استانا قالاسى قوعامدىق دەنساۋلىق ساقتاۋ باسقارماسىنىڭ قولداۋىمەن سالاۋاتتى ءومىر سالتىن قالىپتاستىرۋ ورتالىعى 9 قىركۇيەكتە دەنساۋلىق فەستيۆالىن وتكىزۋدى جوسپارلاپ وتىر. «ترياتلون پاركى» مادەنيەت جانە دەمالىس ساياباعىندا «سالاۋاتتى مەجەلەرگە جەت» ۇرانىمەن وتەتىن اۋقىمدى شارا استانالىقتاردىڭ دەنساۋلىعىن قورعاۋعا ۇندەيتىن بولادى.
بۇقارالىق شارانىڭ باستى ماقساتى – حالىق اراسىندا سالاۋاتتى ءومىر سالتىنىڭ نەگىزدەرىن ەگىپ, ەڭبەك جانە الەۋمەتتىك بەلسەندىلىكتىڭ جوعارى دەڭگەيىن ساقتاۋعا باۋلۋ. وسى رەتتە شارانى ۇيىمداستىرۋشىلار قاراپايىم قاعيدانى ۇستانۋدىڭ ماڭىزىن كوپشىلىككە جەتكىزدى. ياعني, دەنى ساۋ ادام تاۋلىگىنە 10000 قادام جاياۋ ءجۇرىپ, كەم دەگەندە 20 مينۋت دەنە شىنىقتىرۋمەن اينالىسقانى ءجون. دۇرىس تاماقتانۋ دا ماڭىزدى. تاۋلىگىنە 5 گرامم تۇز قولدانىپ, كەمىندە 2 ليتر تازا سۋ ءىشۋدى ادەتكە اينالدىرۋدىڭ دا ماڭىزى زور. سوعان بايلانىستى جۇرەك-قان تامىر جۇيەسىنىڭ جۇمىسى قالىپتاسادى. قان قىسىمى 140/90 مم گگ-دەن كەم نەمەسە تەڭ, جالپى حولەستەرول 5 ممول/ل-دەن از نەمەسە تەڭ, قانداعى قانت مولشەرى 5,5 ممول/ل-دەن كەم نەمەسە تەڭ بولۋى شارت. ەكىنىڭ ءبىرى ەسكەرە بەرمەيتىن بۇل دايەكتەر – سالاۋاتتى ءومىر سالتىن ۇستانعانداردىڭ جالپىلاما كورسەتكىشتەرى.
سونىمەن, الداعى جەكسەنبى كۇنى وتەتىن دەنساۋلىق مەرەكەسىنە شاقىرعان وليمپيادا جانە الەم چەمپيونى ولگا شيشيگينا, «سپارتا نوماد استانا» كومانداسىنىڭ كاپيتانى دانيار ءجۇمادىلوۆ «دەنساۋلىق فەستيۆالىنىڭ» كوركىن قىزدىراتىن بولادى.
