پرەزيدەنت قاسىم-جومارت توقاەۆ مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمگە قاتىستى. ول ءوز سوزىندە سالتاناتتى جيىنعا قاتىسۋشىلاردى قازاقستان تاۋەلسىزدىگىنىڭ 30 جىلدىعىمەن قۇتتىقتاپ, بۇل مەرەكەنىڭ ۇلت مەرەيىن وسىرەتىن ۇلىق مەيرام ەكەنىن اتاپ ءوتتى.
«ءبىز تاريح تۇرعىسىنان العاندا قىسقا مەرزىم ىشىندە جاڭا قازاقستاننىڭ نەگىزىن قالادىق. تۇعىرى بەرىك, ەكونوميكاسى قۋاتتى, بەدەلى بيىك مەملەكەتكە اينالدىق. مۇنىڭ ءبارى, ەڭ الدىمەن, ەلباسى نۇرسۇلتان ءابىشۇلى نازارباەۆتىڭ كورەگەن ساياساتىنىڭ جەمىسى. سونىمەن بىرگە بۇكىل حالقىمىزدىڭ ەرەن ەڭبەگىنىڭ ناتيجەسى. كەز كەلگەن حالىقتىڭ تابىسقا جەتۋى ازاماتتارىنا بايلانىستى. بۇل – ءومىردىڭ زاڭى. ادام كاپيتالى مىقتى مەملەكەت بارلىق قيىندىقتى ەڭسەرە الادى. تاۋەلسىزدىك كەزەڭىندە حالقىمىز ەلدىكتىڭ بىرەگەي ۇلگىسىن كورسەتتى. «ەڭبەك – ىرىستىڭ بۇلاعى, باقىتتىڭ شىراعى» دەپ بەكەر ايتىلماعان. شىن مانىندە, ءبىزدىڭ بۇگىنگى جەتىستىگىمىز – بارشا حالقىمىزدىڭ ورتاق جەڭىسى. جاڭا قازاقستاندى وركەندەتۋگە ازاماتتارىمىزدىڭ كوبى سۇبەلى ۇلەس قوستى. بۇگىنگى مەرەيلى ساتتە ەلىمىزدىڭ بارشا ازاماتتارىنا تاباندى ەڭبەگى ءۇشىن زور العىس ايتامىن» دەدى پرەزيدەنت.
قاسىم-جومارت توقاەۆ تاۋەلسىزدىكتىڭ 30 جىلدىعى كوپعاسىرلىق مەملەكەتتىلىگىمىزدىڭ ماڭىزدى كەزەڭى جانە زاماناۋي قازاقستان جىلناماسىنداعى ايتۋلى بەلەس ەكەنىنە توقتالدى. ونىڭ ايتۋىنشا, وسى جىلدار ىشىندە ەلىمىز زور جەتىستىكتەرگە قول جەتكىزگەن, كۇردەلى سىن-قاتەرلەردى ەڭسەرگەن ۇلكەن جولدان ءوتتى.
«ەل ازاماتتارىنىڭ باسىم كوپشىلىگى وزدەرىنىڭ قاجىرلى ەڭبەگىمەن قۋاتتى ءارى دامىعان مەملەكەت قۇرۋ ىسىنە ەلەۋلى ۇلەس قوسىپ كەلەدى. بۇگىن وزدەرىڭىزدى ماراپاتتاي وتىرىپ, قازاقستاندى كوركەيتۋگە ۇلەس قوسقان بارلىق ازاماتقا ريزاشىلىق بىلدىرەمىز. سىزدەر ناعىز وتانشىلدىقتىڭ, كاسىبي بىلىك پەن ادال ەڭبەكتىڭ وزىق ۇلگىسىن كورسەتتىڭىزدەر. وسكەلەڭ ۇرپاق وزدەرىڭىزگە قاراپ بوي تۇزەيدى. وسىدان ءبىر جىل بۇرىن مەن ۇلكەن مەرەيتويدى شۋسىز, داڭعازاسىز, ىسىراپسىز ناقتى جۇمىستارمەن اتاپ ءوتۋ قاجەتتىگى تۋرالى ايتتىم. تاۋەلسىزدىگىمىزدىڭ 30 جىلدىعىندا جاڭا, اۋقىمدى رەفورمالار قولعا الىندى. سوندىقتان بۇل جىلدى ناتيجەلى بولدى دەۋگە تولىق نەگىز بار. ءبىز ەكونوميكانى جانە الەۋمەتتىك سالانى جان-جاقتى جاڭعىرتىپ جاتىرمىز. ىندەتكە قاراماستان, مەملەكەت وتاندىق بيزنەسكە قولداۋ كورسەتۋدە» دەدى مەملەكەت باسشىسى.
«مەملەكەتتىك باسقارۋ جۇيەسىندە اۋقىمدى وزگەرىستەر بولدى. مەن حالىقتىڭ تۇرمىس ساپاسىن ارتتىرۋعا جانە ەلىمىزدىڭ باسەكەگە قابىلەتتىلىگىن كۇشەيتۋگە باعىتتالعان 10 ۇلتتىق جوبانى بەكىتتىم. قوعامدىق-ساياسي سالادا ەلەۋلى وزگەرىستەر جاسالۋدا. مەن ۇسىنعان ساياسي رەفورمالار توپتاماسى كەزەڭ-كەزەڭىمەن جۇزەگە اسىرىلىپ جاتىر. ءبىز تاۋەلسىز قازاقستان تاريحىندا العاش رەت اۋىل اكىمدەرىنىڭ تىكەلەي سايلاۋىن وتكىزدىك. بيىل ماۋسىم ايىندا ادام قۇقىقتارى سالاسىنداعى الداعى شارالار تۋرالى جارلىققا قول قويدىم. بۇل قۇجات قۇقىق قورعاۋ سالاسىن كەشەندى تۇردە جاڭعىرتۋعا باعىتتالعان. قوعامدىق ديالوگتى بىرتىندەپ دامىتۋ ءۇشىن ناقتى شارالار قولعا الىنىپ جاتىر. مۇنىڭ ءبارى ازاماتتارىمىزدىڭ شەشىم قابىلداۋ جانە مەملەكەتتىك باسقارۋ ىسىنە بەلسەنە قاتىسۋىنا جول اشادى. ءبىزدىڭ ماقساتىمىز – ءتيىمدى مەملەكەت جانە ادىلەتتى قوعام قۇرۋ. بۇل ستراتەگيالىق باعىت وزگەرمەيدى. الدىمىزدا حالىقتىڭ ءال-اۋقاتىن ودان ءارى ارتتىرۋ, قاسيەتتى تاۋەلسىزدىگىمىزدى نىعايتۋ جونىندەگى اۋقىمدى مىندەتتەر تۇر» دەدى قاسىم-جومارت توقاەۆ.
مەملەكەت باسشىسى پارلامەنتتىڭ قوس پالاتاسىنىڭ توراعالارىنا, پرەمەر-مينيسترگە جانە مەملەكەتتىك حاتشىعا تاۋەلسىزدىك كۇنى قارساڭىندا جەرگىلىكتى تۇرعىندارمەن كەزدەسۋ ءۇشىن ايماقتارعا بارىپ, ەڭبەگىمەن ەرەكشەلەنگەن ازاماتتارعا مەملەكەتتىك ناگرادالار تابىستاۋ جونىندە بەرگەن تاپسىرماسى تۋرالى ايتتى.
– بۇگىن ءبىر توپ قايراتكەرىمىز مەنىڭ جارلىعىممەن مەملەكەتتىك ماراپاتقا يە بولدى. بيىل ەلىمىزدىڭ ەڭ جوعارعى اتاعى كورنەكتى جازۋشى, دراماتۋرگ اكىم تارازيگە بەرىلدى. ول رۋحانياتىمىزدى دامىتۋعا جانە قوعامدىق كەلىسىمدى نىعايتۋعا ولشەۋسىز ۇلەس قوسىپ, «قازاقستاننىڭ ەڭبەك ەرى» اتاندى. كورنەكتى قالامگەردىڭ شىعارماشىلىق جولى جاس ۇرپاققا قاشان دا ۇلگى-ونەگە.
نۇر-سۇلتان قالاسىنداعى «كوپبەيىندى مەديتسينا ورتالىعىنىڭ» ديرەكتورى مۇحتار تولەۋتاەۆ «قازاقستاننىڭ ەڭبەك ەرى» اتاعىنا يە بولدى. ول باسقاراتىن اۋرۋحانا ۇجىمى پاندەميا باستالعاننان بەرى كوروناۆيرۋس جۇقتىرعان 15 مىڭ ادامدى ەمدەپ شىعاردى. قاتەرلى ىسىككە شالدىققان جاندارعا وسى مەكەمەدە بىلتىر 3 مىڭ وتا جاسالدى, 8 مىڭ ادام ناۋقاسىنان ايىقتى. وسى ورايدا, دارىگەرلەرىمىزدىڭ ەڭبەگى قانداي قۇرمەتكە دە لايىق.
بۇگىن ەڭبەك ارداگەرى, كورنەكتى مەملەكەت جانە قوعام قايراتكەرى, بەلگىلى عالىم مىرزاتاي جولداسبەكوۆ پەن تانىمال اقىن اقۇشتاپ باقتىگەرەەۆا جانە كورنەكتى جازۋشى ءسابيت دوسانوۆ «وتان» وردەنىمەن ماراپاتتالاتىن بولدى, – دەدى مەملەكەت باسشىسى.
سونىمەن قاتار مەملەكەت باسشىسى تاعى باسقا كوپتەگەن ازاماتتارعا مەملەكەتتىك ماراپاتتار تاپسىردى.
