اراعا ءتورت جىل سالىپ, قازاقستان ۆيتەبسكتەگى ايگىلى «سلاۆيان بازارى» فەستيۆالىندە تاعى دا باس تۇعىرعا كوتەرىلدى. بۇعان دەيىن اتالعان جارىستا كوك تۋىمىزدى ديماش قۇدايبەرگەن جەلبىرەتكەن ەدى. بۇل جولى مۇنداي باقىت ءادىلحان ماكينگە بۇيىردى. ءبىر قىزىعى, ءادىلحان دا ءدال ديماش سەكىلدى جالپى 180 ۇپايدىڭ 178-ءىن ەنشىلەدى. جاس جەڭىمپاز وتانىمىزعا ورالا سالىسىمەن, ەلوردادا مادەنيەت ءمينيسترى اقتوتى رايىمقۇلوۆانىڭ قابىلداۋىندا بولدى.
بيىل «سلاۆيان بازارى» 8-17 شىلدە ارالىعىندا ءوتتى. مۋزىكالىق بايقاۋعا ون سەگىز ەلدىڭ ونەرپازدارى قاتىستى. 1992 جىلدان بەرى ۇيىمداستىرىلىپ كەلە جاتقان بۇل سايىس كەزىندە قاتىسۋشىلار بەلارۋس حالىق ءارتىسى, پروفەسسور ميحايل فينبەرگتىڭ جەتەكشىلىگىمەن بەلارۋس رەسپۋبليكاسىنىڭ ۇلتتىق اكادەميالىق وركەسترىمەن بىرگە جۇمىس ىستەپ, كاسىبي شەبەرلىك مەكتەبىنەن ءوتتى. فەستيۆالدىڭ ءبىرىنشى كۇنى ءادىلحان يگور كرۋتويدىڭ «وزەرو نادەجدى» ءانىن شىرقاسا, ەكىنشى كۇنى ابايدىڭ «كوزىمنىڭ قاراسىن» ورىنداپ, ءادىل قازىلار القاسىنىڭ دا, كورەرمەننىڭ دە ىقىلاسىنا بولەندى.
قازاقستاندىق دەلەگاتسيانى باستاپ بارعان ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اسحات ماەميروۆ بايقاۋ بارىسى تۋرالى اڭگىمەلەي كەلە, ءادىلحاننىڭ «سلاۆيان ءۇمىتى» جۇلدەسىن دە قوسا العانىن جەتكىزدى:
– «سلاۆيان ءۇمىتى» جۇلدەسى – بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ ارنايى سىيلىعى. ونى سلاۆيان مۋزىكالىق ونەرىنىڭ مازمۇنى مەن تاقىرىبىن ۆوكالدىق تۇرعىدا جوعارى دەڭگەيدە اشقان ۇزدىك انشىگە تاعايىندايدى. بۇل ءبىز ءۇشىن دە, كورەرمەن ءۇشىن دە توسىنسىي بولعانىن راس, – دەدى ول.
ءوز كەزەگىندە ءادىلحان اتالعان بايقاۋعا ءۇش جىل بويى ۇزدىكسىز دايىندالعانىن, ۇستازدارىنىڭ وتە جاقسى قولداۋ بىلدىرگەنىن ايتا وتىرىپ, اسىرەسە ۆوكالدان مۇعالىمى PhD دوكتورى يوانيس كايسيديدىڭ ەڭبەگى زور بولعانىن اتاپ ءوتتى.
ءادىلحان بۇعان دەيىن دە ونەر جولىنداعى جەتىستىكتەردەن قۇرالاقان ەمەس-ءتى. ماسەلەن, 2012 جىلى قازاقستانداعى فرانتسيا ەلشىلىگى ۇيىمداستىرعان Alliance Française كونكۋرسىنىڭ لاۋرەاتى, «جاس قانات» جاس ورىنداۋشىلاردىڭ ۇلتتىق كونكۋرسىنىڭ ءفيناليسى, 2013 جىلى «شابىت» حالىقارالىق كونكۋرسىنىڭ لاۋرەاتى, 2016 جىلى ەۋرازيا مادەنيەت قورىنىڭ ستيپەندياتى اتانعان. سونداي-اق بىلتىر ح-Factor تەلەجوباسىنىڭ فينالىنا دەيىن جەتىپ, يسپانيانىڭ ماربەليا قالاسىندا وتكەن Tu Onda حالىقارالىق فەستيۆالىنىڭ گران-پري جۇلدەسىن جەڭىپ العان.
مينيسترمەن كەزدەسۋگە ادىلحانمەن قاتار «مولودا گاليچينا» زاماناۋي ۋكراين اندەرىنىڭ حالىقارالىق فەستيۆالى جەڭىمپازى قۋانىش ەرزاتۇلى, 1-ورىن جۇلدەگەرى مەرەكە كەنجەعۇلوۆ جانە «قازاق قىزدارى» توبى دا كەلدى. «مولودا گاليچينا» – جىل سايىن ۋكراينانىڭ نوۆوياۆوروۆسك قالاسىندا وتەتىن ءداستۇرلى ونەر سايىسى. وندا ءارتۇرلى مەملەكەتتەردەن جينالعان 10 مەن 25 جاس ارالىعىنداعى 100-گە تارتا جاس ورىنداۋشى باق سىنايدى. جارىس شارتى بويىنشا قاتىسۋشىلار قانداي ەلدەن كەلگەنىنە قاراماستان, ۋكراين تىلىندە ءان ايتۋى كەرەك. وسىلايشا زاماناۋي ۋكراين اندەرى مەن ونەرىن الەمنىڭ ءار تۇكپىرىندە تانىمال ەتۋ ماقسات ەتىپ قويىلادى.
