نۇرسۇلتان نازارباەۆ تسيفرلاندىرۋ ماسەلەلەرى جونىندەگى رەسپۋبليكالىق كەڭەسكە قاتىستى. ەلباسى ءىس-شارا الدىندا ارنايى ازىرلەنگەن كورمەنى ارالاپ كوردى. وندا ءتۇرلى باعىتتار بويىنشا 30-دان استام ءىت-جوبالار قويىلعان.
كەڭەسكە مەملەكەتتىك ورگانداردىڭ, ۇلتتىق كومپانيالاردىڭ جەتەكشىلەرى, پارلامەنت دەپۋتاتتارى, شەتەلدىك ءىرى كاسىپورىندار مەن كومپانيالاردىڭ وكىلدەرى قاتىستى.باسقوسۋدا پرەمەر-مينيستر باقىتجان ساعىنتاەۆ, اقپاراتتىق-كوممۋنيكاتسيالىق تەحنولوگيالار جانە يننوۆاتسيالار سالاسىنداعى ساراپشىلار بايانداما جاسادى.مەملەكەت باسشىسى «تسيفرلىق قازاقستان» مەملەكەتتىك باعدارلاماسىن تانىستىرۋ بارىسىندا ايتىلعان مالىمەتتەردى ەسكەرىپ, ەلىمىزدىڭ ەكونوميكاسىن دامىتۋ ءۇشىن تسيفرلىق تەحنولوگيالاردى قارقىندى ەنگىزۋدىڭ ماڭىزدىلىعىن اتاپ ءوتتى.
– ءبىز تاۋەلسىزدىك جىلدارى ىشىندە الەمنىڭ باسەكەگە قابىلەتتى 50 ەلىنىڭ قاتارىنا قوسىلدىق. قازىر وزىق دامىعان 30 ەلدىڭ قاتارىنا ەنۋ مىندەتى تۇر. ول قازاقستاننان جاڭا يننوۆاتسيالىق دامۋدى جانە جەدەل تەحنولوگيالىق جاڭعىرۋدى تالاپ ەتەدى. سوندىقتان مەن وسى جىلدىڭ باسىندا قازاقستان حالقىنا ارناعان جولداۋىمدا ءۇشىنشى جاڭعىرۋ جونىندە جاريالادىم. ونىڭ نەگىزى تسيفرلاندىرۋ بولىپ تابىلادى, – دەدى قازاقستان پرەزيدەنتى.
ەلباسى تسيفرلاندىرۋ كاسىپورىندار مەن جالپى ەلىمىزدىڭ باسەكەگە قابىلەتتىگىن, سونداي-اق حالىقتىڭ ءومىر ءسۇرۋ ساپاسىن ارتتىرۋ ءۇشىن قاجەت ەكەنىن ايتتى.
مەملەكەت باسشىسى وكىلەتتى ورگاندار مەن كاسىپورىندار تاراپىنان ەرەكشە ءمان بەرۋدى قاجەت ەتەتىن تسيفرلاندىرۋدىڭ جەكەلەگەن باعىتتارىنا توقتالدى.
– مەملەكەتتىڭ, جەكە كاسىپورىندار مەن ۇيىمداردىڭ ءوزارا ءىس-قيمىلىن جولعا قويۋ ماڭىزدى. بيزنەسكە تسيفرلىق تەحنولوگيالاردى كەڭ اۋقىمدا ەنگىزۋ ءۇشىن جاعداي جاساۋ كەرەك, – دەدى قازاقستان پرەزيدەنتى.
سونىمەن قاتار, ەلباسى بىلىكتىلىگى جوعارى مامانداردى دايارلاۋدىڭ ماڭىزدىلىعىنا توقتالىپ, ءبىلىم بەرۋ سالاسىنداعى ساياساتتى قايتا قاراۋ قاجەتتىگىن اتاپ ءوتتى.بۇدان بولەك, مەملەكەت باسشىسى عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ بازاسىندا, سونداي-اق يننوۆاتسيالىق كلاستەرلەر اياسىندا قۇزىرەتتىلىك ورتالىقتارىن دامىتۋ ماسەلەلەرىنە نازار اۋداردى.قازاقستان پرەزيدەنتى ءىت-ستارتاپتار حالىقارالىق تەحنوپاركىنىڭ جاڭا تەحنولوگيالاردى ازىرلەۋ مەن ولاردى ەنگىزۋ ماسەلەسىندە باستى ءرول اتقاراتىنىن ايتتى.
– ەلىمىزدىڭ قارجى سەكتورى وزىق تەحنولوگيالاردى مەيلىنشە سەزىنەتىن سالا بولعاندىقتان, تسيفرلاندىرۋعا قاتىستى شەشىمدەردى كەڭىنەن قولدانا باستادى. ول الداعى ۋاقىتتا دا وسى ۇدەرىستىڭ باسىندا بولۋى كەرەك. «استانا» حالىقارالىق قارجى ورتالىعىنىڭ الدىندا جاڭا قارجىلىق تەحنولوگيالار مەن قۇرالداردى دامىتۋ مىندەتى تۇر, – دەدى ەلباسى.نۇرسۇلتان نازارباەۆ بەلگىلەنگەن مىندەتتەردى شەشىپ, عىلىمي زەرتتەۋلەر مەن ازىرلەمەلەردى ىنتالاندىرۋ ءۇشىن نورماتيۆتىك قۇقىقتىق بازانى جەتىلدىرۋدى تاپسىردى.
سوڭىندا مەملەكەت باسشىسى بولاشاقتاعى جاھاندىق سىن-تەگەۋرىندەر مەن تەحنولوگيالىق ترەندتەردى زەرتتەۋ قاجەتتىگىن اتاپ ءوتتى.
– بۇگىن ايتىلعان ماسەلەلەردىڭ بارلىعى ەلىمىزدىڭ ءۇشىنشى جاڭعىرۋى اياسىنداعى ماڭىزدى مىندەتتەر سانالادى. ۇكىمەت ولاردى مەملەكەتتىك باعدارلامادا ەسكەرۋى قاجەت. سونداي-اق, ورتاق ماسەلەلەردى شەشۋ ءۇشىن ەۋرازيالىق ەكونوميكالىق كوميسسيا اياسىندا ارناۋلى كوميسسيا قۇرۋ كەرەك. سونىمەن قاتار, باعدارلامانى جەتىلدىرە ءتۇسۋ ءۇشىن پرەزيدەنت جانىنان كوميسسيا قۇرۋدى تاپسىرامىن, – دەپ تۇيىندەدى قازاقستان پرەزيدەنتى.
