بوياۋى بولەك «بايادەركا»
بۇگىن ەلوردا جۇرتشىلىعى اشىق اسپان استىنداعى بالەتتى تاماشالايدى. قالا كۇنى قارساڭىندا مۇنداي عاجاپ مۇمكىندىكتى «استانا وپەرا» تەاترى ۇسىنعالى وتىر. ونەرپازدار ليۋدۆيگ مينكۋستىڭ ايگىلى «بايادەركا» سپەكتاكلىن تاۋەلسىزدىك سارايى الدىنداعى الاڭدا ساحنالاماق.
ەستەرىڭىزگە سالساق, اتالمىش قويىلىمنىڭ استاناداعى پرەمەراسى بىلتىرعى جەلتوقساندا بولعان-دى. ەجەلگى ءۇندىستاننىڭ تىنىس-تىرشىلىگىمەن تانىستىراتىن داڭقتى دراما حرام ءبيشىسى مەن ەرجۇرەك سارباز اراسىنداعى بايانسىز ماحاببات ۋاقيعاسىن نازىك نوتامەن, كوركەم قيمىلمەن اسپەتتەيدى. ادەمىلىگى جاعىنان «بايادەركا» بالەتىن بۇرىنعى كورسەتىلىمدەرمەن سالىستىرۋعا كەلمەس. ويتكەنى, قويىلىمعا قاتىستى دۇنيەلەردىڭ بارلىعى تانىمال يتاليالىق سۋرەتشى ەتسيو فريدجەريونىڭ قىراعى نازارىنان وتكەن.
– جوبامىز تاۋەلسىزدىك سارايىنىڭ ارحيتەكتۋراسى مەن كوركەم ديزاينىنا سايكەستەندىرىلىپ جاسالدى. كورەرمەندەر ءۇشىن 1400 ورنى بار ءۇش دەڭگەيلى الاڭ دايىندايمىز. سونىمەن قاتار, شىمىلدىق ارتىندا تروپيكالىق دجۋنگليدەگىدەي سالتاناتتى سارايلار مەن ءزاۋلىم عيباداتحانالار بوي كوتەرەدى. سپەكتاكل سوڭىنا تامان بالەرينالار كولەڭكە ارقىلى بيلەپ, بۇقاراعا بولەكشە اسەر سىيلايدى. ال 20-دان اسا پروەكتوردىڭ كومەگىمەن كورسەتىلەتىن بەينەلەر تاۋەلسىزدىك سارايى عيماراتىنىڭ توبەسىن تۇتاستاي قامتيدى, – دەيدى «استانا وپەرا» تەاترىنىڭ كوركەمدىك قويىلىم كەشەنى جەتەكشىسى ۆيكتور كارارە.
ارتىستەردىڭ كيىمدەرىنە دە «اڭگىمە ايتا المايسىز». بۇل تاراپتى تولىقتاي باقىلاۋىنا الەمدىك دەڭگەيدەگى اتاقتى كوستيۋمەر فرانكا سكۋارچاپينو العان. بالەت بيشىلەرىنە ارنالعان 133 كوستيۋم تەاتردا تىگىلسە, 84-ءى يتاليادا ازىرلەنىپتى. ماتا ءۇندىستاننان, كيىمگە تاعىلاتىن اشەكەيلەر دۋبايدان اكەلىنگەن. قۇندى بيجۋتەريامەن كومكەرىلىپ, قىمبات جىپپەن كەستەلەنگەن كويلەكتەر شىعىستىق ءسان-سالتاناتتى بارىنشا ايشىقتايدى.
قويىلىمعا تەاترداعى بالەت ترۋپپاسى تەگىس قاتىسادى. ماماندار «بايادەركانى» كوردەبالەتتىڭ ەڭ ۇزدىك ءتريۋمفى رەتىندە باعالاعانىن ەسكەرسەك, جوعارىداعى جايتتىڭ ءوزى شىعارماشىلىق قۇرامنىڭ كاسىبي تۇرعىداعى جەتىستىگى ەكەنىن اڭعارامىز. باستى پارتيالاردى وتاندىق بالەتتىڭ جارىق جۇلدىزدارى, «استانا وپەرا» تەاترىنىڭ جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى ءمادينا باسپاەۆا (نيكيا), تايىر گاتاۋوۆ (سولور) جانە گاۋھار ۋسينا (گامزاتتي) ورىندايدى. وسى ورايدا سپەكتاكلدىڭ قويۋشى حورەوگرافى التىناي اسىلمۇراتوۆانىڭ ويىن بىلمەك بولعانبىز.
– ۇستازىم ولگا مويسەەۆا بۇل سپەكتاكلدى جان-تانىمەن جاقسى كوردى, مەنىڭ دە قانىما سول ماحابباتتى ءسىڭدىردى. «بايادەركاداعى» نيكيا پارتياسىنا كەلسەك, مۇندا ءبىر-بىرىنە ۇقسامايتىن ەكى بالەتتى بايقايمىز. ءبىرىنشى جانە ەكىنشى اكتىلەر – ەموتسياعا تولى, اكتەرلىك شەبەرلىكتى تالاپ ەتەتىن ءبولىم. تەحنيكالىق قيىندىقتارى دا كوپ. سوڭعى اكتىدە – تازا كلاسسيكا. اشىق اسپان استىندا بيلەۋدىڭ ءبىر كەرەمەتى – ەركىندىكتى سەزىنەتىندىگىندە, – دەدى ول.
ايتپاقشى, سپەكتاكل كەزىندە اۋا رايىنىڭ جاۋىن-شاشىنسىز بولۋى دا اسا ماڭىزدى. سەبەبى, ەدەن ىلعالدانسا, ونىڭ ۇستىندە بالەت بيلەۋ مۇمكىن ەمەس. ەندەشە, بۇل كۇنى تابيعاتتىڭ ءوزى ەلوردالىقتاردىڭ ەرەكشە بالەت كورۋىنە كومەكتەسەر دەگەن ۇمىتتەمىز.
بوتاگوز ماراتقىزى