استانا قالالىق ءماسليحاتىنىڭ دەپۋتاتتارى وتكەن سەنبىدە 10 مىڭ استانالىقتارمەن بىرگە سەنبىلىككە قاتىستى. سەنبىلىك ەلورداداعى «جاسىل استانا» ەكولوگيالىق اكتسياسى اياسىندا ءوتىپ جاتىر. بۇل كۇنى 1240 ءتۇپ تال-اعاش ەگىلدى. قالالىق ءماسليحات توراعاسى ەرلان كاناليموۆ بۇرىننان كەلە جاتقان ىزگى ءداستۇردىڭ تازالىق, مادەنيەت ءۇشىن ورنى ايرىقشا ەكەنىن ايتادى.
«بۇل – بۇرىننان كەلە جاتقان جاقسى ءداستۇر. كوممۋنالدىق سەنبىلىك اياسىندا 1240 جاسىل جەلەك وتىرعىزىلىپ, ساياباقتار مەن سكۆەرلەر جينالدى. كاسىپورىندار مەن ۇيىمداردىڭ قىزمەتكەرلەرى ءوز اۋماقتارىن تازالاۋ جانە كوگالداندىرۋ جۇمىستارىن جۇرگىزدى. مەملەكەت باسشىسى قاسىم-جومارت كەمەلۇلى توقاەۆ قازاقستان بويىنشا 2 ميلليارد ءتۇپ كوشەت وتىرعىزۋ تۋرالى باستاما ۇسىندى. يگى شاراعا قالا تۇرعىندارىمەن بىرگە ءماسليحات دەپۋتاتتارى, اۋداندىق اكىمدىكتەر, كوممۋنالدىق كاسىپورىندار, تۇرعىندار, ستۋدەنتتەر, ەرىكتىلەر, ەكواكتيۆيستەر مەن مەملەكەتتىك مەكەمەلەردىڭ قىزمەتكەرلەرى بەلسەندى قاتىسىپ, ءوز ۇلەسىن قوستى» دەپ جازدى سەنبىلىك تۋرالى ە.كاناليموۆ الەۋمەتتىك جەلىدەگى پاراقشاسىندا.
ول «جاسىل استانا» ءداستۇرلى ەكولوگيالىق ايلىعى 15 قازانعا دەيىن جالعاساتىنىن ايتتى. «ءار قازاقستاندىقتىڭ «اتادان مال قالعانشا, تال قالسىن» دەيتىن بابالار وسيەتىنەن ونەگە الىپ, وسىنداي ءىس-شارالارعا بەلسەندى قاتىسقانى ابزال. قورشاعان ورتانى قورعاپ, كوشەت وتىرعىزۋدىڭ كەلەر ۇرپاق ءۇشىن دە ۇلگىلى ءىس ەكەنى ءسوزسىز. ەندەشە كۇن ساناپ كوركەيىپ, قۇلپىرىپ كەلە جاتقان ەلوردامىزدىڭ جاسىل جەلەكتى شاھارعا اينالۋىنا ءبارىمىز اتسالىسايىق!» دەدى ءماسليحات توراعاسى.
