بۋلۆار بويىنداعى كرەاتيۆ
قالا كۇنىنە وراي شىعارماشىلىقتى سۇيەتىن جاندار ءۇشىن دە توسىن سىي دايارلاندى. اسىرەسە, بۇرىنعىعا ۇقسامايتىن جاڭاشىل ءارى كرەاتيۆ ونەردى باعالايتىندارعا بۇل شارانىڭ ۇناعانى راس. اڭگىمە «Astana Art Fest» جايلى…
بىردەن ايتايىق, فەستيۆال بولەكشە ءستيلدىڭ قىر-سىرىن جۇرتشىلىققا تۇسىندىرۋگە باعىتتالعان. ياعني, وعان ءسىز ەلەستەتكەن كۇندەلىكتى مۇسىندەر مەن قاراپايىم ينستاللياتسيالار ەمەس, ابستراكتسيالىق جانرداعى دۇنيەلەر اكەلىندى.
– بيىلعى فەستيۆال تاقىرىبىنىڭ نەگىزگى يدەياسى ادام ەنەرگياسىنا ارنالعان. اشىق اسپان استىنداعى كورمەگە زاماناۋي ساۋلەت پەن ديزاين سالاسىنداعى مايتالمان ماماندارىمىزدىڭ تۋىندىلارى قويىلدى, – دەيدى «Astana Art Fest» ۇيىمداستىرۋشىلارىنىڭ ءبىرى ءارى قالالىق اكىمدىككە قاراستى «استانا جاستارى» ۇيىمىنىڭ جەتەكشىسى ءانۋار نۇرپەيىسوۆ.
ءۇش كۇنگە سوزىلعان شاراعا 42 ونەر قايراتكەرى 50-دەن استام كومپوزيتسياسىن ۇسىندى. ونىڭ ىشىندە داۋرەن ءابۋشاحمان, ەرمەك ارقاروۆ, نۇربول نۇراحمەت, ساۋلە دۇيسەنبينا, مارات ساعيت, ەرلان حاميتجانوۆ, ارايلىم ەستاەۆا سىندى اۆتورلار بار. سونىمەن قاتار, رەسەيلىك سۋرەتشىلەر الەكسەي شۋلگين, اريستارح چەرنىشەۆ, ەلەنا دەميدوۆا جانە ولەگ ماكاروۆ فەستيۆالدىڭ قۇرمەتتى قوناقتارى بولدى.
ورايى تۇسكەندە, «نۇرجول» بۋلۆارىنىڭ بويىنا قويىلعان بارلىق تۋىندىلاردى ارالاپ شىققان ەدىك. كوزىمىزگە ەڭ ءبىرىنشى مايدا سىمدارمەن ورىلگەن لابيرينت ءتۇستى. بۇل نە بولدى دەگەن ويمەن جانىنا جاقىنداساق, الگى ءلابيرينتىمىز قوشقارمۇيىز ويۋى ەكەن. ينستاللياتسيانىڭ توبەسىنەن قاراعاندا, ايقىش-ۇيقىش سىزىقتار ويۋدىڭ بەينەسىن بەرەدى. شىعارمانىڭ اۆتورلارى – ەلەنا جانە ۆيكتور ۆوروبەۆتار. قازاقى تانىم-تۇسىنىكتى اسپەتتەيتىن دۇنيەلەردىڭ قاتارىنا نۇربول نۇراحمەتتىڭ «سوڭعى كوش», ساۋلە سۇلەيمەنوۆا, الەكسەي شيندين جانە زويا فالكوۆانىڭ «جيناقتاۋ نۇكتەسى», اسحات احمەدياروۆتىڭ «اجەنىڭ كوزى», ساۋلە دۇيسەنبينانىڭ «ساۋكەلە», ارىستانبەك شالباەۆتىڭ «شىعىس ايەلى» سىندى ينستاللياتسيالارىن دا جاتقىزدىق.
شارانىڭ نەگىزگى تاقىرىبى ادام قۋاتىنا ارنالعاندىقتان, كورمەدە مەديتاتسيا, دەنساۋلىق, جان تۋرالى تۋىندىلار دا كورىنىس تاپتى. ولاردىڭ ءبىر مىسالى رەتىندە يلدار ياكۋبوۆ پەن ۆاسيلي ءسۋميننىڭ «№2 ەكسپەريمەنت», توتان كۇزەمباەۆتىڭ «مەديتاتسيا», سەرگەي چەركاشيننىڭ «بەس ەلەمەنت», زيتتا سۇلتانباەۆا مەن ابليكيم جانە اۋرەليا اكمۋللاەۆتاردىڭ «Zitabl and Aura», فاتيما ءومىردىڭ «قاڭباق» اتتى شىعارمالارىن ايتۋعا بولادى.
فەستيۆال كەزىندە تسيرك ارتىستەرى تەاترلاندىرىلعان قويىلىمدار قويىپ, شاھار تۇرعىندارى مەن قوناقتارىنىڭ كوڭىلىن كوتەردى. ال كەشكىلىك ديدجەيلەر مەن بيشىلەر ونەر كورسەتىپ, بۋلۆاردىڭ بويىن مارە-سارە شاتتىققا بولەدى.
بوتاگوز ماراتقىزى