الاياقتار ازاماتتاردىڭ سەنىمىنە كىرىپ, شۇعىل تۇردە قوڭىراۋ شالۋ كەرەكتىگىن ايتىپ, ارتىنشا ءىزىن سۋىتادى. سوڭعى ۋاقىتتا وسىنداي وقيعالاردىڭ سانى كۇرت ارتىپ كەتىپتى.
زاڭ ورگاندارىنا ارىز تۇسىرگەندەردىڭ ءبىرىنىڭ ايتۋىنشا, ونىڭ كامەلەتكە تولماعان ۇلىنىڭ ۇيالى تەلەفونىنان بەيتانىس ەر ادام قوڭىراۋ شالۋدى وتىنگەن. جەتكىنشەكتىڭ 59 مىڭ تەڭگە تۇراتىن تەلەفونىن العان ول ءاپ-ساتتە ءىزىم-عايىم جوق بولىپ كەتىپتى. تاعى ءبىر ارىزدا زارداپ شەگۋشى 90 مىڭ تەڭگەلىك تەلەفونىن ۋاقىتشا سۇراعان جاس جىگىتتىڭ بىردەن ءىز سۋىتقانى جازىلىپتى. سونىمەن قاتار, ءدامحانا قىزمەتكەرى دە ىشكى ىستەر بولىمشەسىنە تۋرا وسىنداي ماسەلەمەن حابارلاسىپ, 110 مىڭ تەڭگەلىك تەلەفونىنان ايىرىلىپ قالعانىن ايتىپ ارىزدانعان. قازىر وسى جانە وزگە دە وقيعالار نەگىزىندە قىلمىستىق كودەكستىڭ 190-بابى («الاياقتىق») بويىنشا تەرگەۋ امالدارى جۇرگىزىلۋدە.
بۇل تۇرعىدا ەلوردانىڭ ءتارتىپ ساقشىلارى الداپ-ارباپ, بوتەننىڭ مۇلكىن ۇرلاۋ وقيعالارىنىڭ جيىلەۋىنە بايلانىستى تۇرعىنداردى مۇنداي جاعدايدا اباي بولىپ, ءوز گادجەتتەرىن بەيتانىس ادامداردىڭ, تەز ارادا بولسا دا, قولدانۋىنا رۇقسات بەرمەۋگە شاقىرادى.
