ەلباسى ەلوردانىڭ اتىنا زاتى ساي بولۋى ءۇشىن ونداعى قوعامدىق ءتارتىپ ماسەلەسى ۇنەمى نازاردا تۇرۋى قاجەتتىگىن, وسىعان وراي قۇقىق قورعاۋ ورگاندارىنا ۇساق قىلمىستاردىڭ الدىن الىپ وتىرۋدى, بۇل ماسەلەگە بارىنشا ءجىتى قاراۋدى تاپسىرعان بولاتىن.
قوعامدىق قاۋىپسىزدىكتى جانە قۇقىقتىق ءتارتىپتى قامتاماسىز ەتۋ – قۇقىق قورعاۋ ورگاندارى قىزمەتىن باعالاۋدىڭ نەگىزگى ولشەمى, بيلىك ورگاندارىنا دەگەن ازاماتتار سەنىمىنىڭ ماڭىزدى شارتى. اسىرەسە, باس قالانىڭ قاۋىپسىزدىگى باستى نازاردا بولۋى ءتيىس. قالا تۇرعىندارىنا قاۋىپ توندىرەتىن تەرىس ارەكەتتەردىڭ ۇلكەن-كىشىسى بولمايدى. جاي عانا جول ۇستىندە بولعان جاپپاي توبەلەستىڭ ءوزى ءولىم-جىتىمگە سوقتىرۋى ابدەن مۇمكىن. ماسەلەن, جاقىندا ەلوردادا سونداي تارتىپسىزدىك تۋدىرعان توپ ۇستالىپ, پوليتسيا بولىمىنە جەتكىزىلگەن. تۇنگى ساعات 2.42-دە «102-گە» ش.قۇدايبەردىۇلى داڭعىلىندا توبەلەس بولعانى تۋرالى قوڭىراۋ تۇسكەن. قوعامدىق ءتارتىپتى بۇزعاندار تۇنگى ۋاقىتتا كافە-باردان شىعىپ, كەيىن توبەلەسكەنى انىقتالدى. اتالعان فاكتىگە سايكەس «بۇزاقىلىق» بابى بويىنشا قىلمىستىق ءىس قوزعالدى. تەرگەۋ امالدارى جۇرگىزىلۋدە. پوليتسيا دەپارتامەنتى ەلوردا تۇرعىندارى مەن قوناقتارىن قوعامدىق ءتارتىپتى قاتاڭ بۇزعانى ءۇشىن, اينالاسىنداعىلارعا قۇرمەتسىزدىك تانىتقانى ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى.
