ديماشتىڭ اتىن «دايديداۋ» وزدىردى

بەلارۋس رەسپۋبليكاسىندا وتكەن ونەر بايقاۋلارىندا ءۇش بىردەي ورەنىمىزدىڭ مەرەيى ۇستەم بولدى. قازاق ۇلتتىق ونەر ۋنيۆەرسيتەتىنىڭ ستۋدەنتى, جاس ءانشى ديماش قۇدايبەرگەنوۆ پەن بالاۋسا دارىن لۋيزا نۇرقۋاتوۆا «سلاۆيان بازارى – 2015» فەستيۆالىنىڭ گران-پري جۇلدەسىن ۇتىپ السا, ەلوردالىق سۋرەتشى رەنات ەلۋباەۆ «كۋرشينالە – 2015» حالىقارالىق ونەر وليمپياداسىندا «جيۆوپيس» اتالىمىندا توپ جاردى.

«سلاۆيان بازارى – 2015» فەستيۆالىنىڭ ءبىرىنشى كۇنى ديماش كونستانتين مەلادزەنىڭ «وپيات مەتەل» ءانىن ورىندادى. ەكىنشى كۇنى فرانتسۋز تىلىندەگى «Sos dun terien un detresse» انىمەن قازىلار القاسىن ءتانتى قىلدى. ءسويتىپ, ەكى كۇننىڭ قورىتىندىسىندا 175 ۇپاي جيناپ, قارسىلاستارىنان وق بويى وزىپ كەتتى. سول كۇنى-اق قازاقستاندىق ەلەكتروندىق باق «ديماش حالىقارالىق بايقاۋدا جەڭىمپاز اتاندى» دەپ جار سالدى. ءبىز اسىعىپ-اپتىقپاي بايقاۋدىڭ اياقتالۋىن كۇتتىك. ءۇشىنشى كۇنى قانداسىمىز ءوزىن ءانشى رەتىندە جالپاق جۇرتقا تانىتقان, كەيبىر ءان زەرتتەۋشىلەرى ماعجان جۇماباەۆقا تەلىپ جۇرگەن حالىق ءانى «دايديداۋعا» سالدى. وسى تۋىندىنى ورىنداعاننان كەيىن قازىلار القاسى قازاق ءانشىسىنىڭ دارىنىن ءسوزسىز مويىنداپ, جەڭىستى ديماشتىڭ قانجىعاسىنا بايلادى.
ايتا كەتەرلىك جايت, بۇل حالىقارالىق ءان بايقاۋلارىنداعى ديماش قۇدايبەرگەنوۆتىڭ العاشقى جەڭىسى ەمەس. بۇعان دەيىن ول كارى قۇرلىقتا «ەۆروۆيدەنيەدەن» ءسال تومەنگى ساتىدا تۇرعان «شىعىس بازارى» جانە جاس ورىنداۋشىلاردىڭ «مەيكين ازيا» اتتى حالىقارالىق فەستيۆالدەرىنە قاتىسىپ, جەڭىمپاز اتانعان. «جاس قانات-2012» رەسپۋبليكالىق بايقاۋىندا «التىن قانات» يەگەرى اتاندى. وسى اتالعان بايقاۋلاردىڭ بارلىعىندا دا ونى «دايديداۋ» ءانى جەڭىسكە جەتەلەدى.
«سلاۆيان بازارى – 2015» فەستيۆالىنەن ورالىپ, استانادا ءباسپاسوز ءماسليحاتىن وتكىزگەن ديماشتىڭ ءوزى دە تەك قازاق انىمەن عانا شەتەلدىك تىندارماندى تاڭعالدىرۋعا بولاتىنىن جەتكىزدى. «اعىلشىن تىلىندەگى انمەن ەشكىمدى دە تاڭىرقاتا المايمىز. بارلىق الەم بەيونسە, مەرايا كەرري سىندى جەزتاڭداي انشىلەردى تانيدى. ولاردان اسىپ ءتۇسۋ وتە قيىن. ولاردىڭ سالعان ءانىن ءوز ناقىشىمىزعا سالىپ ورىنداۋعا بولادى. الايدا, بۇل ارەكەتپەن شەتەلدىك تىڭدارماندى تاڭىرقاتۋ وڭايعا سوقپاس. تەك قازاقى بوياۋى قانىق انمەن عانا بارشا الەمدى مويىنداتا الامىز. ويتكەنى, قازاق مۋزىكاسى دۇنيەجۇزىندەگى ەڭ عاجاپ مۋزىكالاردىڭ ءبىرى» دەيدى ول.
ءانشىنىڭ پىكىرىنشە, قازاقستاندا ۆوكالدان ساباق بەرەتىن مىقتى ۇستازدار مەكتەبى دە قالىپتاسقان. ولاردان دايىندىقتان وتكەن جاس انشىلەرگە MTV Music Awards ساحناسىنا دا قۇلاش سەرمەۋگە ابدەن بولادى. تەك ورىندايتىن ءاندى دۇرىس تاڭداۋ كەرەك. جانە ول ءان مىندەتتى تۇردە قازاق تىلىندە بولۋى قاجەت. بۇل جەردە ديماشتىڭ ۇستازدارى اتا-اناسى قانات پەن سۆەتا ايتباەۆتەر جانە مايرا داۋلەتباقوۆا ەكەنىن دە ايتا كەتەيىك.
ءباسپاسوز ءماسليحاتى بارىسىندا ديماش قۇدايبەرگەنوۆ ارماندارىن دا بۇگىپ قالمادى. ونىڭ ايتۋىنشا, ول بولاشاقتا حالقىمىزدىڭ كۇمىس كومەي ءانشىسى بيبىگۇل تولەگەنوۆامەن جانە رەسەيلىك ءانشى دميتري ماليكوۆپەن دۋەت قۇرىپ, ءان ورىنداعىسى كەلەدى. بيبىگۇل احمەتقىزىنا «سلاۆيان بازارى – 2015» فەستيۆالىنە اتتانار الدىندا جولىعىپ, داڭقتى ءانشىنىڭ باتاسىن الىپتى. ال, دميتري ماليكوۆپەن سول فەستيۆالدە كەزدەسىپ, ونىڭ قولداۋىنا يە بولعان. ديماش كەلەشەكتە رەسەي ەستراداسىن دا باعىندىرعىسى كەلەدى ەكەن. ەندەشە, باتىرحان شۇكەنوۆ سالعان سوقپاقتى داڭعىل جولعا اينالدىرسىن دەپ تىلەيىك.
بالاۋسا دارىن لۋيزا نۇرقۋاتوۆا ون جاستا عانا. «سلاۆيان بازارى – 2015» حالىقارالىق فەستيۆالىنە جيىرماعا تارتا مەملەكەتتەن كەلىپ قاتىسقان بالعىن ونەرپازداردى شاڭ قاپتىرعان ونى بۇل كۇندەرى جەرلەستەرى توبەسىنە كوتەرىپ, ايالاۋدا. الدىمەن دارىندى ءانشىنى اقتاۋ قالاسىنىڭ اكىمى سەرىكباي تۇرىموۆ قابىلداپ, جەڭىسىمەن قۇتتىقتادى. ماڭ دالا حالقى دا ونەرلى قىزىنا بار قوشەمەت-قۇرمەتىن اياماۋدا.
لۋيزا – «ەرتەگىلەر» ۆوكالدى توبىنىڭ مۇشەسى. قولىمىزداعى اقپاراتقا سەنسەك, ول ماڭعىستاۋ وبلىسىنىڭ وڭتۇستىك قازاقستان جانە پاۆلودار وبلىستارىنداعى, سونداي-اق, استانا قالاسىنداعى مادەني كۇندەرىندە ەسترادا-سيمفونيالىق وركەسترىنىڭ جانە «مولودوست» دجاز-ءانسامبلىنىڭ سۇيەمەلدەۋىمەن انسۇيەر قاۋىمدى ءتانتى قىلعان.
سونىمەن قاتار «ايالاعان استانا» رەسپۋبليكالىق بالالار بايقاۋىندا ەكىنشى ورىندى, ال «التىن ميكروفون» حالىقارالىق بالالار ءان بايقاۋىندا ءبىرىنشى ورىندى جەڭىپ العان. حالىقارالىق «بوزتورعاي-2014» بالالار شىعارماشىلىعى بايقاۋىنىڭ گران-پري يەگەرى اتانعان.
«كۋرشينالە – 2015» حالىقارالىق ونەر وليمپياداسىنا قازاقستان اتىنان قاتىسقان رەنات ەلۋباەۆ گران-ءپريدى ۇتىپ الۋىمەن قاتار ەكى ەل اراسىنداعى دوستىقتىڭ نىعايۋىنا ءوز ۇلەسىن قوستى. سول ءۇشىن «تاعا» مەدالىمەن ماراپاتتالدى. بۇل مەدال مادەنيەت جانە ونەر سالالارىندا حالىقتاردىڭ جاقىنداسۋىنا دانەكەر بولعان ادامدارعا تابىستالادى ەكەن.
بۇعان قوسا, ءبىر اپتا بۇرىن قر مادەنيەت جانە سپورت مينيسترلىگى مەن بەلارۋس ەلىندەگى حالىقارالىق ونەر ءۇيىنىڭ قولداۋىمەن سۋرەتشىنىڭ جەكە كورمەسى ۇيىمداستىرىلدى. بۇل كورمە «بەلارۋسسيا مەنىڭ كوزىمەن» اتاۋىن الىپ, رەناتتىڭ وعان سول ەلدە جۇرگەندە سالعان سۋرەتتەرى قويىلدى.
بىلتىر رەنات ەلۋباەۆ ەلوردادا دا جەكە كورمەسىن وتكىزگەن. سول ۋاقىتتا تۇڭعىش پرەزيدەنت مۋزەيىنە بارعاندار جاس سۋرەتشىنىڭ جۇمىستارىن تاماشالاۋعا مۇمكىندىك العان ەدى.