مەملەكەت باسشىسى قارجىلىق مونيتورينگ اگەنتتىگىنىڭ توراعاسى جانات ەليمانوۆتى قابىلدادى. قاسىم-جومارت توقاەۆقا ءوزارا باعالاۋ كورسەتكىشىنىڭ ەكىنشى كەزەڭىن فاتف حالىقارالىق ستاندارتتارىنا سايكەستەندىرۋگە قاتىستى قازاقستاننىڭ دايىندىعى جونىندە باياندالدى. اگەنتتىك توراعاسى پرەزيدەنتكە تاۋەكەلدەر بويىنشا جاسالعان ۇلتتىق باعالاۋدىڭ قورىتىندىلارى جانە فاتف-تىڭ بىرقاتار ماڭىزدى ۇسىنىمىن ۇلتتىق زاڭناماعا ەنگىزۋگە مۇمكىندىك بەرەتىن زاڭ جوباسى پارلامەنتتىڭ قاراۋىندا جاتقانى تۋرالى ايتتى.
پرەزيدەنت قىلمىستىق جولمەن تۇسكەن تابىستاردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل بويىنشا جۇرگىزىلىپ جاتقان جۇمىستاردى وڭ باعالادى. اتاپ ايتقاندا, قابىلدانعان شارالار كىرىستەردى جىلىستاتۋعا قارسى ءىس-قيمىلداردىڭ Basel AML Index يندەكسى بويىنشا الەمدىك رەيتينگتەگى قازاقستاننىڭ ورنىن جاقسارتتى.
مەملەكەت باسشىسىنا ەلىمىزدەگى كولەڭكەلى ەكونوميكاعا قارسى كۇرەستىڭ قازىرگى جاعدايى تۋرالى مالىمەت بەرىلدى. سوتقا دەيىنگى تەرگەپ-تەكسەرۋ جونىندە 490 ءىس قوزعالدى, ونىڭ 28-ءى جالعان شوت-فاكتۋرا جازىپ بەرۋمەن جانە قىلمىستىق جول ارقىلى قولما-قول اقشاعا اينالدىرۋمەن اينالىسقان تۇلعالارعا قاتىستى ۇيىمداسقان قىلمىستىق توپ قۇرۋ دەرەكتەرى بويىنشا جۇرگىزىلۋدە.
بۇدان بولەك, جانات ەليمانوۆ قاسىم-جومارت توقاەۆقا قارجى پيراميدالارىن جابۋ جونىندە جۇكتەگەن تاپسىرماسىنىڭ ىسكە اسىرىلۋ بارىسى تۋرالى باياندادى. جىل باسىنان بەرى قارجىلىق مونيتورينگ اگەنتتىگى 15 قارجى پيراميداسىنىڭ قىزمەتىن توقتاتىپ, زارداپ شەككەندەرگە 2,3 ميلليارد تەڭگە قايتارىلدى.
پرەزيدەنت اگەنتتىك باسشىسىنا قۇقىق قورعاۋ جانە باسقا دا مۇددەلى ورگاندارمەن بىرلەسە وتىرىپ, اتالعان باعىتتاعى جۇمىستاردى جانداندىرۋدى تاپسىردى. مەملەكەت باسشىسى ازاماتتاردى قارجى پيراميدالارىنا تارتۋعا جول بەرمەۋ ءۇشىن شارالار كەشەنىن قابىلداۋ كەرەك ەكەنىن ايتتى.
***
مەملەكەت باسشىسى قورعانىس ءمينيسترى مۇرات بەكتانوۆتى قابىلدادى. قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسىنا قارۋلى كۇشتەردىڭ بيىلعى اتقارعان قىزمەتىنىڭ نەگىزگى قورىتىندىلارى, ونىڭ ىشىندە ارميانى تەحنيكالىق تۇرعىدان قايتا جاراقتاندىرۋ بارىسى تۋرالى باياندالدى. قاسىم-جومارت توقاەۆقا مەملەكەتتىڭ اسكەري قاۋىپسىزدىگىن قامتاماسىز ەتۋگە جانە اسكەردىڭ 2030 جىلعا دەيىنگى قۇرىلىمىن قالىپتاستىرۋعا باعىتتالعان نەگىزگى قۇجاتتارعا قاتىستى جۇمىستاردىڭ اياقتالعانى جونىندە مالىمەت بەرىلدى.
بۇدان بولەك, مەملەكەت باسشىسىنا «قاۋىپسىز ەل» ۇلتتىق جوباسىنىڭ ازىرلەنۋى جانە بەكىتىلۋى جايىندا ايتىلدى. بۇل قۇجات شەتەلدەن قارۋ-جاراق پەن تەحنيكا ساتىپ الۋعا عانا ەمەس, سونداي-اق وتاندىق قارۋ-جاراق ۇلگىلەرىن ازىرلەۋگە, ينفراقۇرىلىمدى جەتىلدىرۋگە, اسكەردى تسيفرلاندىرۋعا بايلانىستى مىندەتتەردى شەشۋگە مۇمكىندىك بەرەدى. مۇرات بەكتانوۆتىڭ ايتۋىنشا, ۇلتتىق جوبانىڭ نەگىزگى ماقساتى – ازاماتتار مەن مەملەكەتتىڭ قاۋىپسىزدىگىن قامتاماسىز ەتۋ.
قورعانىس ءمينيسترى پرەزيدەنتكە قارۋ-جاراق پەن وق-دارىلەردىڭ قاۋىپسىز ساقتالۋىن قامتاماسىز ەتۋ شارالارى تۋرالى جانە قارۋلى كۇشتەردىڭ زاماناۋي سىن-تەگەۋرىندەر مەن قاۋىپ-قاتەرلەرگە توتەپ بەرۋگە ازىرلىگى جونىندە ەسەپ بەردى.
سونىمەن قاتار مۇرات بەكتانوۆ جوعارعى باس قولباسشىعا قازاقستان حالقىنا ارنالعان جولداۋدى ىسكە اسىرۋ جونىندەگى جالپىۇلتتىق جوسپاردىڭ ورىندالۋى تۋرالى باياندادى. سونداي-اق اسكەري دوكترينانى قايتا قاراۋعا جانە ەكونوميكانىڭ ناقتى سەكتورىنداعى سۇرانىسقا يە ماماندىقتاردى مەرزىمدى قىزمەتتەگى ساربازداردىڭ مەڭگەرۋىنە قاتىستى ماسەلەلەرگە جان-جاقتى توقتالدى.
كەزدەسۋ سوڭىندا پرەزيدەنت ەلىمىزدىڭ قورعانىس قابىلەتىن ودان ءارى ارتتىرۋعا باعىتتالعان بىرقاتار تاپسىرما بەردى.
