نۇر-سۇلتان قالاسى ءماسليحاتىنىڭ الداعى وتىرىستارىنىڭ بىرىندە «دەپۋتات كۇنى» اياسىندا ەلوردانىڭ دەنساۋلىق ساقتاۋ سالاسىنىڭ جاعدايى قارالادى. تابالدىرىعىمىزدان اتتاعالى تۇرعان جىلدىڭ باسىنان ەلىمىزدە مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلەتىنىن ەسكەرسەك, بۇل اسا ماڭىزدى ءىس بولىپ وتىر. وسىعان وراي ءماسليحات دەپۋتاتتارى قالاداعى بىرقاتار مەديتسينا نىساندارىن ارالاپ, سولاردىڭ جۇمىسىمەن تانىسىپ شىقتى.
دەپۋتاتتار بارعان العاشقى نىسان قالالىق فتيزيوپۋلمونولوگيا ورتالىعى بولدى. بۇل نىسان ستاتسيونارىنىڭ جالپى قۋاتى – 320 توسەك ورىن. اۋىسىمىنا مۇندا 209 كەلۋ تىركەلەدى. ورتالىق زامانعا ساي قوندىرعىلارمەن جابدىقتالعان. اتاپ ايتقاندا, كومپيۋتەرلىك توموگرافيا, رەنتگەن ورناتىلعان. كومپيۋتەرلىك وتا بولمەسىندەگى بەينەكامەرا ونلاين تۇردە وتاندىق جانە شەتەلدىك مەديتسينا ماماندارمەن كەڭەسۋگە, كونسيليۋم وتكىزۋگە مۇمكىندىك بەرەدى.
مۇنداعى باستى ماسەلە دارىگەرلەردى باسپانامەن قامتۋعا تىرەلىپ وتىر. سول سەبەپتەن كادردىڭ تۇراقتاماۋى, مامانداردىڭ تاپشىلىعى ورىن الدى. وسىنداي تۇيتكىل №2 قالالىق بالالار اۋرۋحاناسىندا دا بار.
«بىزدەگى دارىگەر مامانداردىڭ 40 پايىزىنىڭ باسىندا باسپانا جوق. اراسىندا 15-20 جىلدان بەرى باسپانا كەزەگىندە تۇرعان سانيتارلار, مەيىربيكەلەر بار. ال رەانيماتولوگ, حيرۋرگ, نەيروحيرۋرگ سەكىلدى قالاعا ناعىز كەرەك ماماندارعا باسپانا بەرىلەر بولسا, ولاردى ءبىز جۇمىسقا شاقىرار ەدىك. قازىر كەيبىر قىزمەتتەردى اۋتسورسينگكە بەردىك. سوندىقتان بەس-التى شارۋاشىلىق بولمەمىز بوساپ وتىر. بۇل بولمەلەردى ادامدار تۇراتىنداي ەتىپ ىڭعايلاۋعا بولادى. سولارعا باسپانادان قينالىپ جۇرگەن مامانداردى ۋاقىتشا كىرگىزەر ەدىك. بىراق ول ءۇشىن اكىمدىكتىڭ قاۋلىسى شىعۋى كەرەك. بۇل قۇجات وسىنداي بولمەلەردى تۇرعىن ءۇي قورىنا تىركەۋ ءۇشىن قاجەت» دەيدى №2 قالالىق بالالار اۋرۋحاناسىنىڭ ديرەكتورى ءبىرجان دوسمايىلوۆ.
قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا ماسەلەنى شەشۋ ءۇشىن دارىگەرلەرگە ارنالعان وتباسىلىق جاتاقحانا سالۋ ماسەلەسىن كوتەرگەندەرىن ايتتى.
«قالالىق ءبىلىم باسقارماسىندا جاتاقحانا بار. ولار جاس ماماندارىمىزعا 16 ورىن بەردى. بىراق بۇل تىم از بولىپ تۇر. وزىمىزگە جاتاقحانا سالۋ كەرەك. ءبىز ءتيىستى جەر تەلىمىن سۇرادىق. باستاپقىدا قاراعاندىعا شىعاتىن تاسجولدىڭ بويىنان جەر تەلىمى بەرىلەدى دەگەن جاۋاپ العان ەدىك. الايدا كەيىننەن بۇل بەرىلمەيتىن بولدى» دەدى ول.
№2 قالالىق بالالار اۋرۋحاناسىندا مەديتسينالىق قوندىرعىلاردان دا تاپشىلىق بار. ەكى رەنتگەن اپپارات جۇمىس ىستەيدى. تاۋلىگىنە مۇندا 300-400 ادام تەكسەرىلەدى. «بۇل ءبىر ەمحانانىڭ ايلىق نورماسى. قازىر رەنتگەنگە ءتۇسىرۋ كورسەتكىشى جاعىنان ەلىمىزدە ءبىرىنشى ورىندا كەلە جاتىرمىز. بىزگە ءالى كومپيۋتەر توموگرافى, مرت اپپاراتى كەرەك. ناۋقاستاردى قابىلداۋ بولمەسىنىڭ لوگيستيكاسىن دا ىستەسەك, تاماشا بولار ەدى» دەدى اۋرۋحانا ديرەكتورى.
«ءوندىرىس» تۇرعىن الابىنداعى ەمحانا ماسەلەسى كوپتەن بەرى تۇيتكىل تۋدىرعان ەدى. بۇل ماسەلە قازىر شەشىلىپ كەلە جاتىر. ءماسليحات دەپۋتاتتارى سونداعى «جانۇيا» وتباسىلىق دەنساۋلىق ورتالىعىنا دا باردى.
«بۇرىن №3 قالالىق ەمحانا يەلىگىندە بولعان جەر تەلىمىن الدىق. مۇنداعى ەمحانانىڭ ءوزى تۇرعىن ءۇيدىڭ ءبىرىنشى قاباتىندا ورنالاسقان بولاتىن. ءبىز جاڭا مەديتسينالىق ورتالىقتى ءوزىمىز سالدىق. قازىر مەملەكەتتىك تاپسىرىس اياسىندا 13 مىڭ ادامعا قىزمەت كورسەتەمىز. اۋىسىمىنا بىزگە 50 ادام كەلەدى. جاقىندا جەدەل جاردەم قىزمەتىن ەنگىزەمىز» دەدى ورتالىق ديرەكتورى گۇلميرا بەكەتوۆا نىساندى ارالاتىپ.
دەپۋتاتتار ءدارى-دارمەكپەن قامتاماسىز ەتۋ, ناۋقاستارعا قىزمەت كورسەتۋ, ەمدەۋ جاعدايلارىمەن تانىستى. ءماسليحاتتىڭ الداعى وتىرىسىندا انىقتالعان ماسەلەلەر قارالاتىن بولادى.
