتىڭ جاڭا باستامالارىن ىسكە اسىرۋ جولىندا بىرىگىپ ەڭبەك ەتەتىنىمىزگە سەنىمدىمىن» دەدى التاي سەيدىرۇلى.
130 ەتنوستىڭ قۇتتى مەكەنى
ەلوردا اكىمى پرەزيدەنت سايلاۋىندا بەلسەندى ازاماتتىق ۇستانىمىن كورسەتە بىلگەن ەلوردالىق اسسامبلەيانىڭ جەتىستىكتەرىن دە تىلگە تيەك ەتتى. قازىر ءتور قالادا 130-دان اسا ەتنوس وكىلدەرى ءومىر سۇرەدى. 23 ەتنومادەني بىرلەستىكتەر, 12 جەكسەنبىلىك مەكتەپتەر جەمىستى جۇمىس ىستەيدى. جۋىردا ەلوردالىق ەتنومادەني بىرلەستىكتەردىڭ 5 شىعارماشىلىق ۇجىمى «حالىقتىق» دەگەن اتاۋعا يە بولدى. دوستىق ءۇيى ءبىر جىلدا ءوز قالاسىنا پايداسىن تيگىزەتىن جاڭاشىل, باستاماشىل, جىگەرلى جانداردىڭ ورداسىنا اينالدى. مىسالى, 2019 جىلدىڭ باسىندا اشىلعان «پاراسات» قايىرىمدىلىق قىزمەتتى ۇيلەستىرۋ ورتالىعى 73 ءىس-شارا وتكىزىپتى. مۇقتاج جاندارعا 16 ملن تەڭگە كولەمىندە كومەك كورسەتىلگەن. اسسامبلەيا مۇشەلەرى ارىستاعى اپاتتان زارداپ شەككەندەرگە كومەك بەرۋگە قۇلشىنا كىرىستى. دوستىق ءۇيىندەگى گۋمانيتارلىق كومەك نۇكتەسى الداعى ۋاقىتتا ارىستىقتارعا جاردەم بەرۋدى جالعاستىرادى.
جاستار كوۆوركينگ ورتالىعى اشىلادى
قالا باسشىسى نۇر-سۇلتان جاستاردىڭ قالاسى ەكەنىنە توقتالا كەلە, ەلوردا جاستارىنا قاتىستى جۇزەگە اسىرىلاتىن ءىس-شارالاردى باياندادى. جاستار جىلىندا استانالىق قازاقستان حالقى اسسامبلەياسىنىڭ جاستار قاناتىن دامىتۋعا ەرەكشە كوڭىل ءبولۋدى ۇسىندى. ماسەلەن, دوستىق ۇيىندە زاماناۋي تەحنولوگيالاردى پايدالانا وتىرىپ, جاستار كوۆوركينگ ورتالىعىن اشۋ جوسپارلانعان. «بۇل ورتالىق تەك اسسامبلەيالىق قانا ەمەس, بۇكىل ەل جاستارىن دامۋعا جەتەلەيتىن جاڭا يدەيالاردىڭ ورداسىنا اينالۋى ءتيىس. قازىردىڭ وزىندە دوستىق ۇيىندە مەملەكەتتىك ءتىلدى مەڭگەرۋگە, شىعارماشىلىق ۇجىمداردىڭ دايىندىق جاساۋىنا, مەدياتسيالىق راسىمدەردى جانە ءارتۇرلى شارالاردى وتكىزۋگە وتە قولايلى جاعدايلار تۋعىزىلعان. مۇنىڭ ءبارى قالالىق اسسامبلەيا مۇشەلەرىن جاۋاپتى جانە ءونىمدى ەڭبەك ەتۋگە مىندەتتەيدى» دەپ اتاپ ءوتتى ا. كولگىنوۆ.
قالا اكىمى اسسامبلەيانىڭ, جالپى قوعامنىڭ الدىندا تۇرعان مىندەتتەردى جۇزەگە اسىرۋدا عىلىمي-ساراپتامالىق توپتىڭ الەۋەتىن ءتيىمدى پايدالانۋدى تاپسىردى. دوستىق ءۇيىنىڭ بازاسىندا مادەني ورتالىقتار جەتەكشىلەرىن ەتنوبىرلەستىكتەردى زاماناۋي باسقارۋ تەتىكتەرىنە جۇيەلى وقىتۋ, سونىڭ ىشىندە كەلىسسوزدەر ۇدەرىسىن مەڭگەرتۋ اسا ماڭىزدى ەكەنىن قاداپ ايتتى. اسىرەسە, مەدياتسيا مەحانيزمىن كەڭىرەك پايدالانعان ابزال. رەسمي مالىمەت بويىنشا قازىرگى كەزدە اسسامبلەيانىڭ ەلوردادا 5 مەدياتسيا بولمەلەرى جۇمىس ىستەيدى. باسقوسۋدىڭ سوڭىندا جيىنعا قاتىسۋشىلار ارنايى قارار قابىلدادى.
