مەملەكەت باسشىسى قاسىم-جومارت توقاەۆ ىشكى ىستەر ءمينيسترى مارات احمەتجانوۆتى قابىلدادى. پرەزيدەنتكە ۆەدومستۆونىڭ بىلتىر اتقارعان جۇمىسى مەن الداعى كەزەڭگە ارنالعان جوسپارى جونىندە ەسەپ بەرىلدى.
مەملەكەت باسشىسىنا قۇقىقبۇزۋشىلىقتاردىڭ الدىن الۋ ءۇشىن قابىلدانىپ جاتقان شارالار تۋرالى باياندالدى. بۇل شارالار ەلىمىزدە كىسى ءولتىرۋ قىلمىستارىنىڭ سانىن ايتارلىقتاي ازايتۋعا ىقپال ەتتى. سونداي-اق ۇرلىققا جانە مال ۇرلىعىنا قاتىستى قىلمىستاردى اشۋ جۇمىستارى كۇشەيتىلدى.
مارات احمەتجانوۆتىڭ ايتۋىنشا, ۇيىمداسقان قىلمىستىڭ شىعۋ سەبەپتەرى مەن قارجىلاندىرۋ كوزدەرىن جويۋعا باسىمدىق بەرە وتىرىپ, ولارعا قارسى كۇرەس تاسىلدەرىن وزگەرتۋ ناتيجەسىندە ۇيىمداسقان قىلمىستىق توپتاردىڭ (ۇقت) 24 باسشىسى مەن 114 مۇشەسى تۇتقىندالدى.
پرەزيدەنتكە كيبەرقىلمىسپەن كۇرەسۋ ءۇشىن قابىلدانىپ جاتقان شارالار تۋرالى دا باياندالدى. ينتەرنەت-الاياقتىققا قارسى ءىس-ارەكەت جونىندەگى كەشەندى شارالاردى جۇزەگە اسىرۋ بارىسىندا ۇيالى بايلانىس كومپانيالارى «اۋىسپالى» نومىرلەردەن شالىنعان 5,5 ميلليون قوڭىراۋدى بۇعاتتاعان. مينيسترلىك التى ۇيىمداسقان قىلمىستىق توپتى جويىپ, الاياقتىق بەلگىلەرى بار 165 سايتتىڭ جۇمىسىن توقتاتتى.
سونىمەن قاتار ىشكى ىستەر مينيسترلىگى باسقا قۇقىق قورعاۋ جانە ارناۋلى ورگاندارمەن بىرلەسىپ, 2781 ەسىرتكى قىلمىسىن انىقتادى. زاڭسىز اينالىمنان 15 توننادان استام ەسىرتكى تاركىلەنىپ, 70 ەسىرتكى زەرتحاناسى جويىلدى جانە ەسىرتكى جارنامالايتىن 1990 سايت بۇعاتتالدى.
كەزدەسۋ سوڭىندا مەملەكەت باسشىسى تۇرمىستىق زورلىق-زومبىلىقتىڭ, ينتەرنەت-الاياقتىقتىڭ, اۋىلدىق جەرلەردەگى قىلمىستىڭ كەز كەلگەن كورىنىسى بويىنشا الدىن الۋ شارالارىن قابىلداۋدىڭ جانە جەدەل ارەكەت ەتۋدىڭ ماڭىزدى ەكەنىن اتاپ ءوتتى. پرەزيدەنت بۇل باعىتتا ۇيىمداستىرۋ جۇمىستارىن جۇرگىزىپ, زاڭنامالىق شارالار قابىلداۋدى تاپسىردى. سونداي-اق ۆەدومستۆو باسشىسىنا ەلىمىزدە جول قاۋىپسىزدىگى مەن قۇقىقتىق ءتارتىپتى قامتاماسىز ەتۋ جونىندە بىرقاتار مىندەت جۇكتەدى.
