داۋىرلەردىڭ ءدۇبىرى

«ءبىزدىڭ تاريح – ول دا ءبىر قالىڭ تاريح, وقۋلىعى جۇپ-جۇقا بىراق تاعى» دەپ قادىر اقىن ايتپاقشى, كەشەگى كەڭەستىك كەزەڭدە سان عاسىرلىق تاريحىمىزدىڭ بەتى تۇمشالاۋلى بولدى. تاۋەلسىزدىگىمىزدى العاننان كەيىن عانا ۇلتتىڭ قالىپتاسۋ جولدارىن, قازاقتى قازاق ەتكەن تۇلعالاردىڭ ءومىرى مەن ەڭبەگىن زەرتتەپ, زەردەلەۋگە مۇمكىندىگىمىز تۋدى.

«قازاقستان» ورتالىق كونتسەرت زالىندا استانا قالاسى مادەنيەت, مۇراعاتتار جانە قۇجاتتاما باس­قارماسىنىڭ
قولداۋىمەن وتكەن «بابالارىم, راقمەت سەندەرگە!» اتتى كونتسەرت-سپەكتاكل كەشە مەن بۇگىننىڭ اراسىنا كوپىر ورناتىپ, داۋىرلەردىڭ ءدۇبىرىن كورەر­مەندەردىڭ قۇلاعىنا جەت­كىزدى. ال ونەرسۇيەر قاۋىم­نىڭ كوز الدىنان عاسىرلاردىڭ پانوراماسى ءجۇرىپ ءوتتى دەسەك تە بولادى.
ايگۇل يمانباەۆانىڭ مۋزىكالىق تەاترى ۇيىمداستىرعان كەشتىڭ لەيتموتيۆى رەتىندە اقيىق اقىن مۇقاعالي ماقاتاەۆتىڭ ايگىلى ولەڭ جولدارى الىندى. قويىلىمنىڭ يدەياسى دا مۇزبالاق اقىننىڭ:
بابالارىم, راقمەت سەندەرگە!
بالالارىم بولماسىن دەپ كور-كەۋدە,
قوبىزىڭمەن قوسىپ ءان مەن ءتىل بەردىڭ,
ومىرگە مەن مىلقاۋ بولىپ ەنگەندە… – دەگەن شۋماعىندا جاتىر دەپ ۇقتىق.
سپەكتاكل ءا دەگەننەن-اق قازاقستاننىڭ حالىق ءارتىسى تىلەكتەس مەيراموۆ سومداعان پروفەسسور مەن ونىڭ الدىنداعى شاكىرتتەر بەينەلەرى ارقىلى وسى ويعا جەتەلەي جونەلەدى. وقىتۋشى ستۋدەنتتەرگە ۇلتتىق قۇندىلىقتار تۋرالى ەسسە جازىپ كەلۋگە تاپسىرما بەرەدى. جاستار شىعارما جازۋ بارىسىندا تاريحي تۇلعالارمەن جولىققانداي, تىلدەسكەندەي, سولاردان اقىل-كەڭەس سۇراعانداي بولادى.
ستۋدەنتتەر سوناۋ ساقتار مەن عۇندار زامانىنا ساپار شەگىپ, زامانا سىرلارىنا قانىعادى. بەلگىلى اكتەر, قر ەڭبەك سىڭىرگەن مادەنيەت قايراتكەرى بولات ءابدىلمانوۆ ولارعا ۇلى اباي بولىپ ءتىل قاتادى.
بيىل الاشوردا ۇكىمەتىنىڭ قۇرىلعانىنا 100 جىل تولادى. قويىلىمدا وسى تاقىرىپ تا جاقسى قامتىلعان. كۇنى كەشە عانا اقتاۋ قالاسىندا قو­يىلعان «ءاليحاننىڭ اماناتى» پەساسىنىڭ اۆتورى نارتاي ساۋدانبەكۇلى – ءاليحان بوكەيحاننىڭ, قاللەكي تەاترىنىڭ اكتەرلەرى نۇركەن وتەۋىلوۆ پەن قۋاندىق قىستىقباەۆ احمەت بايتۇرسىنۇلى مەن مىرجاقىپ دۋلاتوۆتىڭ بەينەلەرىن سومدادى.
سونداي-اق, كونتسەرت-سپەكتاكلدە «اتامەكەن», «سارجايلاۋ» سىندى ەلدىك باعىتىنداعى اندەر شىرقالدى. ولاردى روزا رىمباەۆا باستاعان بەلگىلى انشىلەر ورىندادى. توقسان اۋىز ءسوزدىڭ توبىقتاي ءتۇيىنىن ايتقاندا, بۇل كەش كەشەگىسىز بۇگىن جوق ەكەنىن حالىققا تاعى پاش ەتكەندەي بولدى.

امانعالي قالجانوۆ