بۇل نە دەگەن ولمەيتىن يدەولوگيا؟

تاياۋدا الماتىداعى اباي اتىنداعى مەملەكەتتىك وپەرا جانە بالەت تەاترىندا ارقا سۇيەرىمىز بولىپ جۇرگەن ۇلكەن اعا-اپالارىمىز ءبۇ­كىلوداقتىق لەنينشىل كوممۋنيس­تىك جاستار وداعىنىڭ (ۆلكسم) 100 جىلدىعىن تويلادى. ءبارى كەۋدەسىنە جارقىراتىپ كومسومول بەلگىسىن تاعىپ الىپتى.

قۋانىشتان جۇزدەرى بال-بۇل جانادى. تويدان تالاي سۋرەت تارادى. اسا ءسان-سالتاناتپەن, جوعارى دەڭگەيدە وتكەن شارادا قازاقستان مەن كومسومول تۋى قاتار جەلبىرەپ تۇر. قازاقتىڭ بۇگىنى مەن بولاشاعى ءۇشىن اسا ماڭىزدى شارالاردىڭ وزىنەن توبە كورسەتە بەرمەيتىن تالاي تۇلعانى كومسومول تويىندا اڭعارعانداي بولدىق.
كوڭىلىمىزگە كىربىڭ تۇسىرگەنى سول, ءبىزدىڭ «اعا» دەپ ارقا سۇيەپ جۇرگەن الدىڭعى تولقىن قانداي مۇراتپەن ءومىر سۇرۋدە؟ ولار ءالى ەسكىلىكتى اڭساي ما؟ ولار ءالى كەڭەستىك زاماننىڭ يدەولوگياسىنا قىزمەت ەتە مە؟ ەل تاۋەلسىزدىك الىپ, وشكەنىمىز جانىپ, ولگەنىمىز تىرىلگەندەي كۇي كەشىپ, ءبىز رۋحاني جاڭعىرۋدان وتسەك, رۋحىمىزدى ءتىرىلتىپ, ەڭسەمىزدى كوتەرسەك, اباي ايتقانداي, اقىل بىرلىگىنە ءسۇ­يەنىپ, كەلەشەككە نىق قادام باسساق دەپ جۇرگەندە ۇلكەندەرىمىز ساناسىنىڭ ءبىر بۇرىشىندا كومپارتيا قالىپتاستىرعان كونەتوز كوزقاراس پەن كەڭەستىك قۇندىلىقتاردى ساقتاپ جۇرگەنى قالاي؟ زامان وزگەرسە دە جۇرەك تۇكپىرىنەن وشپەيتىن بۇل نە دەگەن ماحاببات؟ بۇل نە دەگەن سارقىلمايتىن ساعىنىش؟ نە دەگەن ولمەيتىن, جانى ءسىرى يدەولوگيا؟
كەشەگى اربانىڭ دوڭگەلەگى بۇگىنگى زاماناۋي كولىكتەرگە جارامايتىنى قانشالىق ايقىن بولسا, بوداندىق داۋىرىمىزدە قىزمەت ەتكەن پارتيانىڭ يدەولوگياسى دا ازات قازاققا قاجەت ەمەس ەكەنى ايدان انىق. ساناداعى بوداندىقتى سەرپىپ تاستاپ, ەرىكتى, ەركىن ومىرگە, ازاتتىق باقىتىنا قول سوزىپ وتىرعان ءبىزدىڭ الدىمىزدا باسقا ارمان, باسقا مۇرات.
ال بەدەلى مەن مۇمكىندىگى الاپات اعالارىمىز ازات ەلدىڭ جاستارىنا ۇلگى بولۋعا نيەتتەنسە, ەلىمىزدىڭ تاۋەلسىزدىگىنە جول سالىپ, وڭىمىز بەن سولىمىزدى كورسەتىپ, تۇتاس مەملەكەتتىك يدەولوگياعا اينالدىرۋعا جارايتىن باعىت-باعدار مەن قاعيداتتاردى ءتىزىپ جاساپ بەرىپ كەتكەن الاش كوسەمدەرىنىڭ تويىن وزدەرى باس بولىپ نەگە تويلامادى؟ وتكەن جىلى الاش پارتياسىنىڭ 100 جىلدىعى بولعاندا ولار قايدا قالدى؟ جەرىمىزدىڭ تۇتاستىعى ءۇشىن باسىن بايگەگە تىككەن قازاقتىڭ قايراتكەر ۇلى جۇمابەك تاشەنوۆتىڭ مەرەيتويىن دەمەۋشى تاۋىپ نەگە ايرىقشا اتاپ وتپەدى؟
بۇگىنگى ۇرپاقتىڭ جىگەرىن جانىپ, كۇش-قايراتىن تاسىتاتىن قايىرىمى مول شارالاردى دۇركىرەتىپ وتكىزىپ ەل نازارىن اۋدارۋعا شامالارى كەلەر ەدى عوي. ءبىزدىڭ اعا-اپالار بىراق ويتپەدى…