كەشە ورتالىق كوممۋنيكاتسيالار قىزمەتىنىڭ الاڭىندا نۇر-سۇلتان قالاسى اكىمىنىڭ ورىنباسارى ەرلان كاناليموۆ ءباسپاسوز ءماسليحاتىن وتكىزدى.
– ارىستاعى اپاتتى وقيعا بارشا قازاقستاندىقتاردىڭ جۇرەگىنە اۋىر ءتيدى. وسى وقيعاعا بايلانىستى سوڭعى ەكى-ءۇش كۇندە رەسپۋبليكا تۇرعىندارىنىڭ بىرلىگى, تۇتاستىعى, مەيىرىمدىلىگى, قايىرىمدىلىعى كورىندى, – دەپ باستادى جۋرناليستەرمەن كەزدەسۋىن ەلوردا باسشىسىنىڭ ورىنباسارى.
ەرلان كاناليموۆ ارىس قالاسىندا ورىن العان جاعدايعا وراي نۇر-سۇلتان قالاسى اكىمدىگى تاراپىنان, سونداي-اق ەلوردانىڭ قاراپايىم تۇرعىندارى باستاماسىمەن اتقارىلىپ جاتقان شارالاردى بايانداپ بەردى. بىرىنشىدەن, قالا اكىمىنىڭ ورىنباسارى نۇرلان نۇركەنوۆ باستاپ بارعان استانالىق قۇرىلىسشىلار ارىس قالاسىنداعى قيراعان, زاقىمدالعان نىسانداردى جوندەۋگە كىرىسىپ كەتكەن. قازىر مۇندا 15 بريگادا جۇمىس جۇرگىزۋدە, ولار 9-ىنشى سەكتوردا بەلگىلەنگەن مەكتەپ, بالاباقشا جانە تۇرعىن ۇيلەردى قالپىنا كەلتىرىپ جاتىر. سونىمەن قاتار ەلورداداعى مەملەكەتتىك مەكەمەلەر مەن كاسىپورىندار ۇجىمدارى ءبىر كۇندىك جالاقىلارىنان 200 ميلليون تەڭگە جيناپ, ارىس تۇرعىندارىنا كومەك رەتىندە جىبەرىپ, قايىرىمدىلىق تانىتقان. «ارىس. ءبىز بىرگەمىز!» جالپىرەسپۋبليكالىق اكتسياسىنا دا استانالىقتار بەلسەندى قاتىسىپ جاتىر. قازىر قالادا كومەك كورسەتۋگە ارنالعان 5 نۇكتە ىسكە قوسىلعان. قاراپايىم تۇرعىندار مەن كاسىپكەرلەردىڭ كومەگىمەن 160 تونناعا جۋىق ازىق-تۇلىك, كيىم-كەشەك, باسقا دا تۇرمىسقا قاجەتتى زاتتار 8 كولىككە تيەلىپ, ارىسقا جىبەرىلدى.
– قايىرىمدىلىق ىسكە قوسىلعان, مەيىرىمدىلىك تانىتقان بارشا ەلوردالىقتارعا قالا اكىمىنىڭ, ارىپتەستەرىمنىڭ اتىنان ۇلكەن ريزاشىلىعىمدى بىلدىرەمىن, – دەدى ە.كاناليموۆ.
ارىس وقيعاسى, اسىرەسە, بالالار ءۇشىن وتە اۋىر تيگەنى ءسوزسىز. سوندىقتان نۇر-سۇلتان قالاسىنىڭ اكىمدىگى 500 ارىستىق بالانى بۇگىننەن باستاپ ەلوردادا قابىلداپ, ولارعا رۋحاني جانە پسيحولوگيالىق تۇرعىدا دەمەۋ كورسەتپەك. اتاپ ايتقاندا, بالالار ءۇشىن ەكسكۋرسيالار ۇيىمداستىرىلادى, قونتسەرتتەرگە بارادى. ەلوردا كۇنىنە ارنالعان مەرەكەلىك شارالاردى دا تاماشالايتىن بولادى.
ءباسپاسوز ءماسليحاتى بارىسىندا ەرلان كاناليموۆ نۇر-سۇلتان قالاسى اكىمدىگى تاراپىنان حالىقتى الەۋمەتتىك تۇرعىدان قورعاۋ بويىنشا اتقارىلىپ جاتقان جۇمىستار جونىندە دە ەگجەي-تەگجەي
بايانداپ ءوتتى. سونداي-اق جاقىنداپ قالعان ەلوردا كۇنى مەرەكەسى تۋرالى دا مالىمەت بەردى. بيىلعى مەرەكەلىك شارالار ىقشامدالىپ وتكىزىلەتىنىن, قازاقستان جانە رەسەي جۇلدىزدارىنىڭ قاتىسۋىمەن وتەتىن اۋقىمدى ءىس-شارالاردىڭ قىسقارتىلعانىن جەتكىزدى. مەرەكە, نەگىزىنەن, اسپان اياسىندا, ساياباقتار مەن الاڭقايلاردا ۇيىمداستىرىلاتىن بولادى. كوپتەگەن سپورتتىق جارىستار مەن ونەر بايقاۋلارى وتەدى.
– ەلوردا كۇنى ءبىر قالانىڭ عانا مەرەكەسى ەمەس, بۇل – بۇكىل رەسپۋبليكامىزدىڭ مەرەكەسى, بۇرىننان ايتىپ جۇرگەنىمىزدەي, ەلوردا تويى – ەلدىڭ تويى. جالپى, 100-گە جۋىق ءىس-شارا بەلگىلەنىپ وتىرسا, سونىڭ 73-ىنە تەگىن بارۋعا بولادى. سوندىقتان ءداستۇرلى مەرەكەمىز جالعاساتىن بولادى, – دەپ اتاپ ءوتتى
ە.كاناليموۆ جۋرناليستەر سۇراعىنا بەرگەن جاۋابىندا.
