بوكەيحاننان «بايتەرەككە» دەيىن…
قالالىق ءماسليحاتتىڭ سەسسياسىندا كوپتەگەن ماڭىزدى شەشىمدەر قابىلداندى
استانادا وتكەن كۇزدە قالالىق ءماسليحاتتىڭ شەشىمىمەن ءبىرنەشە كوشەگە اتاۋلار بەرىلىپ, كەيبىرەۋلەرى قايتا اتالدى. سونىڭ ىشىندە №36 كوشە مەن ەڭبەكشىلەر كوشەسى بىرىكتىرىلىپ, ءاليحان بوكەيحان كوشەسى اتاۋىن الدى. استانا قالاسى ءتىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆتىڭ ايتۋىنشا, بۇل ماسەلە تەحنيكالىق جاعدايلارعا بايلانىستى كىبىرتىكتەپ قالدى. كەشە قالالىق ءماسليحاتتىڭ كەزەكتەن تىس سەسسياسىندا اتالمىش ماسەلە مەن №31 كوشەنى يوردانيا كورولى حۋسەين بەن تالالدىڭ اتىمەن اتاۋ ماسەلەسى تولىعىمەن شەشىلدى. سونىمەن, بۇرىن وڭ جاعالاۋداعى 400 مەتر بولعان ءاليحان بوكەيحان كوشەسى بۇگىندە سول جاعالاۋعا اۋىسىپ, 4823 مەترگە سوزىلىپ جاتىر.
بۇعان قوسا, قالا اكىمىنىڭ ورىنباسارلارى اندرەي لۋكين مەن قوسمان ايتمۇحامبەتوۆ قاتىسقان سەسسيادا استانا قالاسىنىڭ 2017-2019 جىلدارعا ارنالعان بيۋدجەتى مەن مەملەكەتتىك جەكەمەنشىك ارىپتەستىك جوبالارىنىڭ تىزبەسىنە وزگەرىستەر ەنگىزۋ, استانادا بالاباقشالار سالۋعا جانە پايدالانۋعا مەملەكەتتىك-جەكەمەنشىك ارىپتەستىك جوباسى بويىنشا مەملەكەتتىك مىندەتتەمەلەردى قابىلداۋ قارالدى. ءتيىستى ماسەلەلەرگە قاتىستى باياندامالاردى قالالىق قارجى باسقارماسى باسشىسىنىڭ ورىنباسارى باقىت سۇلەيمەنوۆا, قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءالىبي جۇماەۆ, قالالىق ءبىلىم باسقارماسى باسشىسىنىڭ مىندەتىن اتقارۋشى ءانۋار جانعوزين بايانداما جاسادى.
سونداي-اق, «استانا قالاسى ءماسليحاتىنىڭ تۇراقتى كوميسسيالارىن سايلاۋ تۋرالى» شەشىمىنە وزگەرىستەر ەنگىزىلىپ, استانا قالاسى بويىنشا تەكسەرۋ كوميسسياسىنىڭ توراعاسى مەن مۇشەلەرىن تاعايىنداۋ, ولاردىڭ لاۋازىمدىق نۇسقاۋلىعى مەن وسى كوميسسيانىڭ «ب» كورپۋسىنىڭ مەملەكەتتىك اكىمشىلىك لاۋازىمدارىنا قويىلاتىن بىلىكتىلىك تالاپتارىن بەكىتۋ قارالدى.
استانا اكىمىنىڭ ورىنباسارى اندرەي لۋكين استانا قالاسىنىڭ 2017-2019 جىلدارعا ارنالعان بيۋدجەتىنە وزگەرىستەر ەنگىزۋ بويىنشا بىرقاتار ۇسىنىستاردى ەنگىزدى. ونىڭ ايتۋىنشا, قالا قازىر «ەكسپو-2017» كورمەسىنە تولىقتاي دايىن بولدى. بيىلعى قاڭتار-ءساۋىر ارالىعىندا قالا بيۋدجەتىنە 76 ملرد 763 ملن تەڭگە كىرىس كىردى. وتكەن جىلدىڭ سايكەس مەرزىمىمەن سالىستىرعاندا كىرىس 10 ملرد تەڭگەگە جۋىق سوماعا ۇلعايعان.
اندرەي لۋكين استانا اكىمى اپپاراتى اۋدان اكىمدىكتەرى مەن بىرقاتار باسقارماعا بيۋدجەتتەن قوسىمشا قارجى ءبولۋدى ۇسىندى. سونىڭ ءىشىندە اكىمدىكتەرگە سانيتارلىق تازالىقتى قامتاماسىز ەتۋگە, قالانى اباتتاندىرۋعا اقشا ءبولۋ جونىندە ايتتى. بۇعان قوسا, استانا قالاسى ىشكى ىستەر دەپارتامەنتىنىڭ قىزمەتكەرلەرى «ەكسپو-2017» قالاشىعىنىڭ اۋماعىندا كۇندىز-ءتۇنى كەزەكشىلىك اتقارۋ ءۇشىن دە كەرەك قوسىمشا قارجى كولەمى تۋرالى ايتىلدى.
سونداي-اق, كوممۋنالدىق شارۋاشىلىقتى دامىتۋعا, كولىك ينفراقۇرىلىمىن ىلگەرىلەتۋگە, جولداردى جوندەۋگە, سۋمەن جابدىقتاۋ جۇيەسىنە, اسىرەسە, «تالدىكول» سۋ جيناعىشىنداعى توپىراقتى قالپىنا كەلتىرۋگە, كىشى تالدىكولدەگى سۋدى رەتتەۋگە دە بيۋدجەتتەن قوسىمشا قارجى قاراستىرىلدى.
ءبىلىم بەرۋ مەن دەنساۋلىق ساقتاۋ نىساندارىنىڭ قۇرىلىسىنا, سونىڭ ىشىندە ءتورت بالاباقشا جوباسىن دايىنداپ, ولاردى سالۋ جۇمىسىنا دا قانشا قارجى كەرەكتىگى انىقتالدى. سيرەك كەزدەسەتىن اۋرۋلاردى ەمدەۋگە ءدارى-دارمەك ساتىپ الۋعا دا قارجى ءبولۋ جوسپارلاندى.
سپورتتىق قۇرالداردى جاڭارتۋعا, مۇمكىندىگى شەكتەۋلى ادامداردى قولداۋعا دا قوسىمشا قارجى قاراستىرىلادى.
«اعىمداعى جىلدىڭ قىركۇيەك پەن جەلتوقسان ارالىعىندا مۇگەدەكتەردى ساناتورلىق ەمدەۋگە جىبەرۋگە 97,5 ملن تەڭگە ءبولۋدى ۇسىنامىن. مۇنىمەن ءبىز استاناداعى بارلىق مۇمكىندىگى شەكتەۋلى بالالاردى, ءى, ءىى توپتاعى ەرەسەك مۇگەدەكتەر مەن زەينەتكەرلەردى 100 پايىزعا بەيىمدەۋ شارالارىنا ىلىكتىرەمىز. قازىرگى تاڭدا اربانى قاجەت ەتىپ تۇرعان مۇگەدەكتەر سانى 630 ادامعا كوبەيدى. ولارعا 100 پايىزعا جاعداي جاساۋ ءۇشىن 112 ملن تەڭگە كەرەك. پروتەز-ورتوپەديالىق قۇرالدارمەن قامتاماسىز ەتۋ ءۇشىن, ناقتىراق ايتسام, 1062 قۇرال الۋ ءۇشىن 80 ملن قاجەت. بۇعان قوسا, ۇيدە كومەك كورسەتۋگە قارجى كەرەك» دەدى قالا اكىمىنىڭ ورىنباسارى.
«استانا-بايتەرەك» مونۋمەنتىنىڭ جوندەۋىن اياقتاۋعا دا قارجى قاراستىرىلدى. استانا اكىمى ورىنباسارىنىڭ ايتۋىنشا, قۇرىلىسشىلار اتالمىش جۇمىستى الداعى ماۋسىم ايىنىڭ باسىندا اياقتاپ, جاڭارعان مونۋمەنت قوناقتارعا ەسىگىن ايقارا اشادى.
امانعالي قالجانوۆ