«كاسىبى باردىڭ, ءناسىبى بار» دەپ بەكەر ايتىلماسا كەرەك. ەلىمىزدە وسى سالانى دامىتۋعا ەرەكشە دەن قويىلعان. جەكە ءىسىن اشقان ازاماتتاردىڭ بۇگىندە ءىسى دوڭگەلەنىپ, كاسىپ اياسى كەڭەيگەن. ال شاعىن كاسىپكەرلىكتى دامىتۋدا «دامۋ» كاسىپكەرلىكتى دامىتۋ قورىنىڭ كومەگى كوپ. قوردىڭ قولداۋىنا يە بولعان سونداي كاسىپكەرلەردىڭ ءبىرى – استانالىق «Ultraline» مەديتسينالىق ورتالىعىنىڭ ديرەكتورى, اكۋشەر-گينەكولوگ ماقپال قاسىموۆا.
ەڭ اۋەلى كاسىبىن كەڭەيتۋ ءۇشىن ماقپال قاسىموۆا «بيزنەستىڭ جول كارتاسى – 2025» باعدارلاماسىمەن «حالىق» بانكى ارقىلى 7 جىلعا 70 ميلليون تەڭگە نەسيە راسىمدەگەن. ودان كەيىن 200 ميلليون جانە 106 ميلليون تەڭگەگە تاعى نەسيە العان ەدى. بۇگىندە 14 پايىزدىق نەسيەنىڭ 8 پايىزى قوردان تولەنسە, 6 پايىزىن كاسىپكەر ءوزى وتەيدى. كاسىپكەر بۇل كاسىپتى 2018 جىلى باستاعانىن ايتادى. العاشقى كەزدەرى قيىندىقتىڭ بولعانىن جاسىرمايدى. اۋەل باستا كاسىبىن ءبىر عانا بولمەدەن باستاعان ەدى. كەيىن تاعى ەكى بولىمشە اشتى.
«2020 جىلى ءوز مەديتسينالىق ورتالىعىمدى اشۋدى جوسپارلادىم. سول كەزدە «ۆتب» بانكى ورتاق جوبا ۇسىندى. كەيىن بىرلەسىپ, اتالعان جوبامەن ۇزاق جۇردىك. سەبەبى ەسەپ-قيسابىمىز تۇگەل ەمەس ەدى. دەگەنمەن دە, نەسيە الىپ, وسى عيماراتقا قول جەتكىزدىك. ءبىر جىل كولەمىندە جوندەۋ جۇمىستارىن جۇرگىزىپ, كەلۋشىلەردى قابىلداۋدى ءساتتى باستاپ كەتتىك. كاسىپ اشامىن دەيتىندەر الدىمەن, قارجىلىق ساۋاتتىلىقتى مەڭگەرگەنى دۇرىس. ەكىنشى دەڭگەيلى بانكتەردىڭ ىشىنەن شاعىن كاسىپ باستاۋعا «حالىق بانكى» ءتيىمدى شارتتاردى ۇسىنادى. سوندىقتان ءوزىم وسى بانكتى تاڭدادىم» دەدى ول.
مەملەكەتتىك باعدارلاما يگىلىگىمەن كاسىپكەر نەسيە قارجىسىنا سوڭعى ۇلگىدەگى قۇرال-جابدىقتار الىپ, قىزمەت اياسىن كەڭەيتكەن. قازىرگى تاڭدا قالا بويىنشا «Ultraline» مەديتسينالىق ورتالىعىنىڭ 6 بولىمشەسى بار. وندا 100-گە جۋىق قىزمەتكەر جۇمىس ىستەيدى. كۇندەلىكتى ساعات 8.00-دەن 20.00-گە دەيىن قىزمەت كورسەتەدى. الداعى ۋاقىتتا ورتالىق باسشىسى جۇمىس كەستەسىن 24/7 رەجيمدە ىسكە قوسۋدى جوسپارلاپ وتىر. قالاداعى بەدەلدى مەديتسينالىق ورتالىقتا, نەگىزىنەن, گينەكولوگيا مەن ۋلترادىبىستىق زەرتتەۋگە باسىمدىق بەرىلگەنىمەن, مۇندا تەراپەۆت, ەندوكرينولوگ, ۋرولوگ سەكىلدى ماماندار دا بار. سوندىقتان قازىرگى تاڭدا حالىقتىڭ بۇل مەديتسينالىق ورتالىقتىڭ قىزمەتىنە سۇرانىسى جوعارى.
– وسى ورتالىققا ۋدز-گە ءتۇسىپ, قارالىپ ءجۇرمىز. مامانداردىڭ كورسەتىپ جاتقان مەديتسينالىق كومەكتەرىنە كوڭىلىمىز تولادى. اسىرەسە, باعاسى قالاداعى ورتالىقتارمەن سالىستىرعاندا قولجەتىمدى. ورتالىق ىشىندە ءدارىحانا دا بار بولعانى ءتيىمدى, – دەيدى ەلوردا تۇرعىنى ديلناز راحات.
ال 50 جىل ەڭبەك ءوتىلى بار تاجىريبەلى اكۋشەر-گينەكولوگ ءامينا كۋلشاريپوۆا وسى ورتالىقتا ەكى جىلدان بەرى ەڭبەك ەتەدى ەكەن. ول كەلگەن ناۋقاستىڭ دياگنوزىن انىقتاپ, اناليزدەردى وزدەرىنىڭ زەرتحانالارىندا تاپسىرتىپ, قاجەت ءدارى-دارمەگىن دە ورتالىقتا ورنالاسقان ءدارىحانادان الۋدى ۇسىنامىز دەيدى. ايتۋىنشا, مەديتسينالىق ورتالىقتا كەلۋشىلەر ءۇشىن بارلىق جاعداي جاسالعان.
ەلىمىزدەگى شاعىن جانە ورتا بيزنەستى دامىتۋ ماقساتىندا قۇرىلعان «دامۋ» كاسىپكەرلىكتى دامىتۋ قورى «كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى» باعدارلاماسى اياسىندا ەكىنشى دەڭگەيلى بانكتەر ارقىلى پايىزدىق مولشەرلەمەنى سۋبسيديالاۋ جانە كەپىلدىك بەرۋ بويىنشا كومەك كورسەتەدى.
