№1 قالالىق اۋرۋحاناسىندا دۇنيەجۇزىلىك برونح دەمىكپەسى كۇنىنە ارنالعان «ءسىز دەمىكپەنى قاداعالاي الاسىز با؟» دەگەن تاقىرىپتا شەبەرلىك سىنىبى ءوتتى. جيىندا پۋلمونولوگ دارىگەرلەر ەلوردادا اتالعان اۋرۋ تۇرىمەن اۋىراتىن ناۋقاستارعا اقىل-كەڭەستەرىن ايتتى.
بۇگىندە جەر شارىنداعى حالىقتىڭ 15 پايىزى برونح دەمىكپەسىمەن اۋىراتىنى بەلگىلى بولىپ وتىر. سونداي-اق, استانادا اتالعان اۋرۋدىڭ تۇرىمەن اۋىراتىن ناۋقاستاردىڭ سانى ءوسىپ كەلە جاتىر. پۋلمونولوگيا ءبولىمىنىڭ مەڭگەرۋشىسى سالتانات قالمۇرزاەۆانىڭ ايتۋىنشا, №1 قالالىق اۋرۋحاناسى سوڭعى 4 جىلدان بەرى وسىعان بايلانىستى سەمينار وتكىزىپ كەلەدى.
– نەگىزىنەن, دەمىكپە اۋرۋى اللەرگيادان پايدا بولىپ جاتادى. سوڭعى كەزدەرى اتالعان اۋرۋمەن ۇلكەندەر عانا ەمەس, سونىمەن قاتار, جاستار دا اۋىرا باستادى. ءبىزدىڭ دارىگەرلەر ناۋقاستارعا برونح دەمىكپەسىنەن قالاي ساقتانىپ, كۇتىنۋ كەرەك ەكەنى تۋرالى اقىل-كەڭەس بەرەدى. دەمىكپە سوزىلمالى اۋرۋ بولعاندىقتان, ودان قۇلان-تازا ايىعىپ كەتۋ قيىن بولىپ سانالادى. بىراق ارنايى ناۋقاستى باقىلاۋعا السا, ونىڭ قاۋپىن سەيىلتۋگە بولادى. كەزىندە اتالعان اۋرۋدى اسقىندىرىپ العان كەيبىر ادامدار قايتىس بولىپ جاتاتىن. الايدا تەگىن ءدارى-دارمەك پەن ينگالياتور بەرىلگەننەن كەيىن دەمىكپەدەن كەلەتىن قاۋىپ سەيىلدى, – دەيدى ول.
دارىگەر جازدان باستاپ كۇز مەزگىلىنە دەيىن برونح دەمىكپەسىمەن اۋىراتىن ناۋقاستاردىڭ جاعدايى اۋىرلايتىنىن ايتادى. سوندىقتان دا ول اتالعان كەزەڭدەردە ناۋقاستار دۇرىستاپ ەم الىپ, كۇتىنگەنى ابزال دەگەن كەڭەس بەرەدى.
