كەشە نۇر-سۇلتان قالاسى ءماسليحاتى VI شاقىرىلىمىنىڭ كەزەكتەن تىس سەسسياسى ءوتتى. كۇن تارتىبىندە ءۇش ماسەلە قارالدى.
ءبىرىنشى ماسەلە – «2016-2020 جىلدارعا ارنالعان استانا قالاسىن دامىتۋ باعدارلاماسى تۋرالى» قالالىق ءماسليحاتتىڭ 2015 جىلعى 11 جەلتوقسانداعى №427/61-V شەشىمىنە وزگەرىس ەنگىزۋ بويىنشا ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ بايانداما جاسادى. ونىڭ ايتۋىنشا, الەمدى دەندەگەن كوروناۆيرۋس ىندەتى مەن ەكونوميكالىق جاعدايدىڭ تۇراقسىزدىعى اتالعان باعدارلامانى قايتا قاراپ, وزگەرتۋ ەنگىزۋگە ءماجبۇر ەتكەن.
25 ينديكاتورعا تۇزەتىلدى
قازىرگى كۇنى ەلوردانى دامىتۋدىڭ 55 ينديكاتورى بەلگىلەنگەن. سونىمەن قاتار وعان قر يندۋستريا جانە ينفراقۇرىلىمدىق دامۋ مينيسترلىگىنىڭ ۇسىنىسىمەن وندىرىستىك تاۋارلاردىڭ قۇرامىنداعى جەرگىلىكتى مازمۇننىڭ ۇلەسى ينديكاتورى قوسىلدى. اتالعان ينديكاتور اعىمداعى جىلى قوسىلدى جانە ونىڭ تۇتىناتىن ونىمدەردەگى ۇلەسى 17,1 پايىزدان كەم بولماۋى ءتيىس دەپ بەكىتىلدى. استانانى دامىتۋ بويىنشا «جول كارتاسى» باعدارلاماسىن جۇزەگە اسىرۋ كەزىندە جەرگىلىكتى ۇلەسكە بارىنشا نازار اۋدارۋ مىندەتتەلدى. سونىمەن قاتار قر ەڭبەك جانە حالىقتى الەۋمەتتىك قورعاۋ مينيسترلىگىنىڭ 2020-2024 جىلدارعا ارنالعان ستراتەگيالىق جوسپارىنا سايكەس, ەڭبەككە قابىلەتتى جانداردىڭ ىشىندە اتاۋلى كومەكتى الۋشىلاردىڭ سىباعالى ۇلەسى بويىنشا تۇزەتۋ جاسالدى.
الەمدە جانە ءبىزدىڭ ەلىمىزدە ىندەتتىڭ بەلەڭ الۋى مەن قالىپتاسىپ وتىرعان ەكونوميكالىق جاعدايعا بايلانىستى جالپى 25 ينديكاتورعا وزگەرتۋلەر مەن تۇزەتۋلەر ەنگىزىلگەن. بۇل وزگەرتۋلەر تۇراقتى كوميسسيالاردىڭ وتىرىستارىندا قارالىپ, ءماسليحات دەپۋتاتتارى تاراپىنان بەكىتىلدى. قايسار ماڭقاراەۆ سول سەبەپتەن دەپۋتاتتاردى استانانى دامىتۋ باعدارلاماسىنا ەنگىزىلگەن ۇسىنىستاردى قولداۋعا شاقىردى.
زالدان دەپۋتاتتاردىڭ ءبىرى ءتىپتى ىندەت كەزىندە دە ادامدار سپورتپەن شۇعىلدانۋدى توقتاتقان جوق, سوندىقتان باسقاسى باسقا, بىراق بۇقارانىڭ سپورتپەن قامتىلۋ ينديكاتورىنىڭ تومەندەتىلگەنى دۇرىس ەمەستىگىن ايتىپ, نارازىلىق ءبىلدىردى.
– جەكە ادامداردىڭ سپورتپەن اينالىسقانى, ارينە قۇپتارلىق ءىس. بىراق ىندەتكە بايلانىستى ەلىمىزدە, ونىڭ ىشىندە استانادا دا سپورتتىڭ بارلىق تۇرلەرى بويىنشا ءىرى جارىستاردى, سوعان بايلانىستى شارالاردى وتكىزۋگە ۇكىمەت تىيىم سالدى. سوندىقتان سپورتتىق دامۋ ينديكاتورىن 0,5 پايىزعا تومەندەتتىك, – دەدى بايانداماشى.
وتاندىق ونىمگە ءمان بەرىلمەيدى
17 سايلاۋ وكرۋگىنىڭ دەپۋتاتى امان ايۋپوۆ تۇتىناتىن ءونىمنىڭ قۇرامىندا قازاقستاندىق مازمۇننىڭ ساقتالۋى, وتاندىق تاۋار وندىرۋشىلەرگە قولداۋ كورسەتۋ جاڭادان جۇمىس ورىندارىن اشۋعا, جەرگىلىكتى ءوندىرىستىڭ دامۋىنا تىكەلەي اسەر ەتەتىنى ءسوزسىز دەي كەلە, وسى باعىتتا كەي كەزدەرى ايتىلعان سوزبەن جاسالىپ جاتقان ىستەردىڭ قابىسپاي جاتقانىن سىنعا الدى.
– بۇل ماسەلەنى مەن تالاي رەت كوتەرىپ ءجۇرمىن. ماسەلەن, قازىر ەڭبەكپەن قامتۋدىڭ «جۇمىسپەن قامتۋدىڭ جول كارتاسى» بويىنشا «جاستار» سارايىنا كۇردەلى جوندەۋ جۇرگىزىلىپ جاتىر, وتاندىق كاسىپورىندارعا قولداۋ كورسەتۋ ءۇشىن وعان جەرگىلىكتى ماتەريالدارىن پايدالانۋ كەرەك ەدى, بىراق مەردىگەر كومپانيا قۇرىلىسقا قاجەتتى شىنى پاكەتتەردى رەسەيدەن تاسىمالدايدى. ال قازاقستاندا شىنى پاكەتتەرىن شىعاراتىن زاۋىتتار از ەمەس. كەيبىرىنىڭ ونىمدەرى ءتىپتى رەسەيلىك ونىمنەن اناعۇرىلىم ساپالى دا. سويتە تۇرا مەردىگەر كومپانيانىڭ رەسەيلىك شىنى پاكەتتەردى تاڭداۋى تۇسىنىكسىز, – دەپ دەپۋتات مەملەكەت قارجىسىنىڭ ەسەپسىز كەتىپ جاتقانىنا قارسىلىعىن ءبىلدىردى.
قايسار ماڭقاراەۆ جەرگىلىكتى مازمۇن ينديكاتورى ەلىمىزدە توتەنشە جاعدايلار جاريالانعاننان كەيىن ەنگىزىلگەنىن, ال مەردىگەر مەن رەسەيلىك جابدىقتاۋشى كومپانيالار اراسىنداعى شارت وعان دەيىن جاسالىپ قويۋى مۇمكىن ەكەنىندىگىن ءبىلدىردى. دەگەنمەن ناق «جاستار» سارايىنىڭ جوندەۋ جۇمىستارىنا رەسەيلىك ونىمدەردى قولدانۋعا قاتىستى تەحنيكالىق قاداعالاۋ, اۆتورلىق قاداعالاۋ ورگاندارى باقىلاۋ جۇرگىزۋى كەرەكتىگىن جەتكىزدى. سونىمەن قاتار قازىرگى كۇنى ساتىپ الۋلار بارىسىندا جابدىقتاۋشى كاسىپورىنداردان مىندەتتى تۇردە يندۋستريالدىق سەرتيفيكات تالاپ ەتىلەتىنىن, ول تاۋاردىڭ ناقتى قازاقستاندا جاسالعاندىعىن راستايتىن كۋالىك بولاتىنىن ايتتى.
– قازىر زاڭ وتاندىق وندىرىسشىلەردى قولدايدى. بۇگىندە «جۇمىسپەن قامتۋدىڭ جول كارتاسى» باعدارلاماسى بويىنشا مەملەكەتتىك ساتىپ الۋلاردا جەرگىلىكتى مازمۇن ۇلەسى 2,5 ەسەگە ارتتى, – دەپ سەندىردى ول.
دەپۋتاتتاردىڭ بىراۋىق پىكىرتالاستارىنان كەيىن ەكونوميكا جانە بيۋدجەتتىك جوسپارلاۋ باسقارماسىنىڭ ۇسىنىسى كوپشىلىك داۋىسپەن ماقۇلداندى.
جەر تەلىمىن الۋ تۋرالى
جەر ۋچاسكەلەرىن مەملەكەتتىك مۇقتاجدىق ءۇشىن الۋ نەمەسە جىلجىمايتىن مۇلىكتى يەلىكتەن شىعارۋ تۋرالى شارتتاردىڭ جوبالارىن كەلىسۋ جونىندەگى ەكىنشى ماسەلە بويىنشا تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى اسىلبەك ەسەنباەۆ بايانداما جاسادى. باسقارما 12 نىسان بويىنشا جالپى اۋماعى 2 مىڭ گەكتاردان اساتىن 68 جەر تەلىمىن 700 ملن تەڭگەگە ساتىپ الۋ تۋرالى شارتتاردى دەپۋتاتتار نازارىنا ۇسىندى. بايانداماشى ساتىپ الىناتىن ۋچاسكەلەردىڭ ناقتى قاي جەرلەردە ورنالاسقاندىقتارىن جەكە-جەكە اتاپ كورسەتتى. دەپۋتاتتار تاراپىنان ول بويىنشا ەشقانداي كەلىسپەۋشىلىك بولمادى, بايانداماشىعا ءبىر اۋىز سۇراق قويماستان ۇسىنىس بىردەن قابىلداندى.
اسىلبەك ەسەنباەۆ ودان كەيىن «تۇرعىن ءۇي عيماراتتارى مەن قۇرىلىستارىن اپاتتىق دەپ تانۋ ماسەلەلەرى جونىندەگى ۆەدومستۆولىق كوميسسيانىڭ قۇرامى تۋرالى» ءۇشىنشى ماسەلە بويىنشا دا بايانداما جاسادى. ونىڭ قۇرامى قالا اكىمدىگىندە ورىن العان بىرقاتار كادرلىق اۋىس-تۇيىستەرگە بايلانىستى وزگەرىسكە ۇشىرادى. دەپۋتاتتار قاۋىمى ۆەدومستۆولىق كوميسسيانىڭ قۇرامىنا ەنگەن جاڭا مۇشەلەردىڭ كانيداتۋرالارىن ءبىراۋىزدان ماقۇلدادى.
سونداي-اق بۇل كۇنى قالالىق ءماسليحاتتىڭ زاڭدىلىق, قۇقىق ءتارتىبى جانە قوعاممەن جۇمىس جاساۋ ماسەلەلەرى جونىندەگى تۇراقتى كوميسسياسىنىڭ وتىرىسى بولىپ ءوتتى.
كۇن تارتىبىندە نۇر-سۇلتان قالاسىنىڭ 2021-2023 جىلدارعا ارنالعان بيۋدجەت جوباسى قارالدى. ول بويىنشا ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ بايانداما جاسادى. ودان بولەك جەرگىلىكتى اتقارۋشى ورگانداردىڭ بىرقاتار باسشىلارى ءوز سالالارى بويىنشا ەسەپ بەرىپ, قازىرگى ىندەت كەزىندە قالىپتاسىپ وتىرعان جاعدايمەن ءبولىستى.
