استانا قالاسى تاريحي-مادەني مۇرا وبەكتىلەرىن جانە ەسكەرتكىشتەردى ساقتاۋدى قامتاماسىز ەتۋ ورتالىعىنىڭ مامان-ادىسكەرى ايىمگۇل جۇماباەۆا اسكەري قولباسشى, گەنەرال-مايور, كەڭەس وداعىنىڭ باتىرى يۆان پانفيلوۆتىڭ تۋعانىنا 130 جىل تولۋىنا وراي «ۇلى ەرلىك – ۇرپاققا ۇلگى» تاقىرىبىمەن سەرۆيس جانە تۋريزم كوللەدجىنىڭ ستۋدەنتتەرىنە ءدارىس وقىدى.
يۆان پانفيلوۆ ۇلى وتان سوعىسى باستالعان العاشقى كۇندەرى, 1941 جىلعى ماۋسىمدا الماتىدا 316-اتقىشتار ديۆيزياسىن قۇردى. داڭقتى باتىر باۋىرجان مومىشۇلى وسى ديۆيزيانىڭ باتالون كومانديرى بولدى. ءدال وسى ديۆيزيا 1941 جىلدىڭ قازان-قاراشا ايلارىندا ماسكەۋ تۇبىندە, ۆولوكولامسك باعىتىندا جاۋمەن شايقاسىپ, فاشيستەردى تويتاردى. ال پانفيلوۆتىڭ ءوزى شايقاستا قازا بولدى. ماسكەۋدەگى «نوۆودەۆيچي» زيراتىندا جەرلەندى. 1942 جىلى ساۋىردە پانفيلوۆقا قازا بولعاننان كەيىن كەڭەس وداعىنىڭ باتىرى اتاعى بەرىلدى.
گەنەرال قازا بولعان گۋسەنەۆو اۋىلىندا ەسكەرتكىش ورناتىلدى. ونىڭ ەسىمى قازاقستاننىڭ, قىرعىزستاننىڭ, بەلارۋستىڭ جانە رەسەيدىڭ ءارتۇرلى قالالارىنداعى كوشە مەن مەكتەپ اتاۋلارىنا بەرىلدى. استانادا دا يۆان پانفيلوۆ كوشەسى بار. قازاقستاندا جەتىسۋ وبلىسىنىڭ قۇرامىندا جانە قىرعىزستاندا شۋ وبلىسىندا پانفيلوۆ اۋدانى بار.
يۆان پانفيلوۆ ەسكەرتكىشى بىشكەكتە تۇرعىزىلدى. استاناداعى «جەرۇيىق» ساياباعىندا دا 2015 جىلدىڭ 7 مامىرىندا جەڭىستىڭ 70 جىلدىعىنا وراي قولادان قۇيىلعان ەسكەرتكىشى اشىلدى. ونىڭ بيىكتىگى – 2,5 مەتر. اۆتورى – رەنات ابەنوۆ. ەسكەرتكىشتىڭ شىعىس جاعىندا اللەيانىڭ بويىندا تابيعي گرانيتتەن 28 جاۋىنگەر-پانفيلوۆشىنىڭ اتتارى, تۋعان جىلدارى مەن قازا تاپقان كۇندەرى جازىلعان ەسكەرتكىش-تاقتا مەن ستەللا ورناتىلدى.
