جۋىردا ەلورداداعى جاستار تەاترىندا بەلگىلى قالامگەر, دراماتۋرگ بايانعالي ءالىمجانوۆتىڭ «قارىز بەن قاسپاق» اتتى كومەديالىق جانردا جازىلعان سپەكتاكلىنىڭ پرەمەراسى ءوتتى. قازىرگى قوعامداعى كولەڭكەلى تۇستاردى نىساناعا الىپ, زامانا تامىرىن ءدوپ باسقان قويىلىم ەكى كۇن بويى كورەرمەندەردى كۇلدىرىپ قانا قويعان جوق, ونداعى استارلى وقيعالار ارقىلى وي سالا ءبىلدى.
اقشا مەن ماتەريالدىق يگىلىك باستى قۇندىلىق سانالعان قوعامدا نەسيە الىپ, قارىزعا باتۋ دا قالىپتى جاعدايعا اينالدى. قازىر بۇعان ەشكىم تاڭعالا قويمايدى. ونى ەكى ادامنىڭ ءبىرىنىڭ باسىنداعى جاعداي دەپ تۇسىنەمىز. الايدا «الماقتىڭ دا سالماعى بار» ەكەنى راس.
قويىلىم قاراپايىم عانا نەسيە الۋدان تۋعان شىتىرمان وقيعا جەلىسىنە قۇرىلعان. ونداعى باس كەيىپكەردىڭ ءبىرى باسپاق ويلانباي قارىز الا بەرەدى. قارىز الىپ ماشينا مىنەدى, قارىز الىپ كۋرورتقا بارادى, قارىز الىپ ساۋدا جاسايدى, اقىر اياعى قارىزعا بەلشەدەن باتادى. ەندى ول وسى قيىندىقتان قۇرداسى قاسپاقتىڭ اقىل-ايلاسىنىڭ ارقاسىندا امان قۇتىلادى. قاسپاق – تىرشىلىككە ەپتى, ەسەپكە جۇيرىك, وڭقاي اسىقتاي جىلدام ادام. جالپى بۇل ەكى كەيىپكەرگە ۇقساس بەينەلەردى كادىمگى تىرشىلىكتە ءجيى كورىپ ءجۇرمىز. ادەمى ءازىل, اسەرلى كورىنىس, ۇتقىر وي, قىزىقتى سيۋجەتكە قۇرىلعان كومەديانى تالانتتى رەجيسسەر, قازاقستاننىڭ ەڭبەك سىڭىرگەن قايراتكەرى بەكبولات قۇرمانقوجاەۆ شەبەرلىكپەن ورە بىلگەن. رەجيسسەر جۇكتەگەن مىندەتتى اكتەرلەر دە جوعارى دەڭگەيدە ورىنداپ, كەيىپكەرلەردىڭ سان ءتۇرلى وبرازىن كەلىستى جەتكىزدى. اسىرەسە قوسپاقتى سومداعان دانيار ورازاەۆ, باسپاقتى ويناعان ەلدوس شايكەنوۆ, وسپاقتى بەينەلەگەن ايسۇلتان جاليەۆ, توستاقتى بەدەرلەگەن نۇربەك الىبەك سەكىلدى اكتەرلەردىڭ ونەرى كورەرمەندەردى جىلى اسەرگە بولەدى.
– بۇگىندە ءبىراز ادامدار نەسيە الىپ, ونى تولەي الماي, قيىندىققا ۇشىراپ جاتادى. سودان وي تۋىپ, وسى پەسا دۇنيەگە كەلدى. بۇل شىعارما كىتابىما ەنسە دە, ەشقايدا قويىلعان جوق ەدى. ءبىر كۇنى جاستار تەاترىنىڭ رەجيسسەرى بەكبولات قۇرمانقوجاەۆ حابارلاسىپ, وسى تۋىندىنى قويامىز دەپ ايتقاندا, قۋانىپ قالدىم. دايىندىق بارىسىندا رەجيسسەرمەن بىرلەسىپ جۇمىس ىستەپ, كەيبىر كەيىپكەردى قايتا شيراتىپ جازدىم. پرەمەرا وتە جاقسى ءوتتى, وزىمە ۇنادى. بەكبولات شىعارما جەلىسىن ساقتاپ, كوركەم, اسەرلى ارلەي بىلگەن. ارتىستەردىڭ ونەرىنە دە كوڭىلىم تولدى, ولاردىڭ ويىنى تۇتاس ءانسامبلدى قۇراپ, جۇپ-جۇمىر دۇنيە بولىپ شىققان, – دەدى كومەديا اۆتورى بايانعالي ءالىمجانوۆ.
سونداي-اق اتالعان سپەكتاكلدىڭ ساحناعا ءساتتى بولىپ شىعۋىنا ۇلكەن ۇلەس قوسقان سۋرەتشى-قويۋشى ەرلان تۇياقوۆ, كوستيۋم سۋرەتشىسى التىنبەك ەرمۇقان جانە بالەتمەيستەر شىرىن مۇستافينانىڭ ەڭبەكتەرىن دە ايتا كەتكەن ءجون.
