تۇركيانىڭ الانيا قالاسىندا جىلداعىداي جاھاندىق جۋرناليستەر كونفەدەراتسياسىنىڭ (KGK) ءىىى جاھاندىق مەديا فورۋمى ءوتتى. بيىل 2-5 قاراشادا الەمنىڭ 32 ەلىنەن 50-گە جۋىق شەتەلدىك جانە تۇركيانىڭ وزىنەن 200-گە تارتا جەرگىلىكتى باق وكىلدەرى باس قوسقان جيىنعا قازاقستاندىق جۋرناليستەر دە قاتىسىپ قايتتى. فورۋم اياسىندا «زورلىق-زومبىلىقپەن كۇرەستەگى باق-تىڭ ماڭىزى مەن قىزمەتى» تاقىرىبىندا پىكىرسايىس جيىنى دا ءوتتى.
ناقتىراق ايتقاندا, قازاقستانداعى تۇركىتىلدەس جۋرناليستەر قورىنىڭ قولداۋىمەن ءبىر توپ قازاق جۋرناليستەرى اتالعان اۋقىمدى مەديا فورۋمنىڭ ورتاسىنان تابىلدى. قور پرەزيدەنتى ءنازيا جويامەرگەنقىزى باستاعان قازاقستاندىق باق وكىلدەرى فورۋم اياسىندا رەسەي, شۆەتسيا, فينليانديا, سولتۇستىك ماكەدونيا, ازەربايجان, موڭعوليا, سيريا, ساۋد ارابياسى, ءۇندىستان جانە تاعى دا باسقا ەلدەردەن كەلگەن ارىپتەستەرىمەن تانىسىپ, ءوزارا تاجىريبە الماستى. تۇركيانىڭ تانىمال كۋرورتتى قالاسىنداعى Alanya Eftelia Marin قوناقۇيىندە فورۋم شەڭبەرىندە وتكەن سەميناردا حالىقارالىق اۋقىمداعى كوپتەگەن ماڭىزدى ماسەلەلەر تالقىلاندى. شەتەلدىك جۋرناليستەرگە تۇسىنىكتى بولۋ ءۇشىن اعىلشىن جانە ورىس تىلدەرىنە ىلەسپە اۋدارمامەن قاتار ونلاين اۋدارما قىزمەتتەرى كورسەتىلدى.
-ءبىزدىڭ كوزقاراسىمىز ءبىر. ەڭ ماڭىزدىسى دوستىق پەن ءوزارا سىيلاستىقتى ساقتاۋدى كوزدەيمىز. باستى ماقساتىمىز – باۋىرلاس حالىقتاردىڭ قارىم-قاتىناسىن جاقسى دەڭگەيدە ۇستاپ تۇرۋ – دەپ اتاپ ءوتتى وتىرىستا «Dünya» گازەتىنىڭ ەكونوميكا ءبولىمىنىڭ باسشىسى احمەت دجوشكۋنايدىن.
فورۋم بارىسىندا الەمدىك قارجى داعدارىسىنا اكەلگەن پروبلەمالار, جۋرناليستەر اراسىندا جۇمىس ورىندارىنىڭ ازايۋى, سونداي-اق ءسوز بوستاندىعىن شەكتەۋگە قاتىستى ماسەلەلەر دە ايتىلدى. جۋرناليستەردىڭ حالىقارالىق ءوزارا ءىس-قيمىلىن نىعايتۋدىڭ ماڭىزدىلىعىن بارلىق قاتىسۋشىلار تىلگە تيەك ەتتى. سونىمەن قاتار تۇركيانىڭ بەلدى جوو پروفەسسورلارى باق جاستاردىڭ ءۇنىن جەتكىزۋدە بەلسەندىلىك تانىتىپ, ولاردىڭ ماسەلەلەرىنە بەي-جاي قاراماۋى كەرەكتىگىن ايتتى. جالپىحالىقتىق باق اسسامبلەياسىنىڭ مۇشەسى تولگا ۆارداننىڭ جۋرناليست ەكەندىگى جانە ونى مۇمكىندىگىنشە تەزىرەك بوساتۋ كەرەكتىگى دە ءسوز بولدى.
جاھاندىق جۋرناليستەر كونفەدەراتسياسىنىڭ پرەزيدەنتى مەحمەت الي ديم جۋرناليستەردىڭ جولىندا كەزدەسىپ جۇرگەن قازىرگى پروبلەمالارعا توقتالدى. جەرگىلىكتى جانە جالپىحالىقتىق باق-تىڭ الدىندا تۇرعان كاسىبي سالاداعى ماسەلەلەرگە قاتىستى ۇسىنىستار مەن ەسكەرتۋلەر تۋرالى حاباردار بولۋ دەڭگەيىن ارتتىرۋ ءۇشىن ءباسپاسوز حابارلامالارى, جارنامالىق ماتەريالدار مەن باعدارلامالار شىعارۋ تۋرالى شەشىم قابىلداندى.
فورۋمنىڭ سوڭعى بولىمىندە تۇركيا رەسپۋبليكاسىنىڭ 100 جىلدىعىنا وراي حالىق ديپلوماتياسىنا ۇلەس قوساتىن سالالار انىقتالدى جانە ءتيىستى جوسپار ازىرلەنىپ, 2024 جىلعا جول كارتاسى ۇسىنىلدى. KGك ۇيىمداستىرعان مەديا فورۋم سوڭىندا وسى سالاداعى ۇزدىك جۋرناليستەر ماراپاتتالىپ, بارلىق قاتىسۋشىلارعا ارنايى سەرتيفيكاتتار بەرىلدى. فورۋم Global Success Awards ماراپاتتاۋ راسىمىمەن اياقتالدى. وندا قازاقستاننىڭ تۇڭعىش عارىشكەرى, تۇركىتىلدەس جانە مۇسىلمان ەلدەرىنىڭ اراسىنان العاش عارىشقا ۇشقان توقتار اۋباكىروۆ جاھاندىق عىلىم جۇلدەسىمەن ماراپاتتالدى. مۇنداي اتاۋلى سىي جۇلدەلەر وزگە دە سالالاردا الەمدىك دەڭگەيدە جەتىسىكتىككە جەتكەن تۇلعالارعا بەرىلدى. الانيا تورىندە 550-دەن استام قوناق قاتىسقان مەرەكەلىك كەش ءتۇرلى ءىس-شارالارعا ۇلاستى. سالتاناتتى جيىن تىكەلەي ەفيردە تۇركيانىڭ 24 تەلەارناسى ارقىلى كورسەتىلدى. فورۋم باعدارلاماسىنا سايكەس وزگە شەتەلدىك ارىپتەستەرمەن بىرگە قازاقستاننان بارعان جۋرناليستەرگە الانيا قالاسىنداعى تاريحي كورنەكى ورىندارعا ەكسكۋرسيا جانە جەرورتا تەڭىزىندە كەمەمەن ساياحات ۇيىمداستىرىلدى.
رايحان راحمەتوۆا
