ۇلتتىق اكادەميالىق كىتاپحانادا «شورا سارىباەۆ تاعىلىمى» اتتى عىلىمي-پراكتيكالىق كونفەرەنتسيا مەن شورا شامعاليۇلى اتىنداعى وقۋ زالىنىڭ اشىلۋ سالتاناتى ءوتتى.
عىلىمي جيىنعا بعم عىلىم كوميتەتىنىڭ ءتورايىمى جاننا قۇرمانعاليەۆا, قر پارلامەنتىنىڭ دەپۋتاتتارى قازىبەك يسا, دارحان مىڭباي, ءامىرحان راقىمجانوۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەت, ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجانوۆا, مەملەكەت جانە قوعام قايراتكەرلەرى مىرزاتاي جولداسبەكوۆ, ءادىل احمەتوۆ, قۋانىش سۇلتانوۆ, ۇلتتىق عىلىم اكادەمياسىنىڭ اكادەميكتەرى سەيىت قاسقاباسوۆ, ءۋاليحان قاليجان, باۋىرجان وماروۆ, دارحان قىدىرالى, كارىمبەك قۇرماناليەۆ, شەرۋباي قۇرمانبايۇلى, سونداي-اق جوعارى وقۋ ورىندارىنىڭ پروفەسسورلارى, دوكتورانتتارى مەن ماگيسترانتتارى قاتىستى.
«شورا سارىباەۆتىڭ قازاق عىلىمىنا سىڭىرگەن ەڭبەگىن ينستيتۋت ۇجىمى ماقتانىشپەن ايتامىز. سەبەبى عالىمنىڭ ەڭبەك جولى – ادالدىقتىڭ ۇلگىسى. اعاي اسپيرانتۋراسىن بىتىرگەننەن كەيىن, سوناۋ 50-60-جىلداردان باستاپ تابان اۋدارماي ا.بايتۇرسىنۇلى اتىنداعى ءتىل ءبىلىمى ينستيتۋتىندا قىزمەت ەتتى. شورا شامعاليۇلىنىڭ عىلىمي مۇراسى ءبىر عانا باعىتتا ەمەس. ەكىنشى ماقتاناتىنىمىز – اعايدىڭ جان-جاقتىلىعى. قازاق رۋحانياتىنداعى جاستار ءۇشىن, جاس زەرتتەۋشىلەر ءۇشىن شورا سارىباەۆتىڭ ەڭبەكتەرى – ۇلكەن مۇرا. ويتكەنى عالىمنىڭ بۇكىل ومىرىندەگى كرەدوسى «دۇنيەدە ۇساق ەشتەڭە جوق. ۇساق نارسەنىڭ بارلىعى – ۇلىنىڭ بولشەگى» دەپ بارىنە وتە ءمان بەرىپ قارايتىن. سوندىقتان دا شىعار, ول كىسى قازاق ءتىلتانۋ عىلىمىندا جارىق كورگەن بارلىق ەڭبەكتەردى تىركەپ, جيناقتاپ جۇرەتىن. مىنە, بۇگىن قالامگەردىڭ ارتىنداعى مول مۇراسى ەسكەرۋسىز قالماي, ەلوردا تورىندەگى ەڭسەلى كىتاپحانانىڭ قورىن تولتىرىپ جاتىر» دەدى ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجانوۆا.
عالىمنىڭ ۇرپاعى قايرات سارىباي قالامگەردىڭ ءومىر بويى جيناستىرىپ قۇرعان جەكە كىتاپحاناسىن قر ۇلتتىق اكادەميالىق كىتاپحاناسىنىڭ قورىنا سىيعا تارتۋ ەتتى. 5000-نان استام قازاق ءتىل ءبىلىمىنىڭ ديالەكتولوگيا, مورفولوگيا, لەكسيكولوگيا, لەكسيكوگرافيا, بيبليوگرافيا, ءتىل تاريحى, اۋدارما, ەسىمناما, تاعى باسقا سالالارىنا ارنالعان عىلىمي زەرتتەۋ ەڭبەكتەرى كىتاپحانا قورىنا تابىس ەتىلدى.
