«تازا قازاقستان» رەسپۋبليكالىق ەكولوگيالىق اكتسياسى اياسىندا استانادا جالپىقالالىق سەنبىلىك وتۋدە. ەلورداداعى بوتانيكالىق باقتا ءماسليحاتتىڭ اعىمداعى جانە وتكەن شاقىرىلىم دەپۋتاتتارىنىڭ قولىمەن وتىرعىزىلعان جاڭا اعاشتار پايدا بولدى, دەپ حابارلادى Elorda.info.
«جاسىل ايماق» جوباسىنىڭ اياسىندا اعىمداعى اپتادا كوشەتتەر وتىرعىزۋ, اعاشتاردىڭ ءتۇبىن تازالاپ اكتەۋ, ت.ب. جۇمىستار اتقارىلۋدا.
بۇگىن ەل بويىنشا جالپىقالالىق سەنبىلىك ءوتىپ جاتىر. «جاسىل ايماقتىڭ» ءۇشىنشى اپتالىعى اعاش وتىرعىزۋ مەن اكتەۋگە ارنالدى. بيىل ەلوردادا 1 ميلليون 100 مىڭ جاسىل جەلەكتىڭ وتىرعىزىلاتىنىنا قۋانىشتىمىن. ونىڭ 900 مىڭى قالا ىشىندە قالعان 200 مىڭى جاسىل بەلدەۋدە ەگىلەدى, – دەدى استانا قالاسى ءماسليحاتىنىڭ توراعاسى ەرلان كاناليموۆ.
بۇگىنگى سەنبىلىككە بۇرىنعى شاقىرىلىمداعى ءماسليحات دەپۋتاتتارى بولعان ازاماتتار دا قاتىستى.
استانا ءماسليحاتىنىڭ 30 جىلدىعىنا ارنالعان تاماشا شاراعا قاتىسقانىما قۋانىشتىمىن. بۇل كۇنى بىزدەر, بارلىق شاقىرىلىمداردىڭ دەپۋتاتتارى باس قوسىپ, اۋقىمدى سەنبىلىككە قاتىسىپ جاتىرمىز. سوڭعى 30 جىلدا استانا وزگەرىپ, قازىر كورىپ وتىرعانىمىزداي كەرەمەت قالاعا اينالدى, – دەدى 2002-2003 جىلدارداعى استانا قالاسى ءماسليحاتىنىڭ حاتشىسى ۆەرا لۋكيانەتس.
ايتا كەتەيىك, سەنبىلىك استانا قالاسى ءماسليحاتىنىڭ 30 جىلدىعىنا ورايلاستىرىپ وتكىزىلدى.
بۇگىن اتاۋلى كۇنى سەنبىلىككە جينالىپ, اعاش كوشەتتەرىن وتىرعىزدىق. ەلوردادا ءبىز تۋرالى جاقسى ەستەلىكتەر قالعانىن قالايمىز. استانا – ءبىزدىڭ تۋعان قالامىز, ءاربىر تۇرعىن قالانىڭ جاسىل جەلەككە تولى بولۋىنا اتسالىسۋ كەرەك, – دەپ ءبولىستى ەلوردا ءماسليحاتىنىڭ VII جانە VIII شاقىرىلىمدارىنىڭ دەپۋتاتى اسقار سماعۇلوۆ.
ەستەرىڭىزگە سالا كەتەيىك, اۋقىمدى ەكولوگيالىق ناۋقان اياسىندا قالانى, نوسەر جولدارىن, ارىق كارىز جەلىلەرىن سانيتارلىق تازالاۋ جۇمىستارى اتقارىلدى. سونىمەن قاتار كوشەلەردى, جاياۋ جۇرگىنشىلەر جولدارىن, ورامىشىلىك اۋماقتاردى, قوعامدىق ورىنداردى رەتكە كەلتىرۋ جۇرگىزىلۋدە.
