موڭعوليانىڭ بايان-ولگەي ايماعىندا تۇراتىن, ەسىمى الەمگە تانىلعان قازاقتىڭ ورىمدەي بۇركىتشى قىزى ايشولپان نۇرعايىپقىزى اناسىمەن بىرگە تاريحي اتامەكەنىنە, ەل ورداسى – استاناعا كەلىپ, ون شاقتى كۇننەن بەرى تۋعان حالقىنىڭ ىستىق ىقىلاسىنا بولەنۋدە.
ايشولپان جاسىنان اكەسىنەن ۇيرەنگەن بۇركىتشىلىك ونەردى كاسىپ ەتكەن قىز بالا. ول تۋرالى العاش 2014 جىلى اعىلشىننىڭ Daily Mail باسىلىمىندا «قازاقتىڭ اسىل قۇندىلىقتاردىڭ ءبىرى – قۇسبەگىلىك ونەردى يگەرگەن ون ءۇش جاسار جالعىز قىز» اتتى ماقالا جاريالاندى. وسى دۇنيە ونى ءاپ-ساتتە جاھانعا تانىتتى. 2016 جىلى اتاقتى امەريكالىق رەجيسسەر وتتو بەلل ايشولپان تۋرالى «بۇركىتشى قىز» (The Eagle Huntress) دەپ اتالعان دەرەكتى فيلم ءتۇسىردى. بۇل تۋىندى دا قازاقتىڭ قارشاداي قايسار قىزىنىڭ داڭقىن جەر جۇزىنە جايدى. فيلم جارىققا شىققاننان كەيىن ونى اتاعىنان ات ۇركەتىن گارۆارد جانە وكسفورد ۋنيۆەرسيتەتتەرى وزدەرىندە ءبىلىم الۋعا شاقىردى.
بىلتىر «قازاقستان» ۇلتتىق ارناسىنىڭ ءتىلشىسى عابيت بوكەنباي بايان-ولگەيگە بارىپ ايشولپان تۋرالى تاماشا سيۋجەت جاساپ, جۇرتشىلىققا كورسەتتى. سوندا بۇركىتشى قارىنداسىمىزدىڭ «Google»-ءدىڭ مالىمەتى بويىنشا, XXI عاسىردا قازاقتى الەمگە ايگىلەگەن 5 ادام بولسا, سونىڭ بىرەۋى ەكەندىگىن, ودان قالدى, ايشولپاندى كورەمىز دەپ بايان-ولگەيگە 31 مەملەكەتتەن تۋريستەر كەلگەندىگىن ەستىپ, تاڭداي قاققانبىز. سول كەزدە قارىنداسىمىزدىڭ اتامەكەندى ءبىر كورسەم دەگەن ارمانى دا بار ەكەندىگىن بىلدىك.
مىنە, ايشولپاننىڭ سول ارمانى تولىقتاي ورىندالدى. ايتپاقشى, بۇركىتشى قىز بالا ۇلتتىق ارنا قولعا العان «كوشپەندىلەر» دەرەكتى فيلمىنە دە تۇسكەن. بۇل فيلمدەر توپتاماسى 12 بولىمنەن تۇرادى. وندا شەت ەلدە تۇراتىن قانداستاردىڭ ءومىرى, تاعدىرى باياندالعان. تۋىندى ۇلتتىق ارنادان 14 قازاننان باستاپ كورسەتىلە باستايدى.
سونداي-اق ەلىمىزگە العاش تابانى تيگەن ايشولپانعا «ءبىلىم – يننوۆاتسيا» قوعامدىق قورى دا تاماشا سىي جاسادى. قور باسشىسى دارحان وتە وعان تاريحي وتانىندا قالىپ, ەلورداداعى «Spectrum» حالىقارالىق مەكتەبىندە وقۋىن جالعاستىراتىن, قۇنى 20 مىڭ دوللار تۇراتىن ءبىلىم گرانتىن سالتاناتتى تۇردە تاپسىردى. قازىر ول بايان-ولگەيدەگى جەرگىلىكتى مەكتەپتە 12-ءشى سىنىپتا وقيدى ەكەن. دارحان وتە ءوز سوزىندە ايشولپانعا الەمدىك ۇزدىك جوعارى وقۋ ورىندارىندا ءبىلىم الۋعا بار مۇمكىندىكتى جاساۋ ءۇشىن وسى گرانتتى ۇسىنىپ وتىرعانىن ايتتى. ال «Spectrum» حالىقارالىق مەكتەبىنىڭ باسشىسى ارتۋر تولەپبەكوۆ ايشولپانعا بارلىق جاعداي جاسالاتىنىن جەتكىزدى. الماتىداعى سۇلەيمەن دەميرەل اتىنداعى ۋنيۆەرسيتەتى دە وزدەرىنىڭ كەز كەلگەن ماماندىققا وقۋعا تۇسەتىن ءبىلىم گرانتىن سىيلادى. وسىنداي كول-كوسىر قۋانىش ۇستىندە حالقىمىزدى جەر جۇزىنە تانىتقان جەتكىنشەكتى ومىرگە اكەلگەن اناسى الماگۇل كوزىنە جاس الىپ, قىزىنىڭ جاقسى ءبىلىم الۋىنا مۇمكىندىك تۋعىزعان ازاماتتارعا العىسىن ايتسا, ايشولپان دا قولداۋ كورسەتكەن اعالارىنا ريزاشىلىعىن ءبىلدىردى.
