ەلوردادا 238 سايلاۋ ۋچاسكەسى جۇمىس ىستەدى
9 ماۋسىم كۇنى ەلوردادا 238 سايلاۋ ۋچاسكەسى اشىلىپ, وندا 3 مىڭعا جۋىق سايلاۋ كوميسسياسى جۇمىس ىستەدى. ەلباسى نۇرسۇلتان نازارباەۆ وقۋشىلار سارايىنداعى №58 ۋچاسكەدە, مەملەكەت باسشىسى قاسىم-جومارت توقاەۆ «استانا وپەرا» تەاترىنداعى №115 ۋچاسكەدە, پارلامەنت سەناتىنىڭ توراعاسى داريعا نازارباەۆا وقۋشىلار سارايىنداعى №58 ۋچاسكەدە, پارلامەنت ءماجىلىسىنىڭ توراعاسى نۇرلان نىعماتۋللين ۇلتتىق كىتاپحاناداعى №111 ۋچاسكەدە, نۇر-سۇلتان قالاسىنىڭ اكىمى باقىت سۇلتانوۆ «استانا» كونتسەرت زالىنداعى №138 ۋچاسكەدە داۋىس بەردى.
جاپونياداعى وتانداسىمىز – ەڭ ءبىرىنشى
گەوگرافيالىق جاعىنان ورنالاسۋ ەرەكشەلىگىنە بايلانىستى توكيو مەن سەۋلدەگى سايلاۋ ۋچاسكەلەرى ەڭ ءبىرىنشى اشىلعان. جاپونيانىڭ ۆاسەد ۋنيۆەرسيتەتىندە وقىپ جاتقان وتانداسىمىز ءىلياس قۇرمانعالي العاشقى داۋىس بەرۋشى رەتىندە تىركەلدى. جالپى, بۇل كۇنى شەتەلدەگى 48 سايلاۋ ۋچاسكەسىندە 8322 قازاقستاندىق داۋىس بەرگەن. ونىڭ اراسىندا قازىر ۇلىبريتانيادا جۇرگەن سپورتشىمىز يليا يلين دە بار.
اتامەكەنگە ورالعاندار العاش رەت داۋىس بەردى
شەتەلدەردەن اتاجۇرتقا ورالىپ, قازاقستاننىڭ ازاماتتىعىن العان كەيبىر قانداستارىمىز بيىلعى سايلاۋدا العاش رەت داۋىس بەردى. سولاردىڭ ءبىرى – قىتايدىڭ شىڭجاڭ ولكەلىك تەلەۆيزياسىندا 15 جىل بويى جۋرناليست بولىپ قىزمەت ەتكەن قۋانىش ءىلياسۇلى. ول جارى مايرامەن بىرگە №136 ۋچاسكەگە كەلىپ داۋىس بەردى. «بۇل كۇن ءبىزدىڭ وتباسىمىزداعى ۇمىتىلماس كۇندەردىڭ ءبىرى بولىپ قالادى. سەبەبى ءبىز باسقا ەلدە, باسقاشا جۇيەدەگى مەملەكەتتە ءومىر سۇردىك» دەدى قانداسىمىز.
تۇڭعىش رەت قاتىسقاندارعا سىيلىق تابىستالدى
بيىل العاش رەت داۋىس بەرگەن ەلوردالىق جاستارعا ايتۋلى كۇننەن ەستەلىك رەتىندە فۋتبولكا, كىتاپ, كەپكا سەكىلدى سىيلىق بەرىلدى. ماسەلەن, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتى اسلان اسقاردىڭ 18 جاسقا تولعان تۋعان كۇنى پرەزيدەنت سايلاۋىمەن تۇسپا-تۇس كەلىپتى. «ءاربىر پاتريوت ءوز ەلىنىڭ بولاشاعىنا جاۋاپتى. بۇگىن ماعان العاش رەت سايلاۋعا كەلىپ, ءوز تاڭداۋىمدى جاساۋدىڭ مۇمكىندىگى تۋدى. قۇرداستارىمدى دا وزدەرىنىڭ ازاماتتىق مىندەتتەرىن ورىنداۋعا شاقىرامىن» دەدى ول.
30 ءسابي دۇنيەگە كەلدى
سايلاۋ كۇنى تۇسكە دەيىن نۇر-سۇلتان قالاسىنىڭ پەريناتالدى ورتالىقتارىندا 30 بالا ومىرگە كەلدى. ولاردىڭ 15-ءى – ۇل, ال 15-ءى – قىز. «داۋىس بەرۋشىلەر تاڭعى ساعات 7.00-دەن باستاپ كەلدى. ءبىر ساعاتتىڭ ىشىندە 100-گە جۋىق ادام داۋىس بەرىپ ۇلگەردى. ولاردىڭ ىشىندە قىزمەتكەرلەر دە, جۇكتى ايەلدەر مەن بوسانعان انالار دا بار» دەدى №2 پەريناتالدى ورتالىقتا ورنالاسقان №208 ۋچاسكەلىك سايلاۋ كوميسسياسىنىڭ مۇشەسى دينات قوجەكەنوۆ.
200 استانالىق ۆولونتەر جۇمىلدىرىلدى
ەلوردالىق سايلاۋ ۋچاسكەسىندە جالپى سانى 200 استانالىق ۆولونتەر جۇمىس ىستەدى. ولار مۇمكىندىگى شەكتەۋلى داۋىس بەرۋشىلەردى قارسى الىپ, عيماراتقا كىرگىزىپ, قاجەت بولعان جاعدايدا كەڭەستەرىن بەردى. مۇمكىندىگى شەكتەۋلى ازاماتتار ءۇشىن بارلىق سايلاۋ ۋچاسكەسىندە اۆتوكولىك تۇراعى, سۇيەنىشتەر مەن پاندۋستار, ليفتىلەر, تاكتيلدى كورسەتكىشتەر, داۋىس بەرۋگە ارنالعان ارنايى كابينكالار سياقتى قاجەتتى جاعدايلار جاسالدى.
سايلاۋ ۋچاسكەسىندە نەكەلەرىن قيدى
سايلاۋ كۇنى ۇيلەنۋ تويىمەن قابات كەلگەن ەلوردالىق جاس جۇبايلار دا وزدەرىنىڭ ازاماتتىق مىندەتتەرىن ورىنداۋدان قالىس قالعان جوق. ميراس ءابدىراxمان مەن جانەل بەردالينوۆا جۇبى تۇپ-تۋرا تويلارىنىڭ الدىندا №35 مەكتەپ-ليتسەي عيماراتىندا ورنالاسقان №142 سايلاۋ ۋچاسكەسىنە كەلىپ, ءوز داۋىستارىن بەردى. جاستاردىڭ ايتۋىنشا, ۇيلەنۋ تويىنىڭ كۇنى ادەيى سايلاۋ كۇنىمەن ورايلاستىرىلىپ بەلگىلەنگەن ەكەن. ايتپاقشى, جاستاردىڭ نەكە قيۋ ءراسىمى دە وسى سايلاۋ ۋچاسكەسىندە ءوتتى.
بالالار دا قىزىعۋشىلىق تانىتتى
سايلاۋ ۋچاسكەلەرىنە اتا-اناسىمەن نە ەرەسەك تۋىسىمەن بىرگە ىلەسىپ كەلگەن بالالاردىڭ دا سايلاۋ پروتسەسىنە ەرەكشە قىزىعۋشىلىق تانىتقاندارى بايقالدى. «كەيبىر بالالار اتا-اناسىنان «پرەزيدەنت بولۋعا كىمدەر قاتىسىپ جاتىر؟ سۋرەتتەرى قايسى؟» دەپ سۇراپ تا جاتتى. ولارعا ۋچاسكەگە كىرەبەرىستە ءىلۋلى تۇرعان ۇمىتكەرلەردىڭ سۋرەتتەرىن كورسەتتىك. كەيبىر بالدىرعاندار اناسىمەن نە اكەسىمەن بىرگە سايلاۋ كابيناسىنا كىرىپ, ولاردىڭ تولتىرعان بيۋللەتەندەرىن ءوز قولدارىمەن جاشىككە سالدى» دەيدى استاناداعى №142 سايلاۋ كوميسسياسىنىڭ توراعاسى تالعات احمەدينوۆ.
19 زاڭ بۇزۋشىلىق انىقتالدى
ەلىمىزدەگى سايلاۋ ۋچاسكەلەرىندە 19 زاڭ بۇزۋشىلىق وقيعا تىركەلگەن. باس پروكۋروردىڭ ورىنباسارى بولات دەمباەۆتىڭ ايتۋىنشا, ولار نۇر-سۇلتان, الماتى قالالارىندا, الماتى, اتىراۋ, قىزىلوردا, ماڭعىستاۋ جانە تۇركىستان وبلىستارىندا بولعان. زاڭ بۇزۋشىلىقتاردىڭ قاتارىندا زاڭسىز ۇگىت جۇرگىزۋ, ءبىر ادامعا بىرنەشە بيۋللەتەن بەرۋ, جاشىككە ەكى-ءۇش بيۋللەتەننەن سالۋ سەكىلدى دەرەكتەر بار. مىسالى, پرەزيدەنتتىككە كانديداتتىڭ ءبىرىنىڭ ۇگىت ماتەريالدارىن قاساقانا زاقىمداۋ فاكتىسى بويىنشا نۇر-سۇلتان قالاسىنىڭ تۇرعىنىنا ايىپپۇل سالىندى. سونداي-اق وسى كۇنى زاڭسىز نارازىلىق اكتسياسىنا قاتىسقان 500-دەي ادام (نۇر-سۇلتان جانە الماتى قالالارى بويىنشا) ۇستالدى. «مۇنداي ارەكەتكە قىلمىستىق كودەكستىڭ باپتارى بويىنشا پروتسەسسۋالدىق باعا بەرىلەدى. قارسىلىق شاراسىن ۇيىمداستىرۋشىلار انىقتالىپ, قاتاڭ جازاعا تارتىلادى. ەلورداداعى قاقتىعىستا ءۇش پوليتسەي جاراقات العان» دەدى ىشكى ىستەر ءمينيسترىنىڭ ورىنباسارى مارات قوجاەۆ.
