باس قالادان شەتكەرىرەك ورنالاسقان ەلدى مەكەندەردىڭ تۇرعىندارىنا ارنالعان ءداستۇرلى «دەنساۋلىق جولى» اكتسياسى كەشە ەلورداداعى «نيەت» وتباسىلىق دەنساۋلىق ورتالىعىندا جالعاسىن تاپتى.
اتالمىش شارا بۇعان دەيىن استاناداعى باسقا دا ەمدەۋ مەكەمەلەرىندە ۇيىمداستىرىلعان بولاتىن. بۇل جولعى اكتسياعا قالامىزداعى سالاۋاتتى ءومىر سالتىن قالىپتاستىرۋ ورتالىعىنىڭ, تۋبەركۋلەزگە قارسى ديسپانسەر مەن №6 ەمحانانىڭ ماماندارى قاتىسىپ, تۇرعىندارعا تەگىن كونسۋلتاتسيالار بەرۋمەن بىرگە الەۋمەتتىك ماڭىزدى اۋرۋلاردىڭ الدىن الۋ بويىنشا اقپارات تاراتتى, ناقتى ناۋقاستارعا مەديتسينالىق كومەك كورسەتىپ, ولاردىڭ كەيبىرىن ديسپانسەرلىك باقىلاۋعا الدى.
«نيەت» وتباسىلىق دەنساۋلىق ورتالىعىنىڭ دارىگەرى كوكەناي تاشيموۆا شارانى ۇيىمداستىرۋداعى باستى ماقسات – قوعامنىڭ, مەملەكەتتىك جانە مەملەكەتتىك ەمەس ۇيىمداردىڭ نازارىن تۇرعىندار دەنساۋلىعىن قورعاپ, نىعايتۋ ماسەلەلەرىنە اۋدارۋ, سونىمەن قاتار سالاۋاتتى ءومىر سالتىن قالىپتاستىرۋ ەكەنىن جەتكىزدى.
– «سالاماتتى قازاقستان» مەملەكەتتىك باعدارلاماسىنداعى باسىم باعىتتاردىڭ ءبىرى تۋبەركۋلەز بەن ايتۆ-نى باقىلاۋ بولىپ تابىلادى. وسىعان وراي, اكتسيا اياسىندا «پرومىشلەننىي» كەنتىنىڭ تۇرعىندارى شالكودە كوشەسىنىڭ بويىندا ورنالاسقان №2 ءۇيدىڭ ماڭىنا قويىلعان جىلجىمالى مەديتسينا كەشەنى ارقىلى فليۋوروگرافيالىق, سونداي-اق, سكرينينگتىك تەكسەرۋلەردەن تەگىن وتۋگە مۇمكىندىك الدى,- دەدى ك.قايىرگەلدىقىزى.
جيتس-تىڭ الدىن الۋ جانە وعان قارسى كۇرەس جونىندەگى رەسپۋبليكالىق ورتالىقتىڭ مالىمەتتەرى بويىنشا ايتۆ ينفەكتسياسىنىڭ وقيعالارى ەلىمىزدىڭ بارلىق وبلىستارىندا تىركەلگەن. ونىڭ الدىن الۋ, تۋبەركۋلەزبەن اۋىراتىندار سانىن ازايتىپ, اۋرۋدى جۇقتىرماۋدىڭ جولدارى تۇرعىندارعا ۇنەمى ءتۇسىندىرىلىپ كەلەدى. وسى ماقساتتا وتكىزىلىپ جاتقان شاراعا كەلۋشىلەر قاتارى دا كوپ بولدى. ماماندار سول كۇنى تەك تۇسكە دەيىن عانا 50 شاقتى ادامدى قابىلداپ, 100-گە جۋىق تۇرعىندى فليۋوروگرافيالىق تەكسەرىستەن وتكىزدى. اتالمىش اكتسيا شىلدەنىڭ 31-ىنە دەيىن جالعاسادى.
گۇلبارشىن وكەشقىزى
