ديماش قۇدايبەرگەن «ەكسپو-2017» كورمەسى اياسىندا جەكە كونتسەرتىن وتكىزەتىن بولدى. ديماشتىڭ ەسىمى سوڭعى كەزدەرى اسپانداپ تۇر. اسىرەسە, اسپاناستى ەلىندە كونكۋرسقا قاتىسۋى ونىڭ داڭقىن دارالاي ءتۇستى.
بۇگىندە قىتاي حالىق سانى بويىنشا الەمدەگى ءبىرىنشى مەملەكەت سانالادى. ءبىر جارىم ميللياردقا جۋىق تۇرعىنى بار. سوڭعى ون جىل ىشىندە قىتاي ەكونوميكاسى قاتتى قارقىنمەن قارىشتادى. ءوندىرىسى ورگە باسىپ, جاڭا تەحنولوگيانىڭ الەۋەتى كۇشەيدى. ءسويتىپ, الەمدەگى ەكونوميكاسى وزىق دەرجاۆالاردىڭ الدىنا شىقتى. مىنە, وسىنداي ءتورت قۇبىلاسى تۇگەلدەنىپ قالعان ەلدى تاڭعالدىرۋعا بولا ما؟ ارينە, سەنبەيسىز! بىزدىڭشە, بولادى ەكەن. ونى دارىندى ديماشىمىز دالەلدەدى. «سلاۆيان بازارى-2015» فەستيۆالىندە باس جۇلدەنى يەلەنىپ, تالانتى توپ جارعان ديماش قۇدايبەرگەن جاڭا جىلدان بەرى قىتايداعى تانىمال انشىلەر باق سىنايتىن «مەن ءانشىمىن» بايقاۋىنىڭ بارلىق كەزەڭىنەن ءساتتى ءوتىپ, فينالعا جولداما الدى. حالقىمىزدىڭ اتى مەن عاجايىپ ونەرىن الەمگە تانىتتى. فرانتسۋزدار ارنايى تەلەحابار ازىرلەدى. قارشاداي قازاق بالاسىنىڭ كەڭ قۇلاشتى داۋىسى مەن دارىنىنا اسپاناستى جۇرتى تاڭعالىپ, توبەلەرىنە كوتەردى. ديماش ارقىلى قازاقستاندى ءبىلىپ, ونىڭ فاناتتارى دارابوز ونەرپازدىڭ انا ءتىلىن ءتۇسىنۋ ءۇشىن قازاق ءتىلى كۋرسىنا جازىلدى. ەندى ايتا بەرسە, اسەرلى اڭگىمە كوپ. ونەردە شەكارا بولمايدى دەگەن وسى.
وتكەن اپتادا ەلوردادا قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجان حانxۋەي ءباسپاسوز ءماسليحاتىن وتكىزدى. وندا ىرگەلى مەملەكەتتىڭ بۇگىنگى ەكونوميكاسى مەن دامۋى ءسوز بولدى. ەلشى ءانشى ديماش قۇدايبەرگەننىڭ قىتايدىڭ مادەني نارىعىنداعى تاڭعاجايىپ جەتىستىگى جايىندا پىكىرىن ءبىلدىردى.
– ول قىتايدىڭ جارىق جۇلدىزىنا اينالدى. ارينە, قازاقستاندىقتار ءۇشىن بۇل – ۇلكەن بونۋس. ءبىزدىڭ ەلىمىزدە حالىققا بايقاۋدى ۇسىنعان «حۋنان» ارناسى كەڭىنەن تانىمال سانالادى. ونىڭ ەفيرىنەن سان الۋان باعدارلامالار كورسەتىلەدى. الايدا شەتەلدىڭ ازاماتتارى كوپ تۇسە بەرمەيدى. ديماش بولسا بىردەن جارق ەتىپ, جاستاردىڭ كوزىنە ءتۇستى. اسىرەسە, جاس جەتكىنشەكتەر ونى قاتتى سۇيەدى, قاتتى ەمەس, قۇلاي سۇيەدى دەۋگە بولادى. ونىڭ داۋىسىنا عانا ەمەس, مىنەزىنە دە ءتانتى بولدى. ديماشتىڭ بويىنان قازاق xالقىنىڭ مادەنيەتى مەن ۇلى دالانىڭ بولمىسىن كورەمىز. مىنە, ءدال وسى قاسيەت قىتايلىق كورەرمەندەردىڭ قىزىعۋشىلىعىن تۋعىزدى. قىتايدا ديماش تانىمال انشىگە اينالدى. بارلىق كورەرمەندەر ونى بىلەدى. سوندىقتان ول ءوزىنىڭ كاسىبىن قىتايدا دامىتا الادى دەپ ويلايمىن. ەكىنشىدەن, ول قىتايدىڭ مادەني نارىعىندا قازاقستاننىڭ تانىستىرىلىمىن وتە جاقسى جاسادى. ەندى, قازاقستاندىقتارعا قىتايدىڭ مادەني نارىعىنا جول اشىق, – دەدى ول.
ءيا, ەلشى چجان حانxۋەي مىرزا دۇرىس ايتادى. تەك مادەني عانا ەمەس, عىلىم, ءبىلىم, بيزنەس سالاسى بويىنشا الىپ ەلگە تانىلۋعا جول اشىلدى دەپ ايتۋعا بولادى. كورشىمىزدى ەرەكشە قابىلەتىمىزبەن باعىندىرىپ جاتساق, ول – ءبىزدىڭ بيىكتىگىمىز. ەندەشە, ديماش سالعان دارا جول سارا جولعا اينالسىن!
ازامات ەسەنجول «استانا اقشامى»
