كەشە «ماڭگىلىك ەل» قاقپاسىنىڭ گالەرەياسىندا حالقىمىزدى الەمگە تانىتقان تالانتتى ءانشى ديماش قۇدايبەرگەنوۆتىڭ ەلوردادا وتەتىن جەكە كونتسەرتى قارساڭىندا ونىڭ شىعارماشىلىعىنا ارنالعان قىلقالام شەبەرلەرىنىڭ كورمەسى اشىلدى.
كورمەگە كاسىبي جانە اۋەسقوي سۋرەتشىلەر مەن شەت ەلدەردەگى ساندىك-قولدانبالى ونەر شەبەرلەرىنىڭ جۇمىستارى قويىلدى. ولاردىڭ قاتارىندا امەريكا قىتاي, رەسەي, فينليانديا, تۇركيا, سيريا, شۆەتسيا, ارگەنتينا مەملكەتتەرىنىڭ وكىلدەرى بار. بۇدان بولەك, بۇل جوباعا ەلىمىزدەگى تانىمال سۋرەتشىلەر مەن جوعارى وقۋ ورىندارىندا وقيتىن ستۋدەنتتەر بەلسەندى ۇلەس قوستى.
قىلقالام شەبەرلەرى ءوز كارتينالارىندا دارىندى ءانشىنى ءار قىرىنان بەينەلەگەن. بارلىعىندا دا ديماشتىڭ كىرشىكسىز تازالىعى, ادالدىعى شەبەرلىكپەن اشىلعان. ءار تۋىندى تالانتتىڭ جاستىڭ ەشكىمگە ۇقسامايتىن بولمىسىن بەرە العان.
سونداي-اق ەكسپوزيتسيا تورىنەن يزرايلدىك اقىن ەفيم تاشليتسكيدىڭ «ديماشتى تىڭدايىق» اتتى ولەڭدەر جيناعى مەن جازۋشى داريا جۇماگەلدينوۆانىڭ «بۇلبۇل داۋىستى ۇل» دەگەن ەرتەگى جيناعى ورىن العان.
كورمە 29 شىلدەگە دەيىن جالعاسادى.
