استانانىڭ سول جاق جاعالاۋىنداعى 100 گەكتار اۋماقتا بوتانيكالىق باق پايدا بولادى. بۇل تۋرالى استانا اكىمدىگىنىڭ مەديا ورتالىعىنا «استانا كوگالداندىرۋ» اق وندىرىستىك ماسەلەلەر جونىندەگى باسقارما توراعاسىنىڭ ورىنباسارى بيبىگۇل بەكتەمىسوۆا حابارلادى.
قابانباي باتىر داڭعىلىندا ورنالاساتىن بوتانيكالىق باقتىڭ قۇرىلىسى 2017 جىلدىڭ جەلتوقسان ايىندا اياقتالادى. قازىرگى تاڭدا كوگالداندىرۋ جانە اباتتاندىرۋ جۇمىستارى جۇرگىزىلۋدە. «بۇل جەردە جابىق ورانجەرەيا, جاساندى سۋ توعانى, جۇگىرۋ مەن ۆەلوسيپەدكە ارنالعان جولدار بولادى. ورانجەرەيادا ەكزوتيكالىق وسىمدىكتەر جانە پالمانىڭ 55-كە جۋىق تۇرلەرى وسىرىلەدى» دەيدى ب.بەكتەمىسوۆا.
سونىمەن قاتار, استانانىڭ كليماتتىق جاعدايىنا ساي اعاشتار مەن بۇتالاردىڭ جاڭا تۇرلەرىن ءوسىرۋ مەن باپتاۋعا بايلانىستى ءتۇرلى تاجىريبەلەر وتكىزىلىپ, وقۋ-اعارتۋشىلىق جانە ەكولوگيالىق شارالار ارقىلى بوتانيكالىق باق عىلىمي زەرتحاناعا اينالماق. «جىل سوڭىنا دەيىن بوتانيكالىق باققا 35 مىڭ اعاش وتىرعىزۋ جوسپارلانعان. سونىمەن قاتار, قازاقستاندا ەشقاشان وسىرىلمەگەن ەۋروپادان 600 ءتۇپ اعاش تۇرلەرى اكەلىنەدى» دەيدى بەكتەمىسوۆا.
