دومبىرادا – ءداۋىر ءۇنى

ۇلتتىق دومبىرا كۇنىنە وراي ەلورداداعى «قازاق ەلى» مونۋمەنتىنىڭ الدىنداعى الاڭدا ءبىر مىڭنان اسا ادام بىرگە دومبىرا تارتىپ, قازاق كۇيلەرىن ورىندادى.

ءىس-شاراعا قاتىسقان مەملەكەت باسشىسى قاسىم-جومارت توقاەۆ:
– قازاق پەن دومبىرا – ەگىز ۇعىم. قادىر اعامىز قاسيەتتى دومبىرانى «ناعىز قازاق» دەپ جىرلاعان. كۇمبىرلەگەن دومبىرانىڭ ءۇنى باتىرلارىمىزعا رۋx, اقىندارى­مىز­عا شابىت بەرگەن. وسىناۋ يگى مۇرامىز­دى جاس ۇرپاق اراسىندا ودان ءارى تانىمال ەتۋ – ءبىزدىڭ مىندەتىمىز. سوندىقتان مەكتەپ باعدارلاماسىنا دومبىرا ۇيرەنۋ ءپانىن قوسۋ ورىندى دەپ سانايمىن, – دەدى ءوز سوزىندە.
فلەشموب بارىسىندا «سارىارقا», «اداي», «القيسسا», «كوڭىل تولقىنى», «بالبىراۋىن» جانە «كوروعلى» كۇيلەرى ورىندالدى. قاتىسۋشىلاردىڭ ەڭ كىشىسى 5-تە بولسا, ەڭ ۇلكەنى – 68 جاستا. وركەسترگە قر ەڭبەك سىڭىرگەن قايراتكەرى, كومپوزيتور ايت­قالي جايىموۆ پەن مادەنيەت قايراتكەرى, ديريجەر نۇرلان بەكەنوۆ جەتەكشىلىك ەتتى.
مەرەكەلىك شارا كەزىندە كۇمبىرلەگەن كۇيدەن باسقا, جينالعاندار نازارىنا «جاستار» تەاترىنىڭ اكتەرلەرى تاريحي قويىلىمىن ۇسىندى, ەلوردالىق مۋزىكا مەكتەپتەرىنىڭ شاكىرتتەرى ءوز ونەرلەرىن ورتاعا سالدى, اقىندار ايتىسى دا ءوتتى.