ەلوردادا سالاۋاتتى ءومىر سالتىن ناسيحاتتاۋ بويىنشا حالىققا جانە مىندەتتى الەۋمەتتىك ساقتاندىرۋ تۋرالى ءتۇسىندىرۋ جۇمىستارى جۇرگىزىلدى.
سونىمەن بىرگە شاراعا كەلگەن ءار ادام كونسۋلتاتسيالىق-دياگنوستيكالىق تەكسەرۋدەن ءوتىپ, قان قىسىمى مەن سالماعىن ولشەپ ءوز دەنساۋلىعىنىڭ جالپىلاما كورسەتكىشتەرىن انىقتاۋعا مۇمكىندىك الدى. شارتتى تۇردە «دەنساۋلىق قالاشىعىن» قۇرىپ, وندا ەلوردالىق مەديتسينا ۇيىمدارىنىڭ ماماندارى تۇرعىندارعا كەڭەس بەردى.
شاراعا تارتىلعان ەلوردا ەرىكتىلەرى كوپشىلىككە دەنە شىنىقتىرۋ جاتتىعۋلارىن جۇرگىزىپ, تاقىرىپتىق فلەش-موب, سونداي-اق شۇعىل مەديتسينالىق كومەك كورسەتۋ شەبەرلىكتەرىن دە وتكىزدى.
جاس ماماندار باسپانالى بولدى
«جانۇيا» وتباسىلىق دارىگەرلىك ورتالىعى قالانىڭ شەتكى اۋداندارىندا دا تۇرعىندارعا قىزمەت كورسەتىپ وتىر. اتاپ ايتقاندا, باراەۆ, ءوندىرىس, قوسشى, قوياندى ەلدى مەكەندەرىنىڭ تۇرعىندارىنا مەديتسينالىق كومەك كورسەتەدى.
قازىرگى تاڭدا ەمحاناعا تىركەلگەن ازاماتتار سانى 41 200-گە جەتكەن. ورتالىقتىڭ بارلىق بولىمشەلەرىندە تۇرعىندارعا العاشقى مەديتسينالىق-سانيتاريالىق قىزمەت ۇسىنىپ كەلەدى.
مۇندا كۇندىزگى ستاتسيونار دا قاراستىرىلعان. سونىمەن بىرگە, لابوراتوريالىق دياگنوستيكا, يممۋنوپروفيلاكتيكالىق قىزمەتتەرى جۇمىس ىستەيدى. بيىل مەكەمەدە ەكى بىردەي «انا مەن بالا» بولمەسىن اشىپ, جەدەل جاردەم كولىگىن الدى. ال كەلەر جىلى رەنتگەن قۇرالى ءۇشىن بولمە اشۋ جوسپارلانعان. «جانۇيا» وتباسىلىق دارىگەرلىك امبۋلاتوريالارى تۇرعىندارعا قىزمەت كورسەتۋ ماقساتىندا 100 پايىز مەديتسينالىق قۇرال-جابدىقپەن جاراقتاندىرىلعان. «جاس ماماندار تۇگەل دەرلىك باسپانامەن قامتاماسىز ەتىلدى» دەپ حابارلادى ورتالىقتىڭ ديرەكتورى گۇلميرا بيكەتوۆا.
ەسىرتكىگە قارسى ۇگىت
ناركولوگيا جانە پسيحوتەراپيا ورتالىعىندا حالىقارالىق ناشاقورلىقپەن كۇرەس كۇنىندە وتكىزىلگەن شاراعا 300-گە جۋىق ادام قاتىستى. ەسىرتكىگە تاۋەلدىلىك ماسەلەلەرى بويىنشا 70 ادام بىلىكتى مامانداردىڭ كەڭەسىن الدى. سونداي-اق 30-دان اسا اكتسيا قاتىسۋشىلارى اعزاداعى پسيحوتروپتى زاتتاردىڭ بار-جوعىنا تەگىن تەستىلەۋدەن ءوتتى.
ورتالىقتىڭ فويەسىندە ەسىرتكىگە قارسى تاقىرىپتىق فيلم كورسەتىلىپ, پسيحواكتيۆتى زاتتاردىڭ زالالى بويىنشا اقپاراتتىق جانە وقۋ ماتەريالدارىن تاراتتى, سالاۋاتتى ءومىر سالتى ناسيحاتتالدى.
– بۇگىنگى ۇيىمداستىرىپ وتىرعان اشىق ەسىكتەر كۇنى بارلىق كەلۋشىلەر مەن قاتىسۋشىلارعا ءتيىمدى وتكەنىنە, ءوز سۇراقتارىنا جاۋاپ تابا العان پايدالى كۇن بولعانىنا سەنىمدىمىز, – دەدى ورتالىقتىڭ باس دارىگەرى ولگا كوماروۆا.
قاتەر جوق دەمەڭىز…
نۇر-سۇلتان قالاسىنداعى №2 كوپبەيىندى اۋرۋحانا بازاسىندا توتەنشە جاعداي كەزىندە ادامداردى قۇتقارۋ جانە دەنساۋلىعىن ساقتاۋ جونىندە كەشەندى-جاتتىعۋ ساباقتارى وتكىزىلدى. وسىنداي وقىتۋ ءىس-قيمىلداردىڭ دايەكتى تەتىگىن ازىرلەۋگە, سونداي-اق جالپى قابىلدانعان حالىقارالىق ستاندارتتارعا سايكەس كەلەتىن توتەنشە جاعدايلار كەزىندە ءۇش اۋقىمدى الگوريتمدى تەستىلەۋ جۇرگىزۋگە مۇمكىندىك بەردى.
اتالعان ءىس-شارا دەنساۋلىق ساقتاۋ مينيسترلىگىنىڭ, «ۇلتتىق شۇعىل مەديتسينانى ۇيلەستىرۋ ورتالىعى», سونداي-اق دۇنيەجۇزىلىك دەنساۋلىق ساقتاۋ ۇيىمىنىڭ قولداۋىمەن
ۇيىمداستىرىلدى.
