بولگاريانىڭ سۆەتي-ۆلاس قالاسىندا قازاقستان ەلشىلىگى مەن «پاميات بولگاري – براتەۆ دينەۆي» اتتى قور قولداۋىمەن تانىمال تۇلعالار اللەياسىندا اباي بارەلەفى اشىلدى.
ءىس-شاراعا قازاقستاننىڭ بولگارياداعى ەلشىسى تەمىرتاي ءىزباستين, بولگاريانىڭ بۇرىنعى سىرتقى ىستەر ءمينيسترى سولومون پاسسي, سۆەتي-ۆلاس قالاسى اكىمشىلىگىنىڭ وكىلى, «پاميات بولگاري – براتەۆ دينەۆي» اتتى قورىنىڭ باسشىلارى دينكو جانە يوردان دينەۆتەر, بولگار تەلەگراف اگەنتتىگىنىڭ توراعاسى ماكسيم مينچەۆ, بولگاريا ءسىم جانىنداعى مادەني ورتالىعىنىڭ باسشىسى سنەجانا يوۆەۆا, تاريحشى جانە ەتنوگراف ستويان رايچەۆسكي جانە وتانداستارىمىز قاتىستى.
اتالمىش شارا بارىسىندا ەلشى ابايدىڭ 175 جىلدىق مەرەيتويى تەك قازاقستاندا ەمەس, الەمنىڭ كوپتەگەن ەلدەرىندە تويلانىپ جاتقانىن, بۇل يگى باستامالار ەل اراسىنداعى ىنتىماقتاستىقتىڭ ودان ءارى دامۋىنا سەپتىگىن تيگىزەتىنىن تىلگە تيەك ەتتى.
