جۋىردا فەيسبۋك الەۋمەتتىك جەلىسىندە بەلگىلى جۋرناليست توقتار جاقاش ەلىمىزگە تارايتىن تەلەارنالارعا بايلانىستى مىناداي سىن پىكىر جازدى:
«ءبىر كۇنىمدى تەلەديدار كورۋگە ارناماق بولعام. وندا دا الدىمەن جاڭالىقتاردى, سوسىن «نە ايتىپ جاتىر ەكەن» دەپ, باعدارلامالاردى قاراعام.
قۇداي-اۋ! ديكتور شىركىندەر نە بولىپ كەتكەن؟ 31-ارناداعى ينفورمبيۋرو, «ەۋرازياداعى» «زاڭ سويلەسىن», «باستى جاڭالىقتارداعى» ايگۇل دەگەن قىز, «حابارداعى» «ءبىزدىڭ نازاردا», ۇلتتىق ارناداعى «دابىل» دەگەندەردى كورىپ بىتكەنشە, جۇيكەمنىڭ مىڭداعان تالشىقتارى ءولىپ قالدى-اۋ دەيمىن! جۇرەك اۋىرتار حاباردى تۇنەرىپ, الدەكىمگە تىستەنىپ, زىلدەنە وتىرىپ حابارلاعاندا, جانىڭدى قويارعا جەر تاپپاي كەتەدى ەكەنسىڭ! الدەكىمگە ۇرسىپ جاتقان سياقتى. كوكەلەر-اۋ! ديكتورلىقتىڭ دا ءجونى بار ەمەس پە؟ نەمەنەگە تىستەنە بەرەسىڭدەر؟ كىمگە زىلدەنەسىڭدەر؟ كادر سىرتىندا الدەبىرەۋدەن الا الماي قالعان وشتەرىڭ بار ما ەدى؟ كورەرمەندى اياساڭدارشى! قاتتى ايتسام, ايىپقا بۇيىرماڭدار. قىز بالاسىنا شاپ-شاپ ەتىپ, اقپاراتتى بەتتەن الىپ, بەتكە سالىپ, زىلدەنە حابارلاعان ءتىپتى جاراسپايدى ەكەن. تۋرا ءبىر ءتىسىن اقسيتىپ, وتكەن-كەتكەننىڭ بالتىرىن تىستەپ قالعىسى كەلەتىن كورشىنىڭ قاندەنى سەكىلدى.
تۇسىنەمىن. كەيبىر اقپاراتتى ماتىنگە ساي ەكپىنمەن, كوڭىل-كۇيمەن جەتكىزگىلەرىڭ كەلەدى. بىراق سەندەر ەكپىن مەن تىستەنىپ حابارلاۋدىڭ اراسىن اجىراتساڭدارشى!»
وسى پىكىردى بەلگىلى تەلەجۋرناليست, تالاي جىل قازاق تەلەارنالارىندا ديكتور بولىپ قىزمەت ىستەپ, كورەرمەن كوزايىمىنا اينالعان ارىپتەسىمىز زەيىن الىپبەككە جولدادىق.
– زەيىن مىرزا, ءسىز ۇزاق جىلدار بويى تەلەارنادا ديكتور بولىپ ىستەگەن, ءوز كاسىبىنە كەلگەندە شاشاسىنا شاڭ جۇقتىرماعان, سىنعا ىلىكپەگەن ادامسىز. الەۋمەتتىك جەلىدەگى مىنا پىكىرمەن كەلىسەسىز بە؟ سىزدەر قىزمەت ەتكەن كەزدە ديكتورلارعا قانداي تالاپ قويىلدى؟ بۇگىن سول تالاپ وزگەردى مە؟
– ديكتورلارعا ەجەلدەن ءبىر-اق نەگىزگى تالاپ بار. ول – اقپاراتتى كورەرمەنگە ۇعىنىقتى ەتىپ جەتكىزۋ. بۇل تالاپ ەشقاشان وزگەرمەيدى.
مەنىڭشە, نەگىزگى تالاپتاردىڭ ءبىرى – شىنايى بولۋ سەكىلدى. سوندا ءبارى دە جاقسى بولادى.
قازىر, راسى, الەمدىك تەلەۆيزيادا جاڭالىقتى ەكپىندەتىپ وقۋ ءۇردىسى قالىپتاسقان. ەلىمىزدەگى تەلەارنالار دا سوعان ىلەسىپ جاتىر. ول دۇرىس تا شىعار. بىراق, مەنىڭشە, ءبىز ءبارىبىر قايتىپ شىنايىلىقتى باعالاپ, شىنايىلىقتى تالاپ ەتەتىن جاعدايعا ورالامىز.
دايىنداعان ءنازيرا بايىربەك
