استانا قالاسى دەنساۋلىق ساقتاۋ باسقارماسى وكىلدەرى قالا تۇرعىندارىمەن كەزدەسۋ وتكىزدى. جيىننىڭ باسىندا «استانا – ادالدىق الاڭى» كەڭسە-جوباسى جەتەكشىسى جازيرا جىلقىشيەۆا ءسوز الىپ, جاڭا جوبانى تانىستىردى.
بايانداماشى مەديتسينا سالاسىنداعى اكىمشىلىك كەدەرگىلەردى جويۋ, قوعامدىق باقىلاۋدى كەڭەيتۋ سياقتى ماسەلەلەرگە كوڭىل ءبولىپ, قالا تۇرعىندارىنا قولجەتىمدى, قىزمەت ساپاسىن ۇسىنۋ قاجەتتىگىن ورتاعا سالدى.
– ويلاعان ماقساتىمىزعا قول جەتكىزۋ ءۇشىن الدىمەن حالىققا قولايلى, كەدەرگىسىز جاعداي جاساۋ كەرەك. بۇل ىستە قىزمەتكەرلەردىڭ ەڭبەكاقىسىن كوتەرۋ, باسشىلاردىڭ جەكە جاۋاپكەرشىلىگىن ارتتىرۋ, قوعامدىق باقىلاۋ, مەملەكەتتىك ساتىپ الۋدىڭ اشىقتىعى – قوعامداعى جەمقورلىق دەڭگەيىن تومەندەتەدى. وزدەرىڭىزدەن وسى مىندەتكە قاتىستى ناقتى ءىس-جوسپارلارىڭىز بەن ۇسىنىس-پىكىرلەرىڭىزدى كۇتەمىز, – دەدى جازيرا جىلقىشيەۆا.
جيىننىڭ ەكىنشى بولىگىندە استانا قالاسى دەنساۋلىق ساقتاۋ باسقارماسى باسشىسىنىڭ ورىنباسارى ساۋلە مۇقىشەۆا احۋالعا شولۋ جاسادى. بۇگىندە استانالىقتارعا جۇزدەن استام مەديتسينالىق مەكەمە قىزمەت كورسەتەدى. ونىڭ ىشىندە باسقارماعا قاراستى 16 قالالىق
امبۋلاتوريالىق-ەمحانالىق ۇيىم, 7 ستاتسيونارلىق مەديتسينالىق مەكەمە, 3 پەريناتالدىق ورتالىق, 4 ارناۋلى ديسپانسەر جانە 9 رەسپۋبليكالىق عىلىمي ورتالىقتار بار. بۇل سالاعا 11 مىڭنان استام مەديتسينا قىزمەتكەرلەرى جۇمىلدىرىلعان. ەمدەۋ ورىندارىنا قارالۋدىڭ, دارىگەر قابىلداۋىنا تىركەلۋدىڭ جولدارى جەتىلدىرىلىپ, مۇمكىندىگىنشە قولايلى جاعداي جاسالۋدا.
ايگۇل ۋايسوۆا
