قازاقستاننىڭ ۆەلوسيپەد سپورتى فەدەراتسياسى مەن استانا قالاسىنىڭ اكىمدىگى جانە سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ ۇيىمداستىرۋىمەن ۆەلوجارىس ءوتتى. اتالعان شارانىڭ باستى ماقساتى – سالاۋاتتى ءومىر سالتىن ناسيحاتتاپ, تۇرعىنداردى بۇقارالىق سپورت تۇرلەرىنە كوپتەپ تارتۋ.
جىل سايىن ءداستۇرلى تۇردە ۇيىمداستىرىلىپ كەلە جاتقان يگىلىكتى شارا بيىل دا جالعاسىن تاۋىپ, وعان 1500-گە جۋىق ادام قاتىستى. جارىسقا قاتىسقان كوپشىلىك قابانباي باتىر داڭعىلى بويىمەن قورعالجىن تاس جولى, تۇران داڭعىلىنان ءوتىپ, «استانا ارەنا» ستاديونى جانىندا مارەگە جەتتى. جارىسقا قاتىسۋشىلار «ەڭ جاس قاتىسۋشى» جانە «ەڭ جاسى ۇلكەن قاتىسۋشى» نوميناتسيالارى بويىنشا ىرىكتەلدى. استانا قالاسى اكىمدىگىنىڭ سپورتتىق-بۇقارالىق ءىس-شارالاردى وتكىزۋ ديرەكتسياسى جەتەكشىسىنىڭ ورىنباسارى ازامات يماشەۆتىڭ ايتۋىنشا, جارىسقا قاتىسۋشىلار جالپى ۇزىندىعى 10 شاقىرىم 500 مەتر قاشىقتىقتى باعىندىرعان. سونداي-اق, ول سپورتتىق شارا «EXPO-2017» حالىقارالىق مامانداندىرىلعان كورمەسى اياسىندا وتكىزىلىپ وتىرعانىن اتاپ ءوتتى.
– بۇگىنگى شارانىڭ ماقساتى – سالاۋاتتى ءومىر سالتىن ناسيحاتتاۋ, تۇرعىنداردى بۇقارالىق سپورت تۇرلەرىنە كوپتەپ تارتۋ. مەملەكەت باسشىسى نۇرسۇلتان نازارباەۆ بۇقارا حالىقتىڭ سپورتپەن اينالىسىپ, بەلسەندى بولۋىن ءجيى ايتىپ كەلەدى. ويتكەنى دەنساۋلىعى مىقتى ۇلت كەز كەلگەن كەدەرگىنى جەڭىپ, بيىك بەلەستەردى باعىندىرا الادى. ونىڭ ۇستىنە, حالقىمىز «ءبىرىنشى بايلىق – دەنساۋلىق» دەپ تەكتەن-تەك ايتپاعان. ال دەنساۋلىعىمىز مىقتى بولۋى ءۇشىن مىندەتتى تۇردە سپورتپەن شۇعىلدانۋىمىز كەرەك. وسى سەبەپتى بۇگىنگى جارىس جىل سايىن ءداستۇرلى تۇردە وتكىزىلىپ كەلەدى, – دەدى ول.
ۆەلوجارىسقا قاتىسۋعا كەلگەن 1500 سپورتشىنىڭ ءبىرى – ءانۋار ساپارۇلى. ول جارىسقا قاتىسۋ ءۇشىن تاڭەرتەڭ كەلىپ, ۆەلوسيپەدتى جالعا العانىن ايتادى.
– جارىسقا قاتىسۋداعى نەگىزگى ماقساتىم – جەڭىسكە جەتىپ, ءبىرىنشى ورىن الۋ ەمەس, ەلىمىزدە ەندى قالىپتاسىپ كەلە جاتقان بۇقارالىق سپورتتىڭ دامۋىنا اتسالىسۋ. شىنى كەرەك, ماعان وزگە سپورت تۇرلەرىنەن قاراعاندا ۆەلوسيپەد تەۋىپ, قالانىڭ اسەم جەرلەرىندە سەرۋەندەگەن قاتتى ۇنايدى. ونىڭ ۇستىنە, بۇل جارىسقا وزىممەن قۇرداس كوپتەگەن قىز-جىگىتتەر قاتىسىپ جاتىر. سوندىقتان دا مەن ءۇشىن بۇگىنگى شارا – جارىس قانا ەمەس, سونىمەن قاتار, قۇربى-قۇرداستارىممەن جاقىنىراق تانىسۋدىڭ بىردەن-ءبىر جولى. الەۋمەتتىك جەلىدە وتىرا بەرگەنشە, ءبىر ءسات وسىنداي جارىستارعا قاتىسىپ تۇرعانعا نە جەتسىن؟! – دەيدى ول.
سونداي-اق, استانالىق ساياباعىندا «شۋاقتى الەم» قوعامدىق بىرلەستىگى قر ۆەلوسپورت فەدەراتسياسىنىڭ قولداۋىمەن داۋن سيندرومى بار بالالاردىڭ اراسىندا «سولنتسەكروسس» ۆەلوسيپەد جارىسىن وتكىزدى. يگى شارانىڭ وتۋىنە قالالىق دەنە شىنىقتىرۋ جانە سپورت باسقارماسى جانە استانا قالاسى اكىمدىگىنىڭ بۇقارالىق ءىس-شارالاردى وتكىزۋ ديرەكتسياسى, «Ski Club Astana» جانە «تاڭعاجايىپ ەلى» مەرەكەلەردى ۇيىمداستىرۋ اگەنتتىگى مۇرىندىق بولدى. جارىسقا 1 جاستان 6 جاسقا دەيىنگى ەڭ كىشكەنتاي 90 قاتىسۋشى نيەت ءبىلدىردى. ولار 500 مەترلىك قاشىقتىقتى ساموكاتپەن ءجۇرىپ ءوتتى. ال 6 جاستان 12 جاسقا دەيىنگى قاتىسۋشىلار ساموكاتپەن 1 شاقىرىم جولدى باعىندىردى. بارلىق بالالارعا باعالى سىيلىقتار رەتىندە ساموكاتتار, شلەم جانە ۆەلوسيپەدتەر سىيعا تارتىلدى. سونداي-اق, ۇلكەندەر ەكى قاشىقتىق بويىنشا ءوزارا باق سىنادى. ماسەلەن, ايەلدەر – 5 شاقىرىم, ال ەرلەر 10 شاقىرىم ارالىقتا سىنعا ءتۇستى.
جالپى, استانادا داۋن سيندرومى بار ءۇش جۇزدەن استام بالا تۇرادى. ەرەكشە تاعدىر يەلەرىنىڭ تولىق دامۋى ءۇشىن وڭالتۋ شارالارى ۇزدىكسىز جۇرگىزىلۋى قاجەت. وسى ورايدا 2016 جىلدىڭ قاراشاسىندا «اسىل بالا» قاۋىمداستىعىنىڭ قولداۋىمەن داۋن سيندرومى بار بالالارعا ارنالعان وڭالتۋ ورتالىعى اشىلعان بولاتىن. ال قايىرىمدىلىق جارىسىندا جينالعان قارجى وسىنداي ساناتتاعى بالالاردىڭ دامۋى مەن ەمىنە يگەرىلەتىنىن جەتكىزدى ۇيىمداستىرۋشىلار.
سەرىك جولداسباي
