ەلورداداعى دوستىق ۇيىندە قازاقستان حالقى اسسامبلەياسىنىڭ ۇيىمداستىرۋىمەن «ۇلى دالانىڭ كيەلى مۇراسى – ۇلتتىق دومبىرا» اتتى شىعارماشىلىق كەزدەسۋ وتكىزىلدى.
شىعارماشىلىق كەشتىڭ قۇرمەتتى قوناقتارى رەتىندە شاقىرىلعان قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى, بەلگىلى جىراۋشى الماس الماتوۆ, قازاقستاننىڭ ەڭبەك سىڭىرگەن قايراتكەرى, سەگىز سەرى, ءبىرجان سال, اقان سەرىلەردەن باستاۋ العان ارقا انشىلىك مەكتەبىنىڭ جالعاستىرۋشى وكىلى ەرلان رىسقالي مەن ۇلتتىق اسپاپتى جاساۋشى شەبەر ءارى ءانشى تەلمان قۇجيمانوۆ جينالعان قاۋىمعا جالپى ونەر تۋرالى, سونىڭ ىشىندە جىراۋلىق ءداستۇر جونىندە كەڭىنەن اڭگىمەلەپ بەردى.
العاشقى بولىپ ءسوز العان ا.الماتوۆ ەجەلگى داۋىردەن قالىپتاسىپ بۇگىنگە جەتكەن جىراۋلىق ءداستۇر تۋرالى اڭگىمەلەدى. سونىڭ ىشىندە ول ورحون-ەنيسەي كەزەڭىن قامتىپ ءوتىپ, ۇلتتىق سالت-داستۇرلەرمەن ساباقتاسىپ جاتقان جىراۋلىق ءداستۇردىڭ بۇگىنگى جاي-كۇيىنە توقتالدى. سونداي-اق ول قازىرگى كەزدە 550-دەن اسا جىراۋلىق داستان بار ەكەنىن دە اتاپ ءوتتى.
ەلىمىزدە عانا ەمەس, شەتەلگە ەسىم-سويى تانىمال, لوندوندا «ماڭماڭگەر» اتتى ءان جيناعىن شىعارعان ە.رىسقالي جىراۋلىق ءداستۇردىڭ ەرەكشەلىگىنە توقتالىپ, ونىڭ قورشاعان ورتامەن, تابيعاتپەن بايلانىسىن
بايانداپ, ءبىرجان سالدىڭ ءانىن ورىنداپ بەردى. ال تەلمان قۇجيمانوۆ ۇلتتىق اسپاپتى ازىرلەۋ ءادىسىنىڭ قىر-
سىرىن كوپشىلىككە ءتۇسىندىرىپ, م.ماقاتاەۆتىڭ سوزىنە جازىلعان «قازاعىم-اي» ءانىن شىرقادى.
بۇل كەشتە «قىرعىزستان-استانا» قوعامدىق ءبىرلەستىگىنىڭ وكىلى لاريسا نۇرلانقىزى, «جايحۋن» قاراقالپاق ەتنومادەني
بىرلەستىگى» قوعامدىق ءبىرلەستىگىنىڭ وكىلى راحيم ورىنعاليەۆ, وقۋشىلار سارايىنىڭ «گولوس» مۋزىكالىق ستۋدياسىنىڭ جەتەكشىسى برونيسلاۆ بۋگيناس, «يۋنچي» دۇنگەن ەتنومادەني ورتالىعى» قوعامدىق بىرلەستىگىنىڭ وكىلى ديليارا كابيدۋلينا جانە «اكبۋزات» باشقۇرت ەتنومادەني بىرلەستىگىنىڭ وكىلى
جىبەك كۋجاحمەتوۆا دومبىرا شاناعىنان جىر توگىلتىپ, جۇرتشىلىقتىڭ ىستىق ىقىلاسىنا بولەندى. ءارى ولارعا شىعارماشىلىق كەشتىڭ ءىلتيپاتى رەتىندە بارىنە دومبىرا تابىس ەتىلدى.
اسەرلى ءىس-شارانى نۇر-سۇلتان قالاسى قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا قورىتىندىلاپ, كەش قوناقتارىنا ەستەلىك سىيلىقتار تابىستادى.
جادىرا مۇراتبەكوۆا
