ماتەريالدىق كومەككە مۇقتاج بالالاردى قۋانتقىڭىز كەلە مە؟ جاقىندا قالاداعى «جاننۇر», «ەۆرازيا», «ماگنۋم», «Green» ساۋدا ورىندارى مەن ورتالىق بازار ماڭىنا پورتفەل ىسپەتتى كونتەينەر ورناتىلدى. وعان كيىم-كەشەك, كانتسەلياريالىق تاۋار نە وقۋعا قاجەتتى باسقا دا بۇيىمداردى سالىپ كەتە الاسىز. «مەيىرىمدى الاقان» دەپ اتالاتىن وسىناۋ اكتسيا 30 قىركۇيەككە دەيىن جالعاسادى. اكتسيا مارەگە جەتكەن سوڭ, جينالعان زاتتاردىڭ بارلىعى تۇرمىسى تومەن وتباسىلاردىڭ بالالارىنا بەرىلەدى.
يگىلىكتى باستامالار مۇنىمەن بىتپەك ەمەس. كەشە سارىارقا اۋداندىق اكىمدىگى مەن «نۇر وتان» پارتياسىنىڭ ۇيىمداستىرۋىمەن «بالالاردى مەكتەپكە دايىندايمىز» اتتى قايىرىمدىلىق شاراسى ءوتتى.
«ارسەنال» ويىن-ساۋىق ورتالىعىنىڭ كينوزالىندا ينە شانشار جەر جوق. ءبىز بارعاندا زالداعى بۇلدىرشىندەردىڭ ءبارى ساحنادا تۇرعان مۋلت-كەيىپكەرلەردىڭ قيمىلىن قايتالاپ جاتىر ەكەن. جۇزدەرى بال-بۇل جانادى. ويتپەگەندە شە؟! دەمەۋشى اعا-اپكەلەرى ولارعا سۋ جاڭا سومكە مەن قاعاز-قارىنداشتاردى سىيعا تارتپاقشى. ءماسليحات دەپۋتاتى تيمۋر ورازاقوۆتىڭ «بىلاي كەلىسەيىك. مىنا سومكەلەردىڭ ءىشى كىلەڭ «بەستىك» باعاعا تولسىن. وسىعان ۋادە بەرەسىڭدەر مە؟» دەگەن ءسوزىن بالاقايلار ءبىراۋىزدان قولداپ, باس يزەدى.
تۇرمىسى تومەن جانە كوپ بالالى وتباسىلاردان شىققان مىڭ جارىم بالاعا وقۋ قۇرالدارى ۇلەستىرىلدى. بۇل ساۋاپتى ىسكە «KEGOC» اق, «تەاترالنوە, 21» جشس, «اسەم» بازارى, «مەرەي» ساۋدا كەشەنى جانە «ارسەنال» ويىن-ساۋىق ورتالىعى دەمەۋشىلىك كورسەتىپتى.
«قىركۇيەكتەن باستاپ №58 مەكتەپتىڭ وقۋشىسى اتانامىن. ەندى مەنىڭ وقۋ قۇرالدارىم ءتۇپ-تۇگەل. ساباقتى ۇزدىك وقۋعا بار كۇشىمدى سالامىن» دەيدى اياجان اعىنان جارىلىپ. تەك اياجاننىڭ عانا ەمەس, شاراعا كەلگەن بارشا بالانىڭ كوڭىلى كوككە جەتكەنىنە ءبىز كامىل سەندىك.
بوتاگوز ماراتقىزى
