استانا دەسە جۇرتتىڭ كوز الدىنا ەڭ الدىمەن «بايتەرەك», «اقوردا» سەكىلدى عيماراتتار ەلەستەرى ءسوزسىز. مىنە, ءدال وسى ماڭدا, «نۇرجول» بۋلۆارىنىڭ بويىندا كوركىنە كورىك قوسىپ تۇرعان «نۇرسايا» تۇرعىن ءۇي كەشەنى بار. وندا ەلىمىزدىڭ زيالى قاۋىم وكىلدەرى, پارلامەنت دەپۋتاتتارى سەكىلدى تانىمال تۇلعالار تۇرادى.
شىنى كەرەك, بۇل – قالامىزداعى كوز سۇيسىندىرەتىن عيماراتتاردىڭ ءبىرى. تۇرعىن ءۇي كەشەنى اۋماعىنداعى اۋلالاردى ءتيىمدى پايدالانۋ ماقساتىندا استىڭعى قاباتى كولىك تۇراقتارىنا, ۇستىڭگى بولىگىندەگى الاڭ بالالارعا ارنالعان. العاشقى جىلدارى مۇندا جاڭا ءارى زاماناۋي ۇلگىدەگى ءتۇرلى اتتراكتسيوندار قويىلعان بولاتىن. ال تۇرعىن ءۇيدىڭ قولدانىسقا بەرىلگەنىنە 9 جىلدان اسا ۋاقىت بولىپتى. جاڭانىڭ ەسكىرەتىن كەزى كەلگەن – وسىدان بىرەر اي بۇرىن مۇندا كەلگەنىمىزدە ءشوبى ورىلماي, قۋراي ءوسىپ تۇردى. بۇلدىرشىندەر تاس پەن قۇم ارالاس الاڭدا شاڭ-شاڭ بولىپ دوپ تەۋىپ ءجۇر. اتكەنشەك, سىرعاناق سەكىلدى اتتراكتسيوندار قيراپ جاتىر. سول جولى اسفالت توسەمەلەردىڭ توزىعى جەتكەنىنە دە كۋا بولعان ەدىك. ال پاركينگ اۋماعىنا كىرگەنىمىزدە توبەسىنەن سۋ ءوتىپ, كۇلىمسى ءيىس شىعا باستاعانى بايقالعان. قيۋى كەتكەن كەشەن ماڭىنىڭ جاعدايى اۋەلى تاپ-تاماشا قويىلعان اتىنان زاتى الشاقتاپ بارا جاتقانداي كورىندى. «شىركىن, مىنا اۋلانى ءبىر جاڭارتار ما ەدى؟!» دەپ ويلاعانبىز. ويىمىز ءتيىستى مەكەمەلەردىڭ جۇمىسىمەن تۇسپا-تۇس كەلگەن سياقتى, «نۇرسايانىڭ» ەكىنشى بولىگىنە جوندەۋ جۇمىستارى باستالىپ كەتتى.
الايدا باسىندا كوڭىلىمىزدى دەمەگەنمەن, الا جازداي ءان سالعان ءتيىستى مەكەمەلەردىڭ بۇل ىسكە كۇن سۋىتىپ, كۇز كەلگەن تۇستا عانا كىرىسكەنى ىشتەي قىنجىلتقانىن نەسىن جاسىرايىق. باس قالانىڭ ارقانى كەڭگە سالىپ, جازىلىپ جاتاتىن جازى جوق, قاراشا تۋماي, قار تۇسەتىنىن كىم دە بولسىن جاقسى ءبىلەدى. ال وسى اپتادا ءتىپتى دابىل قاعىلىپ, قار ارالاس جاۋىن جاۋاتىنى تۋرالى حابارلامالار تارالىپ جاتتى. مۇنداي كۇن رايىندا اسفالت توسەۋ قانشالىقتى قيسىنعا كەلەدى؟ شەتەلدىك تاجىريبەگە جۇگىنسەك, گەرمانيادا اسفالت توسەپ جاتقاندا جاڭبىر جاۋىپ كەتسە, جۇمىسشىلار اينالا تولىق كەپكەننەن كەيىن عانا ىسكە كىرىسەدى ەكەن. نەمىستەردىڭ جۇمىستى توقتاتۋىنا سەبەپ – كەرجالقاۋلىق ەمەس ەكەنى ايدان انىق, دەمەك ساپاعا كەرى اسەرىن ەسكەرىپ وتىر. ال قازىرگى جاعدايعا بايلانىستى اسفالت قار ارالاس جاڭبىر كەزىندە توسەلسە, «نۇرسايا-2» اۋماعىنداعى جاڭا جولدىڭ ساپاسى قانداي بولماق؟!
اسفالت ماسەلەسى ءوز الدىنا, سونىمەن بىرگە اينالاسىنا كەلتىرىپ جاتقان قيىندىقتارى دا از ەمەستىگىن ايتا كەتكەن ءجون. كۇز مەزگىلى – وقۋ جىلىنىڭ باسى, تىرشىلىكتىڭ ناعىز قايناعان كەزى. قازىرگى ۋاقىتتا جوندەۋ جۇمىستارىنا بايلانىستى الگى جەردى قورشاپ, كولىك كىرمەيتىندەي ەتىپ جاۋىپ قويدى. تۇرعىندار بوس تۇرعان ورىنداردىڭ ءبارىن اۆتوتۇراق الاڭىنا اينالدىردى. ءتىپتى ساۋدا ورىندارىنىڭ كىرەبەرىسىندە دە تىزگىن تىرەپ تۇرعان تەمىر تۇلپارلاردى ءجيى بايقاۋعا بولادى. «نۇرجول» جەلەك جولىنىڭ بويىنا اقىلى تۇراق جۇيەسى ەنگىزىلگەندىكتەن, سول ماڭايدا جۇمىس ىستەيتىن قىزمەتكەرلەرگە دە زيانى ءتيىپ وتىر. ەندى تۇراق ىزدەگەن جۇرت «كەرۋەن» ساۋدا-ويىن-ساۋىق ورتالىعىنىڭ الدىنا بارۋعا ءماجبۇر, ال ەكى ارانىڭ قاشىقتىعى – اجەپتاۋىر جەر. بۇعان ماڭگىلىك ەل داڭعىلىنىڭ بويىنداعى تاڭەرتەڭگى كەپتەلىس قوسىلادى. ءبىر-ەكى اپتاعا جوسپارلانعان ءىستىڭ جالعاسقانىنا ءبىر ايدىڭ ءجۇزى بولىپ قالدى.
– قازىرگى ۋاقىتتا بالالار ويىن الاڭىن جاڭارتۋ, پاركينگ اۋماعىنا سۋ وتپەس ءۇشىن ارنايى توسەمەلەر توسەۋ مەن اسفالتتى جاڭارتۋ جۇمىستارى جۇرگىزىلىپ جاتىر. شىنى كەرەك, جوندەۋ جۇمىستارى قاشان اياقتالاتىنىن ءدوپ باسىپ ايتا المايمىن. بالكىم ءبىر ايعا, ءتىپتى ەكى ايعا دەيىن سوزىلۋى مۇمكىن, – دەدى پيك قىزمەتكەرى ايگۇل ناۋرىزباي. وسى تۇستا ىشتە جاتقان ويىمىزدى سەزگەن بولسا كەرەك, اڭگىمەنى ارى قاراي جالعاپ اكەتتى. – تىم كەش باستالعانىنا ءبىزدىڭ ەش قاتىسىمىز جوق. ول مەملەكەتتىك تەندەردىڭ كەش ۇيىمداستىرىلۋىنا بايلانىستى بولىپ وتىر. ال تەندەر جىل سايىن تەك ماۋسىم ايىندا وتكىزىلەدى. ەندى ونىڭ ءبارى ءوتىپ, كومميسسيا رۇقساتىن بەرگەنشە وسى ۋاقىت بولىپ قالدى, – دەپ اقتالدى ول.
ايتا كەتەر تاعى ءبىر جايت, كۇن سۋىتقان ۋاقىتتا قىزمەتتىڭ قاي ءتۇرى بولسىن قىمباتتايتىنى انىق. ءۇش اي جازدا «ىرشىپ ءجۇرىپ ءان سالعان» «ىسكەرلەرىمىز» نە ارەكەت جاسار ەكەن؟
ايان ءابدۋالي
