استانانىڭ ورتالىق تەمىرجول اۋرۋحاناسىندا ورىنسىز جاعداي بولدى. دارىگەر پاتسيەنتتى ساباپ تاستاعان. بۇل وقيعانىڭ بەينەجازباسى الەۋمەتتىك جەلىلەر ارقىلى تاراپ كەتىپ, ءبىراز دۇربەلەڭ تۋدىردى. كەشە اتالمىش اۋرۋحانانىڭ باس دارىگەرى سەرگەي دەموچكين مەن قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا جۋرناليستەردى جيناپ, جاعدايدى ءتۇسىندىردى.
باس دارىگەردىڭ ايتۋىنشا, وقيعا قازاننىڭ بىرىنەن ەكىسىنە قاراعان ءتۇنى بولدى. باستىڭ جاراقاتىن العان ماس ادامدى جەدەل جاردەم كولىگى ساعات 00.40-تا اۋرۋلاردى قابىلدايتىن بولمەگە جەتكىزدى. «ناۋقاستى اۋرۋحاناعا جاتقىزۋ قاجەتتىلىگى تۋىندامادى. ونى كەزەكشى نەيروحيرۋرگ تەكسەرىپ, العاشقى مەديتسينالىق كومەك كورسەتتى. ناۋقاس جان-جاعىن جايپاپ كەتەرلىك ارەكەت كورسەتىپ, دارىگەرلەردى بوقتاعان. ءتيىستى ەم-دومنان كەيىن دارىگەرلەر دەنساۋلىعىنا قاتىستى ۇسىنىستاردى ايتىپ, ۇيىنە جىبەرگەن. ناۋقاس شىعىپ كەتتى» دەدى س.دەموچكين.
ارادا ءبىرشاما ۋاقىت وتكەندە ول قايتىپ كەلگەن. «ۇيالى تەلەفونىنىڭ قايدا قالعانىن بىلمەي, اۋرۋحانادا سونى الىپ قويدى دەپ ويلاپ, مەيىربيكەلەرگە ءتيىسىپ, تەلەفوننىڭ وزىنە قايتارىلۋىن تالاپ ەتكەن. وسى كەزدە اۋرۋلاردى قابىلداۋ بولمەسىندە كەزەكشى تەراپەۆت بولدى. ناۋقاس سوعان بارىپ سوقتىعىپ, ونىڭ تەلەفونىنا جارماستى. ارينە, ارادا جانجال تۋدى. پاتسيەنت بوقتىقتى بوراتىپ, بوكستان سپورت شەبەرى ەكەنىن ايتىپ, دارىگەردى جەكپە-جەككە شاقىردى. ناۋقاس ءبىرىنشى بولىپ قول جۇمسادى. ءبىر-ەكى سوققىدان سوڭ دارىگەر شىداماي كەتىپ, پاتسيەنتتى يتەرىپ جىبەردى. ناۋقاس قۇلاعان سوڭ دارىگەر ءوزىن-ءوزى ۇستاي الماي, تەۋىپ جىبەرگەن» دەدى باس دارىگەر.
اۋرۋحانا باسشىسىنىڭ سوزىنشە, وقيعا بويىنشا ماتەريالدار قالالىق ىشكى ىستەر دەپارتامەنتىنە تاپسىرىلدى. قازىرگى تاڭدا تەرگەۋ جۇرگىزىلىپ جاتىر. اۋرۋحانا تاراپىنان قىزمەتتىك تەكسەرۋ باستالدى. «ءبىز دارىگەرىمىزدىڭ ءىس-ارەكەتىن اقتامايمىز. ەتيكانى بۇزعانى ءۇشىن ونى جۇمىستان شىعارامىز. 26 جاستاعى تەراپەۆت بىزدە ءۇش جىل بويى جۇمىس ىستەدى» دەدى س.دەموچكين.
ونىڭ ايتۋىنشا, وسىنداي جاعدايلار اۋرۋحانادا ءار اي سايىن بولىپ تۇرادى. بىراق كوبىنەسە ەلدىڭ كوزىنە تۇسە قويمايدى. ماسەلەن, وتكەن جۇما, 28 قىركۇيەك كۇنى اۋرۋحاناعا ماس بولىپ تۇسكەن پاتسيەنت كۇزەتشى مەن مەيىربيكەنى ساباپ, سوڭعىسىنىڭ جاعىن سىندىرعان. قازىر مەيىربيكە ەم الىپ جاتىر.
«وقيعا تۋرالى ەستىگەن سوڭ, قىزمەتتىك تەكسەرۋ جۇرگىزدىك. ەندى ءبىر اپتانىڭ ىشىندە اۋرۋحانالاردىڭ اۋرۋلاردى قابىلداۋ بولمەلەرىندەگى بەينەكامەرالاردى باسقارما باسشىلىعىنىڭ كابينەتىندەگى مونيتورلارعا قوسۋدى شەشتىك. ياعني, جاعدايدى ءوزىمىز باقىلاۋىمىز كەرەك. ال وسى وقيعا بويىنشا ىشكى ىستەر دەپارتامەنتى ءتيىستى شارالار قابىلدايتىنىنا سەنىمدىمىز» دەدى ءا.رۇستەموۆا.
