اپتالىق ءداستۇرلى جيىندا قالا اكىمى باقىت سۇلتانوۆ ەلوردانى دامىتۋدىڭ جاڭا مودەلىن جاساۋعا بىرقاتار تاپسىرمالار بەردى. «مەملەكەت باسشىسى بىزگە جاقىن ارادا ورىندالۋى ءتيىس بىرقاتار باسىمدىق بەرىلگەن مىندەتتەردى جۇكتەدى» دەپ مالىمدەدى باسقوسۋدا قالا باسشىسى. ەلوردانى دامىتۋدىڭ جاڭا مودەلىن ەنگىزۋ جانە يننوۆاتسيالار مەن باستاماشىل ادامداردىڭ كوبەيتۋگە قولايلى ورتا قۇرۋ قالانى 2050 جىلعا دەيىن دامىتۋدىڭ ۇزاقمەرزىمدىك ستراتەگياسىن دايىنداۋدى تالاپ ەتەدى. مەملەكەت باسشىسى 2018 جىلدىڭ 11 قىركۇيەگىندە جاڭا ستراتەگيانى قۇرۋ جونىندە تاپسىرما بەرگەنى ءمالىم. قالا اكىمى اعىمداعى احۋالعا كەشەندى تالداۋ جۇرگىزۋدى, ستراتەگيالىق ماقساتتاردى انىقتاۋدى, كەلەشەكتى بولجاۋدى تاپسىردى: سونىڭ ىشىندە ءومىر ءسۇرۋ ساپاسىن جاقسارتۋ, قالالىق ورتانى ءۇيلەستىرۋ, ورنىقتى ەكونوميكالىق دامۋ, رەسۋرستاردى ءتيىمدى پايدالانۋ جانە باسقالارى بار.
استانانىڭ جاڭا مودەلىندە «استانا» حالىقارالىق قارجىلىق حابىنىڭ بازاسىندا ەلوردادا ىسكەرلىك قارجىلىق حابتى دامىتۋ تۋرالى تارماق بولۋى شارت. بۇل باعىت تۋريزم يندۋسترياسى سالاسىن كەڭەيتۋ بويىنشا جۇمىستاردى جانداندىرۋدى تالاپ ەتەدى. «وسىعان وراي, ىسكەرلىك تۋريزم سالاسىنداعى الدىڭعى قاتارلى حالىقارالىق ۇيىمدارمەن ىنتىماقتاستىق قارىم-قاتىناستاردى رەتكە كەلتىرۋىمىز كەرەك» دەدى قالا باسشىسى.
سونىمەن قاتار, قالا تۇرعىندارىنىڭ ءومىر سۇرۋىنە قولايلى جاعدايلار تۋعىزۋعا اتاپ ايتقاندا: اباتتاندىرۋ, الەۋمەتتىك نىسانداردى تۇرعىزۋ, تۇرعىن ۇيلەردى سالۋعا ايرىقشا كوڭىل بولۋگە مىندەت جۇكتەلدى. باقىت سۇلتانوۆ اعىمداعى جىلى كەم دەگەندە 2,3 ملن شارشى مەتر (2018 جىلدىڭ باسىنان بەرى 1699,6 مىڭ شارشى مەتر تۇرعىن ءۇي پايدالانۋعا بەرىلدى) تۇرعىن ۇيلەردى پايدالانۋعا بەرۋدى تاپسىردى. «اكىمدىكتىڭ جۇمىسى مەملەكەت باسشىسى جاريا ەتكەن بەس الەۋمەتتىك باستامانى جۇزەگە اسىرۋعا نەگىزدەلۋى ءتيىس. ويتكەنى بۇل مىندەتتەردى ورىنداۋ جاڭا جۇمىس ورىندارىن اشۋعا جانە قالانىڭ ەكونوميكالىق ءوسىمىن قامتاماسىز ەتۋگە جاعداي تۋعىزادى» دەپ اتاپ ءوتتى ب.سۇلتانوۆ.
