دوستىق ۇيىندە قازاقستان تاۋەلسىزدىگىنىڭ 30 جىلدىعىنا وراي «قازاق ۇلتتىق مۇراسى» اتتى قازاقتىڭ سالت-داستۇرلەرىن دارىپتەۋ بويىنشا بايقاۋ وتكىزىلدى. شاراعا قالانىڭ ەتنومادەني بىرلەستىكتەرىنىڭ وكىلدەرى قاتىستى.
ءداستۇرلى بايقاۋدى ەلوردالىق قازاقستان حالقى اسسامبلەياسى ۇيىمداستىردى. «بۇل – قازاقستان حالقى اسسامبلەياسىنىڭ ۇيىمداستىرۋىمەن ەلوردانىڭ باسقا دا ەتنوستارىنا ارنالعان بايقاۋ. ءتۇرلى ەتنوس وكىلدەرى قازاقتىڭ سالت-ءداستۇرىن, مادەنيەتىن, ادەت-عۇرپىن كورسەتتى. قاتىسۋشىلار قازاق ءتىلىن مەڭگەرۋ دەڭگەيىن كورسەتىپ, تەاترلاندىرىلعان كورىنىستەر قويدى. سول سياقتى جامبىل جاباەۆتىڭ 175 جىلدىعىنا وراي اقىننىڭ ولەڭدەرىن جاتقا وقىدى. بايقاۋ ءداستۇرلى تۇردە جىل سايىن وتكىزىلەدى» دەدى نۇر-سۇلتان قالاسى اكىمدىگى جانىنداعى «قوعامدىق كەلىسىم» كمم باسشىسىنىڭ ورىنباسارى نۇركەن ابدىعالي.
الدىمەن قاتىسۋشىلار تۇساۋكەسەر, توقىمقاعار, بەلكوتەرەر سياقتى قازاقتىڭ سالت-داستۇرلەرىن كورسەتتى. ەكىنشى كەزەڭدە ءتۇرلى اسپاپتاردا ۇلتتىق اندەر ورىندالسا, سوڭعى كەزەڭدە جامبىل جاباەۆتىڭ شىعارمالارى جاتقا ايتىلدى.
ءبىرىنشى تۋردىڭ جەڭىمپازى وزبەك ەتنومادەني ورتالىعى بولدى, ەكىنشى ورىندى «دالا ولكەسى كازاكتارىنىڭ وداعى», ال ءۇشىنشى ورىندى «ۆايناح» شەشەن-ينگۋش ەتنومادەني ورتالىعى يەلەندى.
بايقاۋدىڭ ەكىنشى ءان كەزەڭىندە «ۆايناح» شەشەن-ينگۋش ەتنومادەني ورتالىعىنا تەڭ كەلەر ەشكىم بولمادى, تورەشىلەر كۇمىستى «جايحۋن» قاراقالپاق ەتنومادەني بىرلەستىگىنە بەردى.
جامبىل جاباەۆتىڭ شىعارمالارىن مانەرلەپ وقۋ بايقاۋىندا «ۆايناح» شەشەن-ينگۋش ەتنومادەني ورتالىعى ءبىرىنشى ورىندى, ەكىنشى ورىندى «جايحۋن» قاراقالپاق ەتنومادەني بىرلەستىگى, ءۇشىنشى ورىندى «اقبوزات» باشقۇرت ەتنومادەني بىرلەستىگى يەلەندى.
«ەلوردالىق دوستىق ۇيىندە 22 ەتنومادەني بىرلەستىك جۇمىس ىستەيدى. ءبارىمىز تاتۋ ءومىر سۇرەمىز. مۇنداي بايقاۋدا داستۇرلەردى دارىپتەپ, جاستارعا ناسيحاتتايمىز. وسىمەن ءبىز ەكىنشى جۇلدەلى ورىنعا يە بولدىق» دەيدى «دالا ولكەسى كازاكتارى وداعىنىڭ» مۇشەسى, 73 جاستاعى ءشاريپا جەتپىسباەۆا.
بايان اسىلبەكوۆا
